ନୂଆଦିଲ୍ଲୀ,୨।୧୧: ଯୌନ ହିଂସାର ଶିକାର ହୋଇଥିବା ପୀଡ଼ିତାଙ୍କ ଦ୍ୱାରା ଅଭିଯୁକ୍ତଙ୍କ ହାତରେ ରାଖି ବନ୍ଧାଇବା ଆଦେଶ ଦେବା ଏକ ଡ୍ରାମା ଭଳି। ତେଣୁ ଏଭଳି ମାମଲାର ବିଚାର ସମୟରେ ଜାମିନ ରାଶି ନିର୍ଦ୍ଧାରଣ କରିବା ନେଇ ତଥ୍ୟ ଉପରେ ଗୁରୁତ୍ୱ ଦେବାର ଆବଶ୍ୟକତା ରହିଛି। ସେହିପରି ଲିଙ୍ଗଗତ ସମ୍ବେଦନଶୀଳତା ଉପରେ ଗୁରୁତ୍ୱାରୋପ କରାଯିବା ସମ୍ପର୍କରେ ଆଟର୍ନି ଜେନେରାଲ କେ.କେ. ବେଣୁଗୋପାଳ ସୁପ୍ରିମ୍କୋର୍ଟରେ କହିଛନ୍ତି। ପୀଡ଼ିତାଙ୍କ ଦ୍ୱାରା ଅଭିଯୁକ୍ତଙ୍କୁ ରାଖି ବନ୍ଧାଇ ଜାମିନ ଦିଆଯିବା ମାମଲାର ବିଚାର ସମୟରେ ବେଣୁଗୋପାଳ ବିଚାରପତି ଏ.ଏମ୍. ଖାନଓ୍ବିଲ୍କର, ଦିନେଶ ମାହେଶ୍ୱରୀ ଏବଂ ସଞ୍ଜିବ ଖାନ୍ନାଙ୍କ ନେତୃତ୍ୱରେ ଗଠିତ ଖଣ୍ଡପୀଠଙ୍କୁ ଏଭଳି କହିଛନ୍ତି। ଜୁଲାଇ ୩୦ରେ ମଧ୍ୟପ୍ରଦେଶ ହାଇକୋର୍ଟ ଏଭଳି ରାୟ ଦ୍ୱାରା ଅଭିଯୁକ୍ତଙ୍କୁ ଜାମିନ ନିର୍ଦ୍ଦେଶ ଜାରି କରିଥିଲେ l ତେବେ ଏହାକୁ ବିରୋଧ କରି ୯ଜଣ ମହିଳା ଅଧିବକ୍ତା ସୁପ୍ରିମ୍କୋର୍ଟରେ ଆବେଦନ କରିଥିଲେ। ଏଭଳି ସର୍ତ୍ତ ଆଇନ ବ୍ୟବସ୍ଥାର ବିରୋଧୀ ବୋଲି ବେଣୁଗୋପାଳ କହିଛନ୍ତି। ଏଭଳି ସର୍ତ୍ତ ଉପରେ ରୋକ ଲଗାଯିବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ଏହାଦ୍ୱାରା ପୀଡ଼ିତାଙ୍କ ସମସ୍ୟା ବଢ଼ିଯାଇଥାଏ।
