ଭୁବନେଶ୍ୱର, ୯।୬: ବିଜୁ ଜନତା ଦଳ (ବିଜେଡି)ରେ ସୁଜାତା ଆର୍. ପାଣ୍ଡିଆନଙ୍କ ଯୋଗଦାନ ନେଇ ଚାଲିଥିବା ଚର୍ଚ୍ଚା ମଧ୍ୟରେ ଦଳର ବରିଷ୍ଠ ନେତା ବଦ୍ରି ନାରାୟଣ ପାତ୍ର ଏହାକୁ ନେଇ ତାଙ୍କ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, ସୁଜାତାଙ୍କ ବିଜେଡିରେ ଯୋଗଦାନ ନେଇ ଯେଉଁ ଚର୍ଚ୍ଚା ଚାଲିଛି, ତାହା ଏକ “ଉଡ଼ା ଖବର” ହୋଇପାରେ।
ବଦ୍ରି ପାତ୍ର କହିଛନ୍ତି, ପାଣ୍ଡିଆନ ପରିବାରକୁ ନେଇ ଦଳୀୟ କର୍ମୀମାନଙ୍କ ମଧ୍ୟରେ ବ୍ୟାପକ ଉତ୍ସାହ ରହିଛି ବୋଲି କୁହାଯାଉଥିବା ଦାବିର କୌଣସି ସ୍ପଷ୍ଟ ଆଧାର ନାହିଁ। “କେଉଁ କର୍ମୀ ଉତ୍ସାହିତ ଅଛନ୍ତି, ତାହା ମୁଁ ଜାଣିନି। କିଛି ଲୋକଙ୍କ ମତକୁ ସମଗ୍ର ଦଳର ଭାବନା ବୋଲି କୁହାଯାଇପାରିବ ନାହିଁ,” ବୋଲି ସେ କହିଛନ୍ତି।
ସେ ଆହୁରି କହିଛନ୍ତି ଯେ, ବିଜେଡିର ନିର୍ବାଚନୀ ବିପର୍ଯ୍ୟୟ ପାଇଁ ଭି. କେ. ପାଣ୍ଡିଆନଙ୍କ ଭୂମିକାକୁ ନେଇ ଦଳ ଭିତରେ ପୂର୍ବରୁ ଆଲୋଚନା ହୋଇଆସୁଛି। ଏପରିକି ଦଳର ରାଜ୍ୟସଭା ପ୍ରାର୍ଥୀ ଦେବାଶିଷ ସାମନ୍ତରାୟ ମଧ୍ୟ ପାଣ୍ଡିଆନଙ୍କୁ ପରୋକ୍ଷ ଭାବେ ନିର୍ବାଚନୀ ପରାଜୟ ପାଇଁ ଦାୟୀ କରିଥିବା କଥା ଉଲ୍ଲେଖ କରିଛନ୍ତି। “ମୁଁ ମଧ୍ୟ ବହୁ ପୂର୍ବରୁ ଏହି କଥା କହିସାରିଛି,” ବୋଲି ବଦ୍ରି ପାତ୍ର କହିଛନ୍ତି।
ତେବେ ସୁଜାତା ଆର୍. ପାଣ୍ଡିଆନ ବିଜେଡିରେ ଯୋଗଦେବେ କି ନାହିଁ, ସେ ନେଇ ଚୂଡ଼ାନ୍ତ ନିଷ୍ପତ୍ତି ଦଳ ସଭାପତି ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ନିର୍ଭର କରୁଥିବା ସେ କହିଛନ୍ତି। “ଦଳ ସଭାପତି ଯାହା ନିଷ୍ପତ୍ତି ନେବେ, ତାହାକୁ ସମସ୍ତେ ସମ୍ମାନ କରିବେ,” ବୋଲି ସେ ମତ ପ୍ରକାଶ କରିଛନ୍ତି।
ଉଲ୍ଲେଖଯୋଗ୍ୟ ଯେ, ଗତକାଲି ବିଜେଡି ନେତା ମନ୍ମଥ ରାଉତରାୟ ବଡ଼ ବୟାନ ଦେଇ କହିଥିଲେ ଯେ, ସୁଜାତା ଆର୍. ପାଣ୍ଡିଆନ “ଶତ ପ୍ରତିଶତ” ବିଜେଡିକୁ ଆସୁଛନ୍ତି ଏବଂ ଦଳ ତାଙ୍କୁ ସ୍ୱାଗତ କରିବାକୁ ପ୍ରସ୍ତୁତ ଅଛି। ଏହା ପରେ ଦଳ ଭିତରେ ଓ ବାହାରେ ଏହି ପ୍ରସଙ୍ଗକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଥିବା ବେଳେ ବଦ୍ରି ପାତ୍ରଙ୍କ ବୟାନ ଏହି ଚର୍ଚ୍ଚାକୁ ନୂଆ ମୋଡ଼ ଦେଇଛି।
