ନୟାଗଡ଼/ଦଶପଲ୍ଲା, ୧୦/୬ (ଲୋକନାଥ ମିଶ୍ର/ପ୍ରକାଶ କୁମାର ପାଣି):ଦଶପଲ୍ଲାର ଟାକରାସ୍ଥିତ ଗ୍ରୀଡ୍କୁ ତୁରନ୍ତ କାର୍ଯ୍ୟକ୍ଷମ କରିବା, ଅଘୋଷିତ ବିଦ୍ୟୁତ କାଟ ବନ୍ଦ କରିବା, ଲୋ-ଭୋଲଟେଜ ସମସ୍ୟାର ସମାଧାନ, ଟିପିସିଓଡିଏଲର କଥିତ ଦମନମୂଳକ କାର୍ଯ୍ୟ ବନ୍ଦ କରିବା ଏବଂ ପୂର୍ବରୁ ଦାଖଲ ହୋଇଥିବା ମିଥ୍ୟା ମାମଲା ପ୍ରତ୍ୟାହାର ଦାବିରେ ବୁଧବାର ଦଶପଲ୍ଲାରେ ଏକ ବିଶାଳ ଗଣଶୋଭାଯାତ୍ରା ଓ ବିକ୍ଷୋଭ ପ୍ରଦର୍ଶନ ଅନୁଷ୍ଠିତ ହୋଇଛି।
ଏହି ଅବସରରେ ଦଶପଲ୍ଲା ମହାବୀର ମନ୍ଦିରଠାରୁ ଏକ ଗଣଶୋଭାଯାତ୍ରା ବାହାରି ତହସିଲ କାର୍ଯ୍ୟାଳୟ ପର୍ଯ୍ୟନ୍ତ ପରିକ୍ରମା କରିଥିଲା। ପରେ ଆନ୍ଦୋଳନକାରୀମାନେ ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣା ଓ ବିକ୍ଷୋଭ ପ୍ରଦର୍ଶନ କରିଥିଲେ।
ଆନ୍ଦୋଳନକାରୀମାନଙ୍କ ଅଭିଯୋଗ ଅନୁଯାୟୀ, ଦଶପଲ୍ଲା ଅଞ୍ଚଳରେ ବିଦ୍ୟୁତ ସମସ୍ୟା ଦିନକୁ ଦିନ ଉତ୍କଟ ରୂପ ଧାରଣ କରୁଛି। ପ୍ରତିଦିନ ୩୦ରୁ ୪୦ ଥର ବିଦ୍ୟୁତ ବିଚ୍ଛିନ୍ନ ହେଉଥିବା ବେଳେ ଏନେଇ କୌଣସି ପୂର୍ବ ସୂଚନା ଦିଆଯାଉ ନାହିଁ। ସାମାନ୍ୟ ବର୍ଷା କିମ୍ବା ପବନର ଆଭାସ ମିଳିଲେ ମଧ୍ୟ ବିଦ୍ୟୁତ କାଟ କରାଯାଉଛି।
ସେହିପରି ଲୋ-ଭୋଲଟେଜ ସମସ୍ୟା ଯୋଗୁଁ ଟିଭି, ଫ୍ରିଜ, କୁଲର, ଗ୍ରାଇଣ୍ଡର ଭଳି ବୈଦ୍ୟୁତିକ ଉପକରଣ ନଷ୍ଟ ହେଉଥିବା ଅଭିଯୋଗ ହୋଇଛି। ଫ୍ୟାନ ଠିକ୍ ଭାବେ ବୁଲୁ ନ ଥିବା ବେଳେ ଟିଭି ଓ ଅନ୍ୟାନ୍ୟ ଉପକରଣ ମଧ୍ୟ ସଠିକ୍ ଭାବେ କାର୍ଯ୍ୟ କରୁନାହିଁ।
ସ୍ଥାନୀୟ ବାସିନ୍ଦାମାନେ କହିଛନ୍ତି ଯେ, ଉନ୍ନତ ବିଦ୍ୟୁତ ସେବା ପାଇଁ ବାରମ୍ବାର ଅଭିଯୋଗ, ଧାରଣା ଓ ଆନ୍ଦୋଳନ କରାଯାଇଥିଲେ ମଧ୍ୟ କୌଣସି ସ୍ଥାୟୀ ସମାଧାନ ହୋଇନାହିଁ। ବରଂ ଆନ୍ଦୋଳନକାରୀଙ୍କ ବିରୋଧରେ ମିଥ୍ୟା ମାମଲା ରୁଜୁ କରି ହଇରାଣ କରାଯାଉଥିବା ଅଭିଯୋଗ ଉଠିଛି।
ଅନ୍ୟପକ୍ଷରେ, ଦଶପଲ୍ଲାର ବିଦ୍ୟୁତ ସମସ୍ୟା ସମାଧାନ ପାଇଁ ଟାକରାଠାରେ ଏକ ଗ୍ରୀଡ୍ ନିର୍ମାଣ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ ଏହାକୁ କାର୍ଯ୍ୟକ୍ଷମ କରାଯାଇନାହିଁ। ପୋଲିସର ସହଯୋଗ ଲୋଡ଼ାଯାଇଥିଲେ ମଧ୍ୟ ସେମାନେ ଅସହାୟତା ପ୍ରକାଶ କରିଥିବା ଆନ୍ଦୋଳନକାରୀମାନେ କହିଛନ୍ତି।
ଡିଜିଟାଲ ଯୁଗରେ ପ୍ରତ୍ୟେକ କାର୍ଯ୍ୟ ପାଇଁ ବିଦ୍ୟୁତ ଅତ୍ୟାବଶ୍ୟକ ହୋଇପଡ଼ିଥିବା ବେଳେ ଗ୍ରୀଷ୍ମ ଋତୁର ଅସହ୍ୟ ଗୁଳୁଗୁଳି, ଅଘୋଷିତ ବିଦ୍ୟୁତ କାଟ ଏବଂ ଲୋ-ଭୋଲଟେଜ ସମସ୍ୟା ଜନଜୀବନକୁ ଅତିଷ୍ଠ କରିଦେଇଛି। ଏହାର ପ୍ରତିବାଦରେ ଦଶପଲ୍ଲାବାସୀ ବାଧ୍ୟ ହୋଇ ରାସ୍ତାକୁ ଓହ୍ଲାଇଥିବା କହିଛନ୍ତି।
ଆନ୍ଦୋଳନକାରୀମାନେ ଶୀଘ୍ର ସମସ୍ୟାର ସମାଧାନ ନ ହେଲେ ଆଗାମୀ ଦିନରେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଚେତାବନୀ ଦେଇଛନ୍ତି।
