ଭୁବନେଶ୍ୱର,୯।୬(ସୁନିତ୍ ମିଶ୍ର): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କିଛିଦିନ ତଳେ ପେଟ୍ରୋଲ, ଡିଜେଲର ବ୍ୟବହାର କମ୍ କରିବା ପାଇଁ କହିବା ପରଠାରୁ ସାଧାରଣରେ ଲୋକଙ୍କ ଭିତରେ ଏକ ପ୍ରକାର ଭୟ ରହିଛି। ସମାନଭାବେ ବର୍ତ୍ତମାନ ରାଜ୍ୟର ପେଟ୍ରୋଲ ପମ୍ପଗୁଡ଼ିକୁ ଆବଶ୍ୟକତା ଅନୁଯାୟୀ ତୈଳ ପହଞ୍ଚି ପାରୁ ନ ଥିବା ଲକ୍ଷ୍ୟ କରାଯାଉଛି। ରାଜ୍ୟ ସରକାର ଖର୍ଚ୍ଚ କମ୍ କରିବା ପାଇଁ ସରକାରୀ ବାବୁମାନଙ୍କ ଗାଡ଼ି ବ୍ୟବହାର ଉପରେ ଏକପ୍ରକାର କଟକଣା ଲଗାଇ ସାରିଛନ୍ତି। ପୂର୍ବଭଳି ଜଣେ ଅଧିକାରୀ ଏକୁଟିଆ ଗୋଟିଏ ସରକାରୀ ଗାଡ଼ି ବ୍ୟବହାର ନ କରିବାକୁ ନିର୍ଦ୍ଦେଶ ଦିଆଯାଇଛି। ଏଭଳି ସ୍ଥିତି ସରକାରୀ ବାବୁମାନଙ୍କ ବିମାନ ଯାତ୍ରାକୁ ନେଇ ନୂଆ ତଥ୍ୟ ଦୃଷ୍ଟିକୁ ଆସିଛି। ଅର୍ଥ ବିଭାଗ ପକ୍ଷରୁ ଗତ ୫ ତାରିଖରେ ଜାରି କରାଯାଇଥିବା ଏକ ସ୍ମାରକ ଅନୁଯାୟୀ, ସରକାରୀ ଗସ୍ତ ସମୟରେ କର୍ମଚାରୀମାନେ ବିଜ୍ନେସ କ୍ଲାସରେ ବିମାନଯାତ୍ରା କରିବା ପାଇଁ ଗୋଟିଏ ଜାଗାରେ ଦୁଇଟି ବିମାନର ବ୍ୟବହାର କରୁଛନ୍ତି। ଏହାଦ୍ୱାରା ରାଜକୋଷରୁ ବିପୁଳ ଟଙ୍କା ବ୍ୟୟ ହେଉଥିବା ନଜରକୁ ଆସିବା ପରେ ଏହା ଉପରେ ରୋକ ଲଗାଇବାକୁ ପଦକ୍ଷେପ ନିଆଯାଇଛି।
ଅର୍ଥ ବିଭାଗର ସ୍ମାରକ ଅନୁଯାୟୀ, ରାଜ୍ୟ ସରକାରଙ୍କ ଅଧୀନରେ କାର୍ଯ୍ୟରତ ସର୍ବଭାରତୀୟ ସେବା(ଏଆଇଏସ୍)ର ଅଧିକାରୀ(ଯେଉଁମାନଙ୍କ ଦରମା ସ୍ତର-୧୪ ବା ତା’ଠାରୁ ଅଧିକ) ସେମାନେ ସରକାରୀ କାର୍ଯ୍ୟରେ ବିମାନଯାତ୍ରା କରିବା ବେଳେ ବିଜ୍ନେସ ବା କ୍ଲବ୍ ଶ୍ରେଣୀ ପାଇଁ ଯୋଗ୍ୟ ଅଟନ୍ତି। କିନ୍ତୁ ନଜରକୁ ଆସିଛି, କେତେଜଣ ସରକାରୀ କର୍ମଚାରୀ ଯେଉଁମାନେ ବିମାନ ଦ୍ୱାରା ବ୍ୟବସାୟ ଶ୍ରେଣୀ ଯାତ୍ରା କରିବାକୁ ହକ୍ଦାର, ସେମାନେ ରାଜ୍ୟ ବାହାରର କୌଣସି ଗୋଟିଏ ସ୍ଥାନକୁ ଯିବା ଲାଗି ସିଧାସଳଖ ବିମାନ ବ୍ୟବହାର କରୁନାହାନ୍ତି। ବିଜନେସ୍ ବା କ୍ଲବ ଶ୍ରେଣୀର ସିଟ୍ରେ ଯିବା ଲାଗି ସିଧାସଳଖ ଯାଉଥିବା ବିମାନରେ ନ ଯାଇ କନେକ୍ଟିଂ ଫ୍ଲାଇଟ୍କୁ ବେଶି ପ୍ରାଧାନ୍ୟ ଦେଉଛନ୍ତି। ଫଳରେ କୌଣସି ସ୍ଥାନକୁ ଯିବା ପାଇଁ ସରକାରୀ କର୍ମଚାରୀମାନେ ଦୁଇଟି ବିମାନ ଟିକେଟ କରୁଛନ୍ତି କିମ୍ବା ଅଧିକ ଟଙ୍କା ଖର୍ଚ୍ଚ କରି କନେକ୍ଟିଂ ଫ୍ଲାଇଟ୍ରେ ଯିବା ପାଇଁ ପସନ୍ଦ କରୁଛନ୍ତି। ଏହାଦ୍ୱାରା ସରକାରୀ ପାଣ୍ଠିର ପରିହାରଯୋଗ୍ୟ ଖର୍ଚ୍ଚ ହୁଏ ଏବଂ ଅନାବଶ୍ୟକ ବିମାନ ଯାତ୍ରା ଯୋଗୁ ସମ୍ପୃକ୍ତ ଅଧିକାରୀଙ୍କ ମୂଲ୍ୟବାନ ସମୟ ମଧ୍ୟ ନଷ୍ଟ ହେଉଛି।
ସ୍ମାରକରେ ଆହୁରି ଉଲ୍ଲେଖ କରାଯାଇଛି, ସରକାରୀ ଅଧିକାରୀ ଯେଉଁଠାରୁ ଯାତ୍ରା କରିବେ ଏବଂ ଯେଉଁ ସ୍ଥାନରେ ପହଞ୍ଚିବେ ଏଥିଲାଗି ଯଦି ସିଧାସଳଖ ବିମାନ ସୁବିଧା ଥିବ ତାହାଲେ ସେହି କ୍ଷେତ୍ରରେ ବିଜ୍ନେସ ବା କ୍ଲବ କ୍ଲାସ୍ କୌଣସି ପ୍ରକାର କନେକ୍ଟିଂ ଫ୍ଲାଇଟ୍ର ବ୍ୟବହାର କରିପାରିବେ ନାହିଁ। ସେହି ସିଧାସଳଖ ବିମାନରେ ଯାତ୍ରା କରିବେ। ଯଦି ସିଧା ଗନ୍ତବ୍ୟ ସ୍ଥଳକୁ ଯାଉଥିବା ବିମାନରେ ବିଜ୍ନେସ କ୍ଲାସ୍ ବ୍ୟବସ୍ଥା ନ ଥିବ ଅଧିକାରୀମାନେ ପ୍ରିମିୟମ ଇକୋନୋମିଂ କିମ୍ବା ଇକୋନୋମି କ୍ଲାସ୍ରେ ଯାତ୍ରା କରିପାରିବେ।
Dharitri – Odisha’s No.1 Odia Daily
