ଲକ୍ଷ୍ନୌ,୯।୬: ଉତ୍ତର ପ୍ରଦେଶ (UP) ରେ ପାଣିପାଗ ଏବେଠାରୁ ରୂପ ବଦଳାଇବା ଆରମ୍ଭ କଲାଣି। ବାରାଣସୀ, ପ୍ରୟାଗରାଜ, ବାନ୍ଦା ଏବଂ ଆଗ୍ରା ଭଳି ସହରଗୁଡ଼ିକରେ ପାରଦ ୪୧ ରୁ ୪୪ ଡିଗ୍ରୀ ସେଲସିୟସ ମଧ୍ୟରେ ରହିଥିବା ବେଳେ ଆଜି ଅନେକ ଜିଲ୍ଲା ପାଇଁ ପ୍ରବଳ ଝଡ଼ବର୍ଷାର ଚେତାବନୀ ଜାରି କରାଯାଇଛି। ପାଣିପାଗ ବିଭାଗର ପୂର୍ୱାନୁମାନ ଅନୁଯାୟୀ, ବାତ୍ୟା ସଦୃଶ ଘୂର୍ଣ୍ଣିବଳୟ ସକ୍ରିୟ ହେବା ଯୋଗୁଁ ଜୁନ ୧୧ ଓ ୧୨ ତାରିଖରେ ସମଗ୍ର ରାଜ୍ୟରେ ଘଣ୍ଟାପ୍ରତି ୪୦ ରୁ ୫୦ କିଲୋମିଟର ବେଗରେ ପବନ ବହିବା ସହ ପ୍ରାକ-ମୌସୁମୀ (Pre-Monsoon) ବର୍ଷା ଓ ବଜ୍ରପାତ ହେବ। ଏହାର ପ୍ରଭାବ ବର୍ତ୍ତମାନଠାରୁ ହିଁ ଦେଖିବାକୁ ମିଳିଲାଣି ଏବଂ ୟୁପିର ଅନେକ ଜିଲାରେ ଭାରି ବର୍ଷା ହେବା ନେଇ ଆଲର୍ଟ ଜାରି କରାଯାଇଛି।
ପାଣିପାଗ ବିଭାଗର ସୂଚନା ଅନୁସାରେ ଉନ୍ନାଓ, ଲକ୍ଷ୍ନୌ ଏବଂ ହରଦୋଇ ଜିଲ୍ଲାରେ ଘଣ୍ଟାପ୍ରତି ୬୦ ରୁ ୭୦ କିଲୋମିଟର ଏବଂ କେତେକ ସ୍ଥାନରେ ୮୦ କିଲୋମିଟର ବେଗରେ ପ୍ରବଳ ଝଡ଼ ସହ ବର୍ଷା ହେବାର ଆଶଙ୍କା ରହିଛି।
୧୧ ଜୁନରେ ପାଣିପାଗ ବିଭାଗ ସମଗ୍ର ରାଜ୍ୟ ପାଇଁ ଅରେଞ୍ଜ ଏବଂ ୟେଲୋ ଆଲର୍ଟ ଜାରି କରିଛି। ୧୧ ଏବଂ ୧୨ ଜୁନରେ ଘଣ୍ଟାପ୍ରତି ୪୦ ରୁ ୫୦ କିମି ବେଗରେ ପବନ ବହିବା ସହ ମୂଷଳଧାରାରେ ବର୍ଷା ହେବ। ଏହାଫଳରେ ତାପମାତ୍ରା ୪୩ ଡିଗ୍ରୀରୁ ହ୍ରାସ ପାଇ ସିଧା ୩୫ ରୁ ୩୬ ଡିଗ୍ରୀ ସେଲସିୟସକୁ ଚାଲିଆସିବ।
ଉତ୍ତର ହରିୟାଣା ଏବଂ ପୂର୍ୱ ଉତ୍ତର ପ୍ରଦେଶ ଆକାଶରେ ସମୁଦ୍ର ପତ୍ତନରୁ ୧.୫ କିମି ଉପରେ ଏକ ଚକ୍ରବାତ୍ ବାୟୁମଣ୍ଡଳୀୟ କ୍ଷେତ୍ର ସକ୍ରିୟ ରହିଛି। ପୂର୍ୱ ଉତ୍ତର ପ୍ରଦେଶରୁ ଆରମ୍ଭ କରି ଉତ୍ତର ଆନ୍ଧ୍ର ପ୍ରଦେଶ ପର୍ଯ୍ୟନ୍ତ (ମଧ୍ୟପ୍ରଦେଶ, ଛତିଶଗଡ଼ ଓ ଓଡ଼ିଶା ଦେଇ) ଏକ ଲଘୁଚାପ ରେଖା ଗତି କରୁଛି, ଯାହା ବଙ୍ଗୋପସାଗରରୁ ପ୍ରଚୁର ପରିମାଣରେ ଜଳୀୟବାଷ୍ପ ଟାଣୁଛି।
