ଇସଲାମାବାଦ,୯।୬: ପାକିସ୍ତାନ ଭାରତର ସବୁଠାରୁ ନିକଟତମ ସହଯୋଗୀ ରାଷ୍ଟ୍ର ଭାବରେ ପରିଗଣିତ ହେଉଥିବା ରୁଷିଆ ସହିତ ଏକ ପ୍ରମୁଖ ଚୁକ୍ତି କରିଛି। କିର୍ଗିଜସ୍ତାନର ରାଜଧାନୀ ବିଶକେକରେ ଅନୁଷ୍ଠିତ ସାଂଘାଇ ସହଯୋଗ ସଂଗଠନ (SCO) ଗୃହମନ୍ତ୍ରୀଙ୍କ ବୈଠକ ସମୟରେ ଏହି ଚୁକ୍ତି ସ୍ବାକ୍ଷରିତ ହୋଇଥିଲା। ପାକିସ୍ତାନର ଗୃହମନ୍ତ୍ରୀ କହିଛନ୍ତି ଯେ ଉଭୟ ରାଷ୍ଟ୍ର ଅବୈଧ ପ୍ରବାସୀ ଏବଂ ନିଶା କାରବାର ରୋକିବାରେ ସହଯୋଗ କରିବାକୁ ରାଜି ହୋଇଛନ୍ତି।
ପାକିସ୍ତାନର ଗୃହମନ୍ତ୍ରୀ ମୋହସିନ ନକଭି ବିଶକେକରେ ଅନୁଷ୍ଠିତ SCO ବୈଠକରେ ଯୋଗ ଦେଇଥିଲେ, ଯେତେବେଳେ ରୁଷର ପ୍ରତିନିଧିତ୍ୱ କରିଥିଲେ ଭ୍ଲାଦିମିର କୋଲୋକୋଲସେଭ। ଦୁଇ ଦେଶ ମଧ୍ୟରେ ଚୂଡ଼ାନ୍ତ ହୋଇଥିବା ଚୁକ୍ତିନାମାରେ ଅବୈଧ ପ୍ରବାସୀଙ୍କୁ ଦେଶାନ୍ତର, ଅନୁପ୍ରବେଶ ରୋକିବା ଏବଂ ନିଶା କାରବାର ବିରୋଧରେ କାର୍ଯ୍ୟାନୁଷ୍ଠାନ ଅନ୍ତର୍ଭୁକ୍ତ।
ଏହି ଚୁକ୍ତିନାମା ପରେ, ଉଭୟ ରାଷ୍ଟ୍ର ନିଜ ନିଜ ଅଞ୍ଚଳରେ ଅବୈଧ ଭାବରେ ରହୁଥିବା ନାଗରିକମାନଙ୍କୁ ଚିହ୍ନଟ ଏବଂ ପ୍ରତ୍ୟାବର୍ତ୍ତନରେ ପରସ୍ପରକୁ ସହାୟତା କରିବେ। ସେମାନେ ଅବୈଧ ପ୍ରବାସୀ ରୋକିବା ଏବଂ ଅନୁପ୍ରବେଶ ରୋକିବା ପାଇଁ ସହଯୋଗ ବୃଦ୍ଧି କରିବେ। ଏହା ସହିତ, ନିଶା କାରବାର ମୁକାବିଲା ପାଇଁ ମିଳିତ ପଦକ୍ଷେପ ନିଆଯିବ।
ଗତ ବର୍ଷ ଜୁଲାଇରେ, ପାକିସ୍ତାନ କରାଚୀସ୍ଥିତ ପାକିସ୍ତାନ ଷ୍ଟିଲ ମିଲ୍ସ (PSM)କୁ ପୁନରୁଦ୍ଧାର କରିବା ପାଇଁ ରୁଷିଆ ସହିତ ଆଉ ଏକ ଗୁରୁତ୍ୱପୂର୍ଣ୍ଣ ଚୁକ୍ତିନାମା ସ୍ବାକ୍ଷର କରିଥିଲା। ଏହି ଚୁକ୍ତିନାମା ମସ୍କୋର ପାକିସ୍ତାନୀ ଦୂତାବାସରେ ସମ୍ପନ୍ନ ହୋଇଥିଲା। ପାକିସ୍ତାନ ଷ୍ଟିଲ ମିଲ୍ସ (PSM) ମୂଳତଃ 1973 ମସିହାରେ ସୋଭିଏତ ୟୁନିଅନ ସହାୟତାରେ ପ୍ରତିଷ୍ଠିତ ହୋଇଥିଲା। ଏହି ଚୁକ୍ତିର ଉଦ୍ଦେଶ୍ୟ ହେଉଛି 2027 ସୁଦ୍ଧା ମିଲ ପୁନଃଆରମ୍ଭ କରିବା।
ଶେହବାଜ ସରିଫଙ୍କ ନିକଟତର ହେବା ପାଇଁ ପୁଟିନଙ୍କ ପଦକ୍ଷେପ ଏକ ଗଣିତ ରଣନୀତିର ଅଂଶ। ଏହା ପଛରେ ମୁଖ୍ୟ କାରଣଗୁଡ଼ିକ ହେଉଛି ରୁଷିଆ ଅର୍ଥନୀତି ପାଇଁ ନୂତନ ବଜାର ଖୋଜିବା – ଯାହା ପାଶ୍ଚାତ୍ୟ ପ୍ରତିବନ୍ଧକ ସହିତ ସଂଘର୍ଷ କରୁଛ, ଦକ୍ଷିଣ ଏସିଆରେ ପ୍ରଭାବ ବିସ୍ତାର କରିବା ଏବଂ ପାକିସ୍ତାନକୁ ସମ୍ପୂର୍ଣ୍ଣ ଭାବରେ ଚାଇନା ପ୍ରଭାବ ତଳେ ପଡ଼ିବାରୁ ରୋକିବା। ପୁଟିନ ସମ୍ପ୍ରତି ମନ୍ତବ୍ୟ ଦେଇଛନ୍ତି ଯେ ପାକିସ୍ତାନ ଏକ ଛୋଟ ଦେଶ ନୁହେଁ ଏବଂ ସମ୍ପୂର୍ଣ୍ଣ ଭାବରେ ଚାନା ନିୟନ୍ତ୍ରଣରେ ନାହିଁ।
