ଥୁଆମୂଳ ରାମପୁର, ୯।୬(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅନ୍ତର୍ଗତ ମହୁଲପାଟଣା ପଞ୍ଚାୟତର କାଦୋବେଡା ଗ୍ରାମରେ ସୋମବାର ସମୟରେ ଏକ ସଂଘାତିକ ଅଗ୍ନିକାଣ୍ଡ ଘଟିଯାଇଛି। ଗ୍ୟାସ ସିଲିଣ୍ଡର ଲିକେଜ୍ ଯୋଗୁ ଏହି ଦୁର୍ଘଟଣା ଘଟିଥିବା ନେଇ ଅଗ୍ନିଶମ ବିଭାଗ ପ୍ରାଥମିକ ସନ୍ଦେହ ପ୍ରକଟ କରିଛି। ଏହି ଅଗ୍ନିକାଣ୍ଡରେ ସ୍ଥାନୀୟ ବାସିନ୍ଦା ସତ୍ୟଭାମା ଦାସ ଓ ସ୍ୱାମୀ ସ୍ୱର୍ଗତ ବିଜୟ କୁମାର ଦାସଙ୍କ ଯୌଥ ପରିବାର ସର୍ବସ୍ୱ ହରାଇଛନ୍ତି। ସତ୍ୟଭାମା ଦାସଙ୍କ ଦୁଇ ବିବାହିତ ପୁଅ ଓ ସେମାନଙ୍କ ପରିବାର ଏହି ଗୋଟିଏ ଘରେ ଏକତ୍ର ରହୁଥିଲେ।
ଅଗ୍ନିଶମ ବିଭାଗର ସୂଚନା ଅନୁଯାୟୀ ଏହି ଦୁର୍ଘଟଣାରେ ପରିବାରର ୩ ବଖରା ଘର ସମ୍ପୂର୍ଣ୍ଣ ଜଳି ପାଉଁଶ ହୋଇଯାଇଛି। ଏହା ସହିତ ପାଖରେ ଥିବା ତାଙ୍କର ଆଉ ଏକ ଘର ମଧ୍ୟ ବ୍ୟାପକ ଭାବେ କ୍ଷୟକ୍ଷତି ହୋଇଛି। ଘରେ ଗଚ୍ଛିତ ଥିବା ଧାନ, ଚାଉଳ, ଆସବାବପତ୍ର, ପୋଷାକ ଏବଂ ଜରୁରୀ କାଗଜପତ୍ର ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ବେଳେ ସୌଭାଗ୍ୟବଶତଃ ଏଥିରେ କୌଣସି ଜୀବନହାନି ଘଟିନାହିଁ।
ଘଟଣାର ଖବର ପାଇ ହାବିଲଦାର ବନମାଳୀ ପୂଜାରୀଙ୍କ ନିର୍ଦ୍ଦେଶରେ ହାବିଲଦାର ରଞ୍ଜିତ ସେଠୀ, ଅଭିଳାଷ କିସାନ, ଫାୟାରମ୍ୟାନ୍ ଦିବ୍ୟରଞ୍ଜନ ସାହୁ, ରଜତ କୁମ୍ଭାର ବରାଳ, ଶାନ୍ତନୁ ଦିଗାଲ ଏବଂ ସାରା ଇସଲାମ ତୁରନ୍ତ ଗାଡ଼ି ସହ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଫଳରେ ନିଆଁ ପଡ଼ୋଶୀ ଅନ୍ୟ ଘରଗୁଡ଼ିକୁ ବ୍ୟାପିବାରୁ ରକ୍ଷା ପାଇଥିଲା। ଅଗ୍ନିକାଣ୍ଡ ପରେ ସ୍ଥାନୀୟ ସରପଞ୍ଚ ରତନୀ ମାଝୀ ତୁରନ୍ତ ଘଟଣାସ୍ଥଳରେ ପହଞ୍ଚି ବିପନ୍ନ ପରିବାରକୁ ଜରୁରୀ ରାସନ୍ ସାମଗ୍ରୀ ବଣ୍ଟନ କରିଛନ୍ତି। ଏହାସହ ସମସ୍ତ ପ୍ରକାର ସରକାରୀ ସହାୟତା ଯୋଗାଇ ଦେବା ପାଇଁ ପ୍ରଶାସନକୁ ଅବଗତ କରାଇବେ ବୋଲି ସେ ପ୍ରତିଶ୍ରୁତି ଦେଇଛନ୍ତି।
ଅପରପକ୍ଷରେ, ସରକାରୀ ସହାୟତା ଓ କ୍ଷୟକ୍ଷତି ଆକଳନ ନେଇ ସ୍ଥାନୀୟ ତହସିଲଦାର ସତ୍ୟ ସନାତନ ପାଣିଗ୍ରାହୀ କିମ୍ବା ଆଞ୍ଚଳିକ ରାଜସ୍ୱ ନିରୀକ୍ଷକଙ୍କ ଠାରୁ କୌଣସି ପ୍ରତିକ୍ରିୟା ମିଳିପାରି ନାହିଁ। ସର୍ବସ୍ୱ ହରାଇଥିବା ଏହି ପରିବାରକୁ ତୁରନ୍ତ ଗୃହ ନିର୍ମାଣ ଅନୁଦାନ ଓ ଆର୍ଥିକ ସହାୟତା ଯୋଗାଇ ଦେବାକୁ ସ୍ଥାନୀୟ ବାସିନ୍ଦା ଓ ବୁଦ୍ଧିଜୀବୀମାନେ ଦୃଢ଼ ଦାବି କରିଛନ୍ତି।
