ନୂଆଦିଲ୍ଲୀ,୯ା୬(ପି.ଟି.): ଦୁଇଜଣ ଅବିବାହିତ ପ୍ରାପ୍ତବୟସ୍କଙ୍କ ମଧ୍ୟରେ ସହମତିରେ ଶାରୀରିକ ସମ୍ପର୍କକୁ ଦୁଶ୍ଚରିତ୍ର କୁହାଯାଇପାରିବ ନାହିଁ ବୋଲି ସୁପ୍ରିମକୋର୍ଟ କହିଛନ୍ତି। ତେଲଙ୍ଗାନା ରାଜ୍ୟସ୍ତରୀୟ ପୋଲିସ ନିଯୁକ୍ତି ପରୀକ୍ଷାରେ ଜଣେ କନ୍ଷ୍ଟେବଲ ପଦବୀ ପାଇଁ ଚୟନ ହୋଇଥିବାବେଳେ ବିଫଳ ପ୍ରେମ ସମ୍ପର୍କକୁ ନେଇ ତାଙ୍କ ନାମରେ ଆପରାଧିକ ମାମଲା ଥିବାରୁ ତାଙ୍କ ନିଯୁକ୍ତିକୁ ଖାରଜ କରିଦିଆଯାଇଥିଲା। ସେ ଏହାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ। ଜଷ୍ଟିସ୍ ମନମୋହନ ଏବଂ ମନୋଜ ମିଶ୍ରାଙ୍କ ଖଣ୍ଡପୀଠ ଉକ୍ତ ପିଟିଶନ୍ର ଶୁଣାଣି କରି ସମ୍ପୃକ୍ତ ଯୁବକଙ୍କୁ ନିଯୁକ୍ତି ପ୍ରଦାନ ଲାଗି ତେଲଙ୍ଗାନା ରାଜ୍ୟସ୍ତରୀୟ ପୋଲିସ ନିଯୁକ୍ତି ବୋର୍ଡକୁ ନିର୍ଦ୍ଦେଶ ଦେଇଛନ୍ତି। ଏହି ଅବସରରେ ଖଣ୍ଡପୀଠ କହଛନ୍ତି, ୨ ଜଣ ସହମତ ଥିବା ଅବିବାହିତ ପ୍ରାପ୍ତବୟସ୍କ ବ୍ୟକ୍ତିଙ୍କ ମଧ୍ୟରେ ଶାରୀରିକ ସମ୍ପର୍କକୁ ନେଇ ସେମାନଙ୍କ ଚରିତ୍ର ଉପରେ କୌଣସି ପ୍ରଶ୍ନ ଉଠାଯାଇପାରିବ ନାହିଁ ଏବଂ ଏହା ଉଠିବା ଉଚିତ ନୁହେଁ। ଏଭଳି ସମ୍ପର୍କ ରଖିବା ପାଇଁ କୌଣସି ଆଇନ ମନା କରିନାହିଁ। ପ୍ରାପ୍ତବୟସ୍କ ବ୍ୟକ୍ତି ନିଜ ପସନ୍ଦରେ ସମ୍ପର୍କ ବାଛିପାରିବେ ବୋଲି ଖଣ୍ଡପୀଠ କହିଛନ୍ତି। ତେଲଙ୍ଗାନା ହାଇକୋର୍ଟର ଜଣିକିଆ ଖଣ୍ଡପୀଠ ଷ୍ଟାଇପେଣ୍ଡାରି କ୍ୟାଡେଟ ଟ୍ରେନି ପୋଲିସ କନ୍ଷ୍ଟେବଲ୍ ପଦବୀରେ ନିଯୁକ୍ତି ସମ୍ପର୍କରେ ପୁନର୍ବିଚାର କରିବାକୁ ଦେଇଥିବା ନିର୍ଦ୍ଦେଶକୁ ସର୍ବୋଚ୍ଚ ଅଦାଲତ କାଏମ ରଖିଛନ୍ତି।
ସୂଚନାଯୋଗ୍ୟ, ଉକ୍ତ ଯୁବକ ଜଣେ ଯୁବତୀଙ୍କୁ ବିବାହର ପ୍ରତିଶ୍ରୁତି ଦେଇ ବଳାତ୍କାର କରିଥିବା ନେଇ ୨୦୧୪ରେ ମାମଲା ରୁଜୁ ହୋଇଥିଲା। ଏହା ଚରିତ୍ରହୀନତା ବୋଲି ଦର୍ଶାଇ ତେଲଙ୍ଗାନା ରାଜ୍ୟସ୍ତରୀୟ ପୋଲିସ ନିଯୁକ୍ତି ବୋର୍ଡ ତାଙ୍କ ନିଯୁକ୍ତିକୁ ବାତିଲ କରିଦେଇଥିଲା। ଜଣେ ପଡୋଶୀ ଯୁବତୀଙ୍କ ସହ ଯୁବକଙ୍କର ୪ ବର୍ଷ ତଳୁ ସମ୍ପର୍କ ରହିଥିଲା ଓ କୌଣସି କାରଣରୁ ତିକ୍ତତା ଦେଖାଦେବାରୁ ଯୁବତୀ ତାଙ୍କ ବିରୋଧରେ ବଳାତ୍କାର ଅଭିଯୋଗ ଆଣିଥିଲେ। ୨୦୧୫ରେ ଏକ ଲୋକ ଅଦାଲତରେ ଉଭୟ ପକ୍ଷଙ୍କ ସହମତିରେ ମାମଲାର ସମାଧାନ ହୋଇଥିଲା। ଯୁବକଙ୍କ ବିରୋଧରେ ଆଇପିସିର ଧାରା ୩୭୬ ଲାଗୁ ହୋଇ ନ ଥିଲା। ଏହାକୁ ଆଧାର କରି ସର୍ବୋଚ୍ଚ ଅଦାଲତ ଯୁବକଙ୍କୁ ନିଯୁକ୍ତି ଦେବା ପାଇଁ ନିର୍ଦ୍ଦେଶ ଦେଇଛନ୍ତି।
nbsp;
