ଢେଙ୍କାନାଳ ଅଫିସ, ୨୯।୮- ୫୫ନଂ. ଜାତୀୟ ରାଜପଥ ସମ୍ପ୍ରସାରଣରେ ହୋଇଥିବା ଜମି ଅଧିଗ୍ରହଣ ବାବଦ କ୍ଷତିପୂରଣ ପ୍ରଦାନ ଲାଗି ଦିଆଯାଇଥିବା ପ୍ରସ୍ତାବରେ ସାଂଘାତିକ ତ୍ରୁଟି ହୋଇଛି। ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ମେରାମଣ୍ଡଳୀସ୍ଥିତ ଗାୟତ୍ରୀ ଆଶ୍ରମ ଉଚ୍ଛେଦ ସମ୍ପର୍କିତ କ୍ଷତିପୂରଣ ଆକଳନ ମୂଲ୍ୟ ୩.୯୦ ଲକ୍ଷ ଟଙ୍କା ଥିବାବେଳେ କ୍ଷତିଗ୍ରସ୍ତ ଜମି ମାଲିକଙ୍କୁ ୧୮ ଲକ୍ଷ ଟଙ୍କା ପ୍ରଦାନ କରିବାକୁ ପ୍ରସ୍ତାବ ଦିଆଯାଇଛି। ଜିଲା ପ୍ରଶାସନ ପକ୍ଷରୁ ତଦନ୍ତ କରାଯିବା ପରେ ଏହା ଧରାପଡ଼ିଛି। ଏହାର ସ୍ପଷ୍ଟୀକରଣ ରଖିବାକୁ ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ ପ୍ରକଳ୍ପ ନିର୍ଦ୍ଦେଶକ (ଏନ୍ଏଚ୍ଏଆଇ ପିଡି)ଙ୍କୁ ଜିଲାପାଳ ଭୂମେଶ ଚନ୍ଦ୍ର ବେହେରା ଚିଠି ଲେଖିଛନ୍ତି। ଏହାପରେ ବିବାଦ ମଧ୍ୟକୁ ଟାଣିହୋଇ ଆସିଛନ୍ତି ଏନ୍ଏଚ୍ଏଆଇର ପଦସ୍ଥ ଅଧିକାରୀ। ଅନ୍ୟପଟେ ଉଚ୍ଛେଦଜନିତ କ୍ଷତିପୂରଣ ଦାବିରେ ଆମରଣ ଅନଶନରେ ବସିଥିବା ଆଶ୍ରମ ପ୍ରତିଷ୍ଠାତା ପଣ୍ଡିତ ଭାସ୍କର ଜୀଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଯିବାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ସୂଚନାଯୋଗ୍ୟ, ୫୫ନଂ. ଜାତୀୟ ରାଜପଥ ସମ୍ପ୍ରସାରଣ ସମୟରେ ଗାୟତ୍ରୀ ଆଶ୍ରମର ଦୁଇଟି ଘର, ଗେଟ୍, ପାଚେରି ସମେତ ଅନ୍ୟ କିଛି ନିର୍ମାଣ ଉଚ୍ଛେଦ କରାଯାଇଥିଲା। ଉକ୍ତ ସମୟରେ ଆଶ୍ରମର କିଛି ଅଞ୍ଚଳ ଜବରଦଖଲରେ ଥିବା ଏନ୍ଏଚ୍ଏଆଇ ପକ୍ଷରୁ କୁହାଯାଇଥିଲା। ଏ ନେଇ ଆଶ୍ରମ ପ୍ରତିଷ୍ଠାତା ପଣ୍ଡିତ ଭାସ୍କର ଜୀଙ୍କ ସ୍ତ୍ରୀ ପ୍ରମିଳା ଦେବୀଙ୍କ ନାମରେ ନଂ.୧୪୦/୨୦୦୭-୦୮ରେ ଏନ୍କ୍ରୋଚମେଣ୍ଟ କେସ୍ କରାଯାଇଥିଲା। ଏ ବାବଦ ଜରିମାନା ଆଦାୟ ଲାଗି ଆକଳନ ମଧ୍ୟ ହୋଇଥିଲା। ଏସବୁ ଆଶ୍ରମ ପ୍ରତିଷ୍ଠାତାଙ୍କ ଜାଣତରେ ହୋଇଥିଲା। ଅନ୍ୟପଟେ ଆଇନତଃ ସିଦ୍ଧ ଅର୍ଥାତ୍ ଅଭିଯୋଗକାରୀଙ୍କ ସ୍ବତ୍ୱ ଥିବା ଜମିର ମୂଲ୍ୟାଙ୍କନ କରାଯାଇ କ୍ଷତିପୂରଣ ବାବଦକୁ ୩,୯୦,୭୧୯ ଟଙ୍କା ଦେବାକୁ ଏନ୍ଏଚ୍ଏଆଇ ନିର୍ବାହୀ ଯନ୍ତ୍ରୀ ଆକଳନ କରିଥିଲେ। ହେଲେ ଅଧିଗ୍ରହଣଜନିତ କ୍ଷତିପୂରଣ ବାବଦକୁ ୧୮ ଲକ୍ଷ ଟଙ୍କା ପ୍ରଦାନ କରିବାକୁ ପ୍ରସ୍ତାବ ଦିଆଯାଇଛି, ଯାହାକୁ ନେଇ ବିବାଦର ସୂତ୍ରପାତ ହୋଇଛି। ଏହାକୁ ନେଇ ପଣ୍ଡିତ ଭାସ୍କର ଜୀ ଗତ ଅଗଷ୍ଟ ୨୦ରୁ ଜିଲାପାଳଙ୍କ କାର୍ଯ୍ୟାଳୟ ଆଗରେ ଆମରଣ ଅନଶନରେ ବସିଥିଲେ। ମଙ୍ଗଳବାର ସ୍ବାସ୍ଥ୍ୟରେ ଅବନତି ହେବାରୁ ତାଙ୍କୁ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।
ଏହାପରେ ଅତିରିକ୍ତ ଜିଲାପାଳ ଭବେଶ କୁମାର ନାୟକଙ୍କ ନିର୍ଦ୍ଦେଶରେ ଓଡ଼ାପଡ଼ା ତହସିଲଦାର, ମୋଟଙ୍ଗା ଥାନାଧିକାରୀ, ଜାତୀୟ ରାଜପଥ ଡିଭିଜନର ଜଣେ ସହକାରୀ ଯନ୍ତ୍ରୀ ଏହାର ତଦନ୍ତ କରିଛନ୍ତି। ରେକର୍ଡପତ୍ର ଯାଞ୍ଚବେଳେ ଏନ୍ଏଚ୍ଏଆଇ ପକ୍ଷରୁ ତ୍ରୁଟି ହୋଇଥିବା ସ୍ପଷ୍ଟ ହୋଇଛି। କେଉଁ ପରିସ୍ଥିତିରେ ଆଶ୍ରମ ମାଲିକଙ୍କୁ ଏତେ ଟଙ୍କା କ୍ଷତିପୂରଣ ଦେବାକୁ ପ୍ରସ୍ତାବ ଦିଆଗଲା ସେ ନେଇ ସ୍ପଷ୍ଟୀକରଣ ଲୋଡ଼ିଛନ୍ତି ଜିଲାପାଳ। ଏ ସଂକ୍ରାନ୍ତରେ ମତ ଉପସ୍ଥାପନ କରିବାକୁ ଜିଲାପାଳ ପତ୍ର ନଂ. ୮୦୨/୨୬.୦୮.୨୦୧୯ରେ ଢେଙ୍କାନାଳସ୍ଥିତ ଏନ୍ଏଚ୍ଏଆଇ ପ୍ରକଳ୍ପ ନିର୍ଦ୍ଦେଶକଙ୍କୁ ଚିଠି ଲେଖି ଜଣାଇଛନ୍ତି। ଢେଙ୍କାନାଳ ଏସ୍ପି, ଉପଜିଲାପାଳ, ଭିଜିଲାନ୍ସ ଡିଏସ୍ପି, ଓଡ଼ାପଡ଼ା ତହସିଲଦାର, ସଦର ଏସ୍ଡିପିଓ, ମୋଟଙ୍ଗା ଥାନାଧିକାରୀ, ଟାଉନ ଥାନାଧିକାରୀଙ୍କୁ ମଧ୍ୟ ସମସ୍ତ ଘଟଣା ସମ୍ପର୍କରେ ଅବଗତ କରାଯାଇଥିବା ଜଣାପଡ଼ିଛି।
