ବେଜିଂ,୨୯।୫: ସେପ୍ଟେମ୍ବର ୨୦୨୫ ରେ ବେଜିଂରୁ ସାମ୍ନାକୁ ଆସିଥିବା ଶି ଜିନପିଙ୍ଗ ଏବଂ ଭ୍ଲାଦିମିର ପୁଟିନଙ୍କ ଏକ ଲିକ ଅଡିଓ, ଆୟୁଷ ବଢ଼ାଇବା ବିଷୟକୁ ନେଇ ସାରା ବିଶ୍ୱରେ ଏକ ନୂଆ ବିତର୍କ ସୃଷ୍ଟି କରିଛି । ପ୍ରଶ୍ନ ଉଠିବାକୁ ଲାଗିଛି ଯେ, ମଣିଷ କଣ ଏମିତି କୌଣସି ପରୀକ୍ଷଣ କରିପାରିବ, ଯାହା ଦ୍ୱାରା ସାଧାରଣ ନାଗରିକଙ୍କ ଆୟୁଷ ବଢ଼ାଯାଇପାରିବ । ପ୍ରକୃତରେ, ଚାଇନା ରାଷ୍ଟ୍ରପତି ଶି ଜିନପିଙ୍ଗ ଏବଂ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ଏହି କଥାବାର୍ତ୍ତା ଚାଲିଥିଲା ଯେ ମଣିଷର ଆୟୁଷକୁ ୧୫୦ ବର୍ଷ ପର୍ଯ୍ୟନ୍ତ ବଢ଼ାଯାଇପାରିବ । ଏହା ପରେ ଏହି ଚର୍ଚ୍ଚା ମଧ୍ୟ ଜୋର ଧରିଛି ଯେ, କଣ ପୁଟିନ ଏବଂ ଜିନପିଙ୍ଗ ନିଜେ ୧୫୦ ବର୍ଷ ପର୍ଯ୍ୟନ୍ତ ବଞ୍ଚିବାକୁ ଚାହୁଁଛନ୍ତି?
ଏବେ ରୁଷିଆର ରାଷ୍ଟ୍ରପତି କାର୍ଯ୍ୟାଳୟ ‘କ୍ରେମଲିନ’ରୁ ଯେଉଁ ନୂଆ ସୂଚନା ଆସିଛି, ସେହି ଅନୁଯାୟୀ ରୁଷିଆ ରାଷ୍ଟ୍ରପତିଙ୍କ ବାସଭବନ ଆୟୁଷ ବଢ଼ାଇବାର ଉପାୟ ଖୋଜିବା ପାଇଁ ଏକ ଗବେଷଣା (Research) କରାଉଛି । ଏହି ଗବେଷଣା ପାଇଁ ୨୬ ଅରବ ଡଲାର (ପ୍ରାୟ ୨୫୦୦ ଅରବ ଟଙ୍କା) ଖର୍ଚ୍ଚ କରିବାକୁ ପ୍ରସ୍ତୁତି ଚାଲିଛି । ‘ଦି ୱାଲ ଷ୍ଟ୍ରିଟ ଜର୍ଣ୍ଣାଲ’ (The Wall Street Journal) ନିଜ ରିପୋର୍ଟରେ ଏହି ସୂଚନା ଦେଇଛି ।
ରିପୋର୍ଟ ଅନୁସାରେ, ରାଷ୍ଟ୍ରପତି ପୁଟିନ ନିଜେ ଏହି ବୈଜ୍ଞାନିକ ପ୍ରୋଜେକ୍ଟର ତଦାରଖ କରୁଛନ୍ତି । ଅନ୍ୟପଟେ, ଏହି ପ୍ରୋଜେକ୍ଟର ନେତୃତ୍ୱ ପୁଟିନଙ୍କ ଝିଅ ମାରିଆ ଭୋରୋଣ୍ଟସୋଭା (ଏଣ୍ଡୋକ୍ରିନୋଲୋଜିଷ୍ଟ) ଏବଂ ରୁଷିଆର କୁରଚାତୋଭ ଇନଷ୍ଟିଚ୍ୟୁଟର ମୁଖ୍ୟ ମିଖାଇଲ କୋଭାଲଚୁକ କରୁଛନ୍ତି ।
୨୦୨୪ ରେ ରୁଷିଆର ବୈଜ୍ଞାନିକମାନେ ଏହି ପ୍ରୋଜେକ୍ଟ ଉପରେ କାମ ଆରମ୍ଭ କରିଥିଲେ। ଏହାର ଆରମ୍ଭ ବହୁତ ଧିମା ଥିଲା, କିନ୍ତୁ ଏବେ ଏହି ପ୍ରୋଜେକ୍ଟର ଗତି ବଢ଼ିଯାଇଛି । ଏହି ପ୍ରୋଜେକ୍ଟ ଅଧୀନରେ ୩ଟି ମୁଖ୍ୟ କାମ କରାଯାଉଛି-
୧.ଜିନ ଥେରାପି ଜରିଆରେ ସେଲୁଲାର୍ ଏଜେଇଞ୍ଜ (Cellular ageing – କୋଷଗୁଡ଼ିକର ବୁଢ଼ା ହେବା ପ୍ରକ୍ରିୟା) କୁ ଧିମା କରିବା । ଏହି ଥେରାପି ସାହାଯ୍ୟରେ ବାର୍ଦ୍ଧକ୍ୟ ବା ବୁଢ଼ାପଣ ବଢ଼ାଉଥିବା ଜିନ୍କୁ ନଷ୍ଟ କରିବାକୁ ଚେଷ୍ଟା କରାଯାଉଛି ।
୨. ୩D ବାୟୋପ୍ରିଣ୍ଟିଂ (3D Bioprinting): ୩D ବାୟୋପ୍ରିଣ୍ଟିଂ ପ୍ରୋସେସ ମାଧ୍ୟମରେ ଖରାପ ହୋଇଯାଇଥିବା ମାନବ ଅଙ୍ଗକୁ ପୁଣି ଥରେ ପ୍ରସ୍ତୁତ କରିବା । ପୁଟିନଙ୍କ କହିବା କଥା ଥିଲା ଯେ ଯଦି ଶରୀରର ଅଙ୍ଗଗୁଡ଼ିକୁ ବଦଳାଇ ଦିଆଯାଏ, ତେବେ ଆୟୁଷ ବଢ଼ିପାରିବ ।
୩. ପଶୁଙ୍କ ଶରୀରରେ ମାନବ ଅଙ୍ଗର ବିକାଶ: ଜିନ-ମ୍ୟାଚ୍ଡ (Gene-matched) ଛୋଟ ଘୁଷୁରିମାନଙ୍କ ଶରୀରରେ ମାନବ ଅଙ୍ଗର ବିକାଶ କରି ଏହି ପରୀକ୍ଷଣକୁ ସଫଳ କରିବାକୁ ଚେଷ୍ଟା କରାଯାଉଛି । ରୁଷିଆର ବୈଜ୍ଞାନିକମାନେ ଦାବି କରିଛନ୍ତି ଯେ, ସେମାନେ ମୂଷାର ଥାଇରଏଡ ଗ୍ଲାଣ୍ଡ ଏବଂ ମଣିଷର କାର୍ଟିଲେଜ ଟିସୁ (Cartilage tissue) ବାୟୋପ୍ରିଣ୍ଟ କରିସାରିଛନ୍ତି । ରୁଷିଆର ବୈଜ୍ଞାନିକମାନେ ଆଶା ରଖିଛନ୍ତି ଯେ ଏହି ପ୍ରକ୍ରିୟା ୨୦୩୦ ମସିହା ସୁଦ୍ଧା ସମ୍ପୂର୍ଣ୍ଣ ହୋଇଯିବ ।
