ଢାକା, ୨୯ା୫ (ପି.ଟି.):ବାଂଲାଦେଶରେ ଏକ ରୋଚକ ଘଟଣା ସାମ୍ନାକୁ ଆସିଛି। ଇଦ୍ ପର୍ବ ଅବସରରେ ବଳି (କୁରବାନୀ) ପାଇଁ ପ୍ରସ୍ତୁତ ହୋଇଥିବା ‘ଡୋନାଲ୍ଡ ଟ୍ରମ୍ପ’ ନାମକ ବିରଳ ଆଲବିନୋ (ଧଳା) ମଇଁଷିକୁ ପ୍ରଶାସନ ପକ୍ଷରୁ ଉଦ୍ଧାର କରାଯାଇଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଭଳି ଚମତ୍କାର ସୁନେଲୀ ରଙ୍ଗର କେଶ ଥିବାରୁ ଏହି ମଇଁଷିର ନାମ ‘ଡୋନାଲ୍ଡ ଟ୍ରମ୍ପ୍’ ରଖାଯାଇଥିଲା। ସରକାରୀ ନିର୍ଦ୍ଦେଶକ୍ରମେ ଏହି ବିରଳ ପ୍ରାଣୀକୁ ବଳିରୁ ରକ୍ଷା କରାଯାଇ ଢାକାସ୍ଥିତ ଜାତୀୟ ଚିଡ଼ିଆଖାନାରେ ସଂରକ୍ଷିତ ରଖିବାକୁ ନିଷ୍ପତ୍ତି ନିଆଯାଇଛି।
ପୋଲିସ ସୂଚନା ଅନୁଯାୟୀ, ପ୍ରାୟ ୭୦୦ କିଲୋଗ୍ରାମ ଓଜନର ଏହି ମଇଁଷିକୁ ଗୁରୁବାର ଇଦ୍ ପର୍ବରେ ବଳି ଦିଆଯିବାର ଥିଲା। ମାତ୍ର ଏହାର କିଛି ଘଣ୍ଟା ପୂର୍ବରୁ ସରକାରୀ ନିର୍ଦ୍ଦେଶ ପାଇ ପୋଲିସ ଏହାକୁ ନିଜ ହେପାଜତକୁ ନେଇଥିଲା। ମଇଁଷିର ମାଲିକ ମନିରୁଜ୍ ଜମାନ୍ ଗଣମାଧ୍ୟମକୁ କହିଛନ୍ତି, ‘ବୁଧବାର ଅପରାହ୍ନରେ ପୋଲିସ ଆସି ସରକାର ଏହି ମଇଁଷିକୁ ସଂରକ୍ଷଣ ପାଇଁ ନେଉଥିବା ଜଣାଇଥିଲେ। ଆମେ ସରକାରଙ୍କ ସହ କୌଣସି ବିବାଦ ଚାହୁଁ ନ ଥିବାରୁ ଏହାକୁ ହସ୍ତାନ୍ତର କରିଦେଲୁ।’ ଢାକା ଉପକଣ୍ଠ କେରାଣୀଗଞ୍ଜରେ ରହୁଥିବା ଜମାନ୍ ବଳି ପାଇଁ ମାତ୍ର ତିନି ଦିନ ପୂର୍ବରୁ ଏହି ମଇଁଷିକୁ କିଣିଥିଲେ। ଏହା ବଦଳରେ ସରକାର ତାଙ୍କୁ ଉପଯୁକ୍ତ କ୍ଷତିପୂରଣ କିମ୍ବା ଅନ୍ୟ ଏକ ଗୋରୁ କିମ୍ବା ମଇଁଷି ଯୋଗାଇଦେବେ ବୋଲି ପ୍ରତିଶ୍ରୁତି ଦେଇଛନ୍ତି।
କେରାଣୀଗଞ୍ଜ ଥାନା ଅଧିକାରୀ ରୁହୁଲ କୁଦ୍ଦୁସ କହିଛନ୍ତି, ପ୍ରାଣିସମ୍ପଦ ବିଭାଗର ଅଧିକାରୀଙ୍କ ମତରେ ମଇଁଷିଟି ଅଳ୍ପ ବୟସର ଏବଂ ଏହାକୁ ଆହୁରି ଅନେକ ବର୍ଷ ବଞ୍ଚାଇ ରଖାଯାଇପାରିବ। ଜାତୀୟ ଚିଡ଼ିଆଖାନାର କ୍ୟୁରେଟର ଆତିକୁର ରହମାନ୍ କହିଛନ୍ତି, ଏହି ବିରଳ ମଇଁଷିର ଯତ୍ନ ପାଇଁ ଚିଡ଼ିଆଖାନାରେ ଏକ ସ୍ବତନ୍ତ୍ର ସେଡ୍ ଏବଂ ଜଣେ କେୟାରଟେକର ବ୍ୟବସ୍ଥା କରାଯାଇଛି।
ଉକ୍ତ ମଇଁଷିର ପୂର୍ବତନ ମାଲିକ ତଥା ଆଗ୍ରୋ ଫାର୍ମ ବ୍ୟବସାୟୀ ଜିଆ ଉଦ୍ଦିନ ମିର୍ଧା କହିଛନ୍ତ, ଆମେରିକା ରାଷ୍ଟ୍ରପତିଙ୍କ ଭଳି ସୁନେଲୀ କେଶ ଥିବାରୁ ତାଙ୍କ ଭାଇ ଏହାର ନାମ ‘ଡୋନାଲ୍ଡ ଟ୍ରମ୍ପ୍’ ରଖିଥିଲେ। ବିକ୍ରି ହେବା ପୂର୍ବରୁ ମଧ୍ୟ ଏହାକୁ ଦେଖିବା ପାଇଁ ଫାର୍ମରେ ଲୋକଙ୍କ ପ୍ରବଳ ଭିଡ଼ ହେଉଥିଲା ଏବଂ ସୋସିଆଲ ମିଡିଆରେ ଏହା ବେଶ୍ ଭାଇରାଲ ହୋଇଥିଲା। ଏହାକୁ ଦିନକୁ ଚାରିଥର ଗାଧୋଇବା ଏବଂ ଚାରିଥର ଖାଦ୍ୟର ସ୍ବତନ୍ତ୍ର ବ୍ୟବସ୍ଥା କରାଯାଉଥିଲା।
ସ୍ଥାନୀୟ ଗଣମାଧ୍ୟମ ଅନୁଯାୟୀ, ସୁନେଲୀ କେଶ, କ୍ରିମ୍ ରଙ୍ଗର ଶରୀର ଏବଂ ଗୋଲାପୀ ନାକ ଯୋଗୁ ‘ଟ୍ରମ୍ପ୍’ ଇଦ୍ ବଜାରରେ ଥିବା ବହୁ ହଜାର ପ୍ରାଣୀଙ୍କ ମଧ୍ୟରେ ସବୁଠାରୁ ଆକର୍ଷଣୀୟ ଥିଲା। ସାଧାରଣତଃ ବାଂଲାଦେଶରେ କଳା ରଙ୍ଗର ମଇଁଷି ଦେଖାଯାଉଥିବାରୁ ଏଭଳି ଧଳା ବା ଆଲବିନୋ ମଇଁଷି ଅତ୍ୟନ୍ତ ବିରଳ। ସୂଚନାଯୋଗ୍ୟ, ଚଳିତ ବର୍ଷ ବାଂଲାଦେଶରେ ଇଦ୍ ଅବସରରେ ଗାଈ, ମଇଁଷି ଓ ଛେଳିକୁ ମିଶାଇ ପ୍ରାୟ ୧ କୋଟି ୨୦ ଲକ୍ଷରୁ ଅଧିକ ପ୍ରାଣୀଙ୍କୁ ବଳି ଦିଆଯାଉଛି, ଯାହା ଗରିବ ପରିବାରଗୁଡ଼ିକୁ ମାଂସ ଖାଇବାର ସୁଯୋଗ ଦେଇଥାଏ। ମାତ୍ର ଏହି ସମସ୍ତ ପ୍ରାଣୀଙ୍କ ମଧ୍ୟରୁ କେବଳ ‘ଡୋନାଲ୍ଡ ଟ୍ରମ୍ପ୍’ ନିଜର ସ୍ବତନ୍ତ୍ରତା ପାଇଁ ନୂଆ ଜୀବନ ପାଇବାରେ ସଫଳ ହୋଇଛି।
Dharitri – Odisha’s No.1 Odia Daily
