ନୂଆଦିଲ୍ଲୀ,୨୯।୫: ଘରୋଇ ଏଲ୍ପିଜି (LPG) ସିଲିଣ୍ଡର ବ୍ୟବହାର କରୁଥିବା ଗ୍ରାହକଙ୍କ ପାଇଁ ଏକ ଜରୁରୀ ଖବର। ସାଧାରଣତଃ ଏକ ୧୪.୨ କିଲୋଗ୍ରାମର ଗ୍ୟାସ ସିଲିଣ୍ଡର ଏକ ମଧ୍ୟବିତ୍ତ ପରିବାରରେ ୨୫ରୁ ୩୦ ଦିନ ପର୍ଯ୍ୟନ୍ତ ଚାଲିଥାଏ। ମାତ୍ର ପାର୍ବଣ ଋତୁ, ଶୀତଦିନ କିମ୍ବା ଘରକୁ ଅତିଥି ଆସିବା ଯୋଗୁ ଅନେକ ସମୟରେ ୨୫ ଦିନ ପୂର୍ବରୁ ହିଁ ଗ୍ୟାସ ଶେଷ ହୋଇଯାଏ। ଏଭଳି ସ୍ଥିତିରେ ଗ୍ରାହକମାନେ ଚିନ୍ତାରେ ପଡ଼ିଯାଆନ୍ତି ଯେ ନୂଆ ସରକାରୀ ନିୟମ ଅନୁସାରେ ୨୫ ଦିନ ପୂର୍ବରୁ ଦ୍ୱିତୀୟ ସିଲିଣ୍ଡର ବୁକ କରିହେବ କି ନାହିଁ।
ଯଦି ଆପଣଙ୍କ ଘରେ ମଧ୍ୟ ସମୟ ପୂର୍ବରୁ ଗ୍ୟାସ ସରିଯାଉଛି, ତେବେ ବ୍ୟସ୍ତ ହେବାର ଆବଶ୍ୟକତା ନାହିଁ। କମ୍ପାନୀର ନିୟମ ଏବଂ କିଛି ସହଜ ବିକଳ୍ପକୁ ଆପଣାଇ ଆପଣ ଏହି ସମସ୍ୟାରୁ ମୁକ୍ତି ପାଇପାରିବେ।
ଗ୍ୟାସ ରିଫିଲ୍ ବୁକିଂର ନିୟମ କଣ?
ତେଲ କମ୍ପାନୀଗୁଡ଼ିକର ଗାଇଡ୍ଲାଇନ ଅନୁଯାୟୀ, ଗ୍ରାହକମାନଙ୍କୁ ଗୋଟିଏ ଆର୍ଥିକ ବର୍ଷରେ ମୋଟ ୧୨ଟି ସବ୍ସିିଡିଯୁକ୍ତ ସିଲିଣ୍ଡର ମିଳିଥାଏ।
୧୫ ଦିନର ନିୟମ: ଗ୍ୟାସର କଳାବଜାରୀ ରୋକିବା ପାଇଁ ପୂର୍ବରୁ ଦୁଇଟି ସିଲିଣ୍ଡର ବୁକିଂ ମଧ୍ୟରେ ଅତିକମରେ ୧୫ ଦିନର ବ୍ୟବଧାନ ରହିବା ବାଧ୍ୟତାମୂଳକ ଥିଲା। ଅର୍ଥାତ ସିଲିଣ୍ଡର ନେବାର ୧୫ ଦିନ ପର୍ଯ୍ୟନ୍ତ ଆପଣ ଦ୍ୱିତୀୟ ସିଲିଣ୍ଡର ବୁକ କରିପାରୁ ନ ଥିଲେ।
ନୂଆ ନିୟମରେ କୋହଳ: ବର୍ତ୍ତମାନ ଗ୍ରାହକଙ୍କ ସୁବିଧା ପାଇଁ ଏହି ନିୟମରେ କିଛିଟା କୋହଳ କରାଯାଇଛି। ଯଦି ଆପଣଙ୍କର ଡବଲ ସିଲିଣ୍ଡର କନେକ୍ସନ (DBC) ଅଛି, ତେବେ ବ୍ୟାକଅପ ସହଜ ହୋଇଥାଏ। କିନ୍ତୁ ସିଙ୍ଗଲ କନେକ୍ସନ ଥାଇ ଯଦି ୨୫ ଦିନ ପୂର୍ବରୁ ଗ୍ୟାସ ସରିଯାଏ, ତେବେ ଆପଣ ଗ୍ୟାସ ଏଜେନ୍ସିକୁ ଯାଇ ଉଚିତ କାରଣ ଦର୍ଶାଇ ଅତିରିକ୍ତ ସିଲିଣ୍ଡର ବୁକିଂ ପାଇଁ ଅନୁରୋଧ କରିପାରିବେ।
ସିଙ୍ଗଲ କନେକ୍ସନ ଥିଲେ ଆପଣାନ୍ତୁ ଏହି ୩ଟି ଜରୁରୀ ବିକଳ୍ପ:
ଯଦି ଆପଣଙ୍କ ପାଖରେ ଗୋଟିଏ ବଡ଼ ସିଲିଣ୍ଡର ଅଛି ଏବଂ ହଠାତ ଗ୍ୟାସ ସରିଯାଏ, ତେବେ ଜରୁରୀକାଳୀନ ସ୍ଥିତିରେ ଏହି ୩ଟି ଉପାୟ ଆପଣଙ୍କୁ ବଡ଼ ଆଶ୍ୱସ୍ତି ଦେବ।
୧. ୫ କିଲୋଗ୍ରାମର ’ଛୋଟୁ ସିଲିଣ୍ଡର’ :
ଇଣ୍ଡିଆନ ଅଏଲ (IOCL) ପକ୍ଷରୁ ଗ୍ରାହକଙ୍କ ତୁରନ୍ତ ଆବଶ୍ୟକତା ପାଇଁ ୫ କିଲୋର ’ଛୋଟୁ’ ସିଲିଣ୍ଡର ବଜାରକୁ ଅଣାଯାଇଛି। ଏହାକୁ କିଣିବା ପାଇଁ କୌଣସି ଆଡ୍ରେସ ପ୍ରୁଫ ବା ଲମ୍ବା କାଗଜପତ୍ରର ଆବଶ୍ୟକତା ନାହିଁ। ଆପଣ ନିକଟସ୍ଥ ପେଟ୍ରୋଲ ପମ୍ପ, ଗ୍ୟାସ ବିତରକ କିମ୍ବା ସ୍ବୀକୃତିପ୍ରାପ୍ତ କିରାନା ଦୋକାନକୁ ଯାଇ କେବଳ ଗୋଟିଏ ସରକାରୀ ପରିଚୟପତ୍ର (ID Proof) ଦେଖାଇ ଏହାକୁ ତୁରନ୍ତ କିଣିପାରିବେ।
୨. ଇଣ୍ଡକ୍ସନ କୁକଟପ:
ଆଜିକାଲି ପ୍ରତ୍ୟେକ ରୋଷେଇ ଘରେ ଇଣ୍ଡକ୍ସନ ଚୁଲ୍ଲା ରହିବା ଅତ୍ୟନ୍ତ ଜରୁରୀ ହୋଇପଡ଼ିଛି। ଏହା କମ ବିଦ୍ୟୁତ ଖର୍ଚ୍ଚରେ ଶୀଘ୍ର ରୋଷେଇ କରିଥାଏ। ମୁଖ୍ୟ ସିଲିଣ୍ଡର ଶେଷ ହେବା ସମୟରେ, ନୂଆ ସିଲିଣ୍ଡର ନଆସିବା ପର୍ଯ୍ୟନ୍ତ ଏହା ଚା’, କ୍ଷୀର ଗରମ କରିବା ଠାରୁ ଆରମ୍ଭ କରି ସମ୍ପୂର୍ଣ୍ଣ ରୋଷେଇ କାର୍ଯ୍ୟକୁ ସହଜ କରିଦିଏ।
୩. DBC କନେକ୍ସନକୁ ଅପଗ୍ରେଡ କରନ୍ତୁ:
ସବୁଦିନ ପାଇଁ ଏହି ସମସ୍ୟାରୁ ମୁକ୍ତି ପାଇବାକୁ ହେଲେ ନିଜର ସିଙ୍ଗଲ ସିଲିଣ୍ଡର କନେକ୍ସନକୁ ଡବଲ ସିଲିଣ୍ଡର କନେକ୍ସନ (DBC) ରେ ପରିଣତ କରନ୍ତୁ। ଏଥିପାଇଁ ଗ୍ୟାସ ଏଜେନ୍ସିକୁ ଯାଇ ଏକ ସାଧାରଣ ଫର୍ମ ପୂରଣ କରିବା ସହ ଦ୍ୱିତୀୟ ସିଲିଣ୍ଡରର ସିକ୍ୟୁରିଟି ଡିପୋଜିଟ ରାଶି ଜମା କରିବାକୁ ହେବ। ଏହାଦ୍ୱାରା ଗୋଟିଏ ଗ୍ୟାସ ସରିଲେ ଆପଣ ତୁରନ୍ତ ଦ୍ୱିତୀୟଟି ବ୍ୟବହାର କରିପାରିବେ ଏବଂ ରୋଷେଇ ବନ୍ଦ ହେବାର ଭୟ ରହିବ ନାହିଁ।
ଗ୍ୟାସ ଶୀଘ୍ର ସରିଗଲେ ବ୍ୟସ୍ତ ନ ହୋଇ ଏହି ବ୍ୟାକଅପ୍ ବିକଳ୍ପଗୁଡ଼ିକୁ ପୂର୍ବରୁ ପ୍ରସ୍ତୁତ ରଖିବା ହିଁ ବୁଦ୍ଧିମାନର କାମ।
