ବର୍ତ୍ତମାନ ଏଭଳି ସମୟ ଆସିଛି, ଯେତେବେଳେ ଆମେ ନିଜ ସ୍ବାସ୍ଥ୍ୟ ପ୍ରତି ଅଧିକ ସଚେତନ ରହିବା ନିହାତି ଦରକାର। ଯଦି ଆପଣଙ୍କର ଡାଇବେଟିସ୍ କିମ୍ବା ରକ୍ତଚାପ ପରି ସମସ୍ୟା ରହିଛି, ତେବେ ଅଧିକ ସତର୍କ ରହିବା ଜରୁରୀ। ଏ ନେଇ ପ୍ରଥମେ ନିଜ ଜୀବନଶୈଳୀ ପ୍ରତି ଧ୍ୟାନ ଦିଅନ୍ତୁ। ସବୁବେଳେ ଏକ ବ୍ୟବସ୍ଥିତ ଜୀବନଶୈଳୀ ଆପଣାନ୍ତୁ। ଠିକ୍ ସମୟରେ ଖାଦ୍ୟ ଖାଇବା ସହ ଆବଶ୍ୟକ ମୁତାବକ ପାଣି ପିଅନ୍ତୁ। ଡାଇବେଟିସ୍କୁ ସନ୍ତୁଳିତ ରଖିବା ଲାଗି ଯେଉଁ କଥା ପ୍ରତି ପ୍ରଥମେ ଧ୍ୟାନ ଦେବା ଦରକାର, ତାହା ହେଲା ଖାଦ୍ୟପେୟ। ଡାକ୍ତରଙ୍କ ପରାମର୍ଶ ଅନୁସାରେ ଖାଦ୍ୟ ଖାଆନ୍ତୁ। ତା’ସହ ଠିକ୍ ସମୟରେ ଔଷଧ ଖାଆନ୍ତୁ। ନିୟମିତ ସମୟ ବ୍ୟବଧାନରେ ରକ୍ତରେ ସୁଗାର କେତେ ପରିମାଣରେ ଅଛି ଏବଂ ଡାକ୍ତର ପ୍ରେସ୍କ୍ରିପ୍ସନରେ ଉଲ୍ଲେଖ କରିଥିବା ଆନୁଷଙ୍ଗିକ ପାଥୋଲୋଜିକାଲ ପରୀକ୍ଷା କରାଇ ନେବାକୁ ଭୁଲନ୍ତୁ ନାହିଁ। ଯଦି ଆପଣଙ୍କର ବ୍ଲଡପ୍ରେସର ବା ରକ୍ତଚାପ ଅଛି, ତେବେ ଏହାକୁ ହାଲୁକା ଭାବରେ ନିଅନ୍ତୁ ନାହିଁ। ନିୟମିତ ଔଷଧ ଖାଆନ୍ତୁ। ଯଦି କିଛି ସମସ୍ୟା ଅନୁଭବ କରୁଛନ୍ତି, ତେବେ ବିଳମ୍ବ ନ କରି ଡାକ୍ତରଙ୍କ ସହ ପରାମର୍ଶ କରନ୍ତୁ। କାରଣ ରକ୍ତଚାପ ଦୀର୍ଘଦିନ ଧରି ଏପଟସେପଟ ରହିଲେ ତାହାର ପ୍ରଭାବ ହାର୍ଟ ଏବଂ ମସ୍ତିଷ୍କ ଉପରେ ପଡ଼ିଥାଏ।
