ନୂଆଦିଲ୍ଲୀ,୩୦।୫: ଖୁସି ଖବର! ଇନ୍ଧନ ସଙ୍କଟ ଖୁବ ଶୀଘ୍ର ଶେଷ ହେବାକୁ ଯାଉଛି। ଇରାନ ଏବଂ ଆମେରିକା ମଧ୍ୟରେ ଶାନ୍ତିଚୁକ୍ତିର ସମ୍ଭାବନା ଦ୍ରୁତ ଗତିରେ ବୃଦ୍ଧି ପାଉଛି ଏବଂ ବିଶ୍ୱାସ କରାଯାଉଛି ଯେ ଉଭୟ ଦେଶ ଖୁବ ଶୀଘ୍ର କୌଣସି ଏକ ନିଷ୍ପତ୍ତିରେ ପହଞ୍ଚିବେ। ଏହି ଚୁକ୍ତିର ଖୁସି ଅଶୋଧିତ ତୈଳ (କ୍ରୁଡ ଅଏଲ) ମୂଲ୍ୟ ଉପରେ ମଧ୍ୟ ଦେଖିବାକୁ ମିଳୁଛି, ଯାହା ଶନିବାର ସକାଳେ ହ୍ରାସ ପାଇ ୬ ସପ୍ତାହ ଅର୍ଥାତ୍ ଦେଢ଼ ମାସର ସର୍ବନିମ୍ନ ସ୍ତରକୁ ଚାଲିଆସିଛି। ଆଶା କରାଯାଉଛି ଯେ ବର୍ତ୍ତମାନ ହର୍ମୁଜ ପ୍ରଣାଳୀ (Strait of Hormuz) ରାସ୍ତା ପୁଣି ଥରେ ଖୋଲାଯାଇପାରେ ଏବଂ ଇନ୍ଧନ ବୋଝେଇ ଭାରତୀୟ ଜାହାଜଗୁଡ଼ିକ ଦ୍ରୁତ ଗତିରେ ଗତି କରିବା ଆରମ୍ଭ କରିବେ। ଏହାଦ୍ୱାରା ଦେଶରେ ସୃଷ୍ଟି ହୋଇଥିବା କ୍ରୁଡ ଓ ଗ୍ୟାସ ସଙ୍କଟ ମଧ୍ୟ ଖୁବ ଶୀଘ୍ର ଦୂର ହୋଇଯିବ।
ଗ୍ଲୋବାଲ ମାର୍କେଟରେ ଆଜି ଅଶୋଧିତ ତୈଳ ମୂଲ୍ୟରେ ୨ ପ୍ରତିଶତରୁ ଅଧିକ ହ୍ରାସ ଦେଖିବାକୁ ମିଳୁଛି। WTI ର ମୂଲ୍ୟ ହ୍ରାସ ପାଇ ବ୍ୟାରେଲ ପିଛା $୮୭.୩୬ ଡଲାରରେ ପହଞ୍ଚିଥିବା ବେଳେ ବ୍ରେଣ୍ଟ କ୍ରୁଡ ମୂଲ୍ୟ ମଧ୍ୟ ବ୍ୟାରେଲ ପିଛା $୯୧.୧୨ ଡଲାରରେ କାରବାର ହେଉଛି। ଏହା ଗତ ୬ ସପ୍ତାହ ମଧ୍ୟରେ ସବୁଠାରୁ ସର୍ବନିମ୍ନ ସ୍ତର। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ସଙ୍କେତ ଦେଇଛନ୍ତି ଯେ ଇରାନ ସହ ଶାନ୍ତି ଚୁକ୍ତି ପାଇଁ ଚୂଡ଼ାନ୍ତ ଆଲୋଚନା ଚାଲିଛି। ତେବେ ଇରାନର ବୈଦେଶିକ ମନ୍ତ୍ରୀ ଏବେ ବି କହୁଛନ୍ତି ଯେ କୌଣସି ଚୂଡ଼ାନ୍ତ ଚୁକ୍ତି ହୋଇନାହିଁ ଏବଂ ଉଭୟ ଦେଶ ମଧ୍ୟରେ ଆଲୋଚନା ନିରନ୍ତର ଜାରି ରହିଛି। ତଥାପି, ଆମେରିକାର ଆଭିମୁଖ୍ୟକୁ ଦେଖିଲେ ମନେହେଉଛି ଯେ ସେ ଇରାନ ସହ ପରମାଣୁ ପ୍ରସଙ୍ଗରେ ପୁଣି ଥରେ ନୂଆ କରି ଆଲୋଚନା ଆରମ୍ଭ କରିପାରେ।
ଗ୍ଲୋବାଲ ଏନର୍ଜି ଏଜେନ୍ସିଗୁଡ଼ିକର କହିବାନୁସାରେ, ହର୍ମୁଜ ରାସ୍ତାରେ ଶହ ଶହ ଜାହାଜ ଅପେକ୍ଷା କରି ରହିଛନ୍ତି। ଏହା ଉପରେ ଇରାନ ଏବଂ ଆମେରିକା ଉଭୟ ନିଜର ଦାବି ଉପସ୍ଥାପନ କରୁଛନ୍ତି ଏବଂ କୌଣସି ବି ଜାହାଜକୁ ଯିବାକୁ ଦେଉନାହାନ୍ତି। ଯଦି ଉଭୟଙ୍କ ମଧ୍ୟରେ ଚୁକ୍ତି ହୁଏ ଏବଂ ହର୍ମୁଜ ଦେଇ ପୁଣି ବ୍ୟବସାୟ ଆରମ୍ଭ ହୁଏ, ତେବେ ଖୁବ ଶୀଘ୍ର ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା $୮୦ ଡଲାରରୁ ମଧ୍ୟ ତଳକୁ ଖସିପାରେ। ବର୍ତ୍ତମାନ ଏହି ବିବାଦ ଯୋଗୁଁ ଗ୍ଲୋବାଲ ମାର୍କେଟରେ କ୍ରୁଡ ମହଜୁଦ ପ୍ରାୟ ୨ କୋଟି ବ୍ୟାରେଲ ହ୍ରାସ ପାଇଛି। ବିଶ୍ୱ ବ୍ୟାଙ୍କ, ଆଇଏମଏଫ (IMF) ସହିତ ସମସ୍ତ ଗ୍ଲୋବାଲ ଏଜେନ୍ସି ମଧ୍ୟ ଚେତାବନୀ ଦେଇଛନ୍ତି ଯେ ଯଦି ହର୍ମୁଜ ସଙ୍କଟ ଦୀର୍ଘ ଦିନ ଧରି ଚାଲେ, ତେବେ ଖରାଦିନେ ଇନ୍ଧନ ସଙ୍କଟ ଆହୁରି ଗଭୀର ହୋଇପାରେ।
Odisha’s No.1 Odia Daily
