ନୂଆଦିଲ୍ଲୀ,୩୦ା୫- ଅଲିମ୍ପିଆନ ଭିନେଶ ଫୋଗତଙ୍କ ପ୍ରତିଦ୍ୱନ୍ଦ୍ୱିତାମୂଳକ ରେସଲିଂକୁ ଫେରିବା ଆଶା ଧୂଳିସାତ ହୋଇଛି। ଶନିବାର ଏସିଆନ ଗେମ୍ସ ଚୟନ ପ୍ରକ୍ରିୟାରେ ୫୩ କେଜି ସେମିଫାଇନାଲରେ ସେ ମୀନାକ୍ଷୀଙ୍କଠାରୁ ୬-୪ ପଏଣ୍ଟରେ ପରାସ୍ତ ହୋଇଛନ୍ତି। ଏଥିଯୋଗୁ ସେ ଜାତୀୟ ଦଳକୁ ଫେରିବାରେ ବିଫଳ ହୋଇଛନ୍ତି।
”ମୁଁ ପରାଜିତ ହୋଇଥିବା ଭଳି ଅନୁଭବ କରୁନାହିଁ। ମୁଁ ପୂରା ବ୍ୟବସ୍ଥା ସହ ଲଢ଼ୁଥିଲି। ଆମକୁ ପ୍ରତ୍ୟେକ ପଏଣ୍ଟ ପାଇଁ ଲଢ଼େଇ କରିବାକୁ ପଡ଼ିଥିଲା। ମୋତେ ଏକ ଉଚିତ ମ୍ୟାଚ୍ ଦିଆଗଲା ନାହିଁ। ମୋ ସହିତ ଲଢ଼େଇ କରିଥିବା ରେସଲରଙ୍କ ପ୍ରତି ମୁଁ କ୍ରୋଧିତ ନୁହେଁ। ସେମାନେ ବି ମୋ ବିପକ୍ଷରେ ଲଢ଼ିବାକୁ ସ୍ବପ୍ନ ଦେଖିଛନ୍ତି। ମୁଁ ଫେରିବି“ ବୋଲି ଭିନେଶ ଭେନ୍ୟୁ ଛାଡ଼ିବା ପୂର୍ବରୁ କହିଛନ୍ତି।
ଅଲିମ୍ପିକ୍ ଫାଇନାଲରୁ ଅଯୋଗ୍ୟ ହେବା ପରେ ପ୍ରଥମ ଥର ପାଇଁ ମ୍ୟାଚ୍କୁ ଫେରୁଥିବା ଭିନେଶଙ୍କୁ ରବିବାର ଅନେକ ବିବାଦର ସମ୍ମୁଖୀନ ହେବାକୁ ପଡ଼ିଥିଲା। ଟୁର୍ନାମେଣ୍ଟ ଆରମ୍ଭ ହେବା ପୂର୍ବରୁ ଓଜନ ମାପ କରାଗଲା ବେଳେ ଭିନେଶଙ୍କୁ କେବଳ ୫୦ କେଜି କାଟେଗୋରିରେ ପ୍ରତିଦ୍ୱନ୍ଦ୍ୱିତା କରିବାକୁ ଅନୁମତି ଦିଆଯାଇଥିଲା। କାରଣ ଏହି କାଟେଗୋରିରେ ୨୦୨୪ ପ୍ୟାରିସ ଅଲିମ୍ପିକ୍ସରେ ପ୍ରତିଦ୍ୱନ୍ଦ୍ୱିତା କରିଥିଲେ। ହେଲେ ଡବ୍ଲ୍ୟୁଏଫ୍ଆଇର ନିଷ୍ପତ୍ତିକୁ ଭିନେଶ କଡ଼ା ପ୍ରତିବାଦ କରିବା ସହ ଫେଡେରେଶନ ବିରୋଧରେ ଭେଦଭାବ ଅଭିଯୋଗ ଆଣିଥିଲେ। ଏଥିଯୋଗୁ ଡବ୍ଲ୍ୟୁଏଫ୍ଆଇ ସଭାପତି ସଞ୍ଜୟ ସିଂଙ୍କ ହସ୍ତକ୍ଷେପ ପରେ ତାଙ୍କୁ ୫୩ କେଜି ଟ୍ରାଏଲ୍ସରେ ଭାଗ ନେବାକୁ ଅନୁମତି ମିଳିଥିଲା।
୫୩.୯ କେଜି ଓଜନ ହେବା ପରେ ଭିନେଶ ପ୍ରଥମ ମୁକାବିଲାରେ ଜ୍ୟୋତିଙ୍କୁ ୭-୧ରେ ହରାଇଥିଲେ। କ୍ୱାର୍ଟର ଫାଇନାଲରେ ଭିନେଶ ପ୍ରଥମାର୍ଦ୍ଧରେ ୦-୫ ବ୍ୟବଧାନରେ ନିଶଙ୍କଙ୍କଠାରୁ ପଛରେ ଥିଲେ। ହେଲେ ସ୍କୋରିଂ ସିଷ୍ଟମରେ ସମସ୍ୟା ଓ ଉଭୟ ରେସଲରଙ୍କ ଚ୍ୟାଲେଞ୍ଜ କାରଣରୁ ଏହି ମୁକାବିଲା ବାରମ୍ବାର ବାଧାପ୍ରାପ୍ତ ହୋଇଥିଲା। ଦ୍ୱିତୀୟାର୍ଦ୍ଧରେ ଦର୍ଶକଙ୍କ କରତାଳି ମଧ୍ୟରେ ଭିନେଶ ନିଜ ଦକ୍ଷତା ଓ ଅଭିଜ୍ଞତା ପ୍ରଦର୍ଶିତ କରି ମୁକାବିଲାକୁ ୭-୬ରେ ଜିତି ନେଇଥିଲେ। ହେଲେ ମୀନାକ୍ଷୀଙ୍କ ବିପକ୍ଷ ସେମିଫାଇନାଲରେ ଭିନେଶ ତାଙ୍କର ପୁରୁଣା ତୀବ୍ରତା ବଜାୟ ରଖିପାରି ନ ଥିଲେ।
