ମୁମ୍ବାଇ,୨୯।୧୦: ମହାରାଷ୍ଟ୍ର ରାଜନୀତି ବେଳକୁ ବେଳ ରୋଚକ ହେବାରେ ଲାଗିଛି। ଏବେ ଆଉ ୫୦-୫୦ ଅଙ୍କ ନୁହେଁ ୫ ବର୍ଷ ପାଇଁ ମହାରାଷ୍ଟ୍ର ମୁଖ୍ୟମନ୍ତ୍ରୀ ପଦ ଦେବେନ୍ଦ୍ର ଫଡନବିସ ସମ୍ଭାଳିବେ ବୋଲି ଦାବି କରିଛନ୍ତି। ଏବେ ସେ କହିଛନ୍ତି ଏପର୍ଯ୍ୟନ୍ତ ୧୦ ସ୍ବାଧିନ ବିଧାୟକ ତାଙ୍କୁ ସହଯୋଗ କରିଛନ୍ତି। ଅନ୍ୟ ୫ ସ୍ବାଧିନ ବିଧାୟକ ମଧ୍ୟ ତାଙ୍କ ସହ ସମ୍ପର୍କରେ ଅଛନ୍ତି। ତେଣୁ ମହାରାଷ୍ଟ୍ରରେ ସରକାର ଗଠନ ପାଇଁ ଆଉ ଅଢେଇ ବର୍ଷୀୟା ମୁଖ୍ୟମନ୍ତ୍ରୀର ଆବଶ୍ୟକତା ନାହିଁ। ଶିବସେନାକୁ ଟାର୍ଗେଟ କରି ଫଡନବିସ ଏହା କହିଛନ୍ତି। ତେବେ ଭାଜପା ଶିବସେନା ମେଣ୍ଟକୁ ନେଇ କିଏ ସରକାର ଗଠନ କରିବ ତାହା ଭାଜପା ଅଧ୍ୟକ୍ଷ ତଥା ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ ନିଷ୍ପତ୍ତି ନେବେ ବୋଲି ଫଡନବିସ ପ୍ରକାଶ କରିଛନ୍ତି। ଭାଜପାର ରାଜ୍ୟସଭା ଏମ୍ପି ସଞ୍ଜୟ କାକଡେ ପୂର୍ବରୁ କହିଥିଲେ ଭାଜପା ଶିବସେନା ବିନା ମହାରାଷ୍ଟ୍ରରେ ସରକାର ଗଢିବ। ସେ କହିଥିଲେ ଶିବସେନାର ୫୬ ବିଧାୟକଙ୍କ ମଧ୍ୟରୁ ୪୫ ଜଣ ଭାଜପା ସହ ସମ୍ପର୍କରେ ଅଛନ୍ତି। ତେଣୁ ସେମାନେ ଭାଜପାକୁ ସମର୍ଥନ କରିବେ। ଆଉ ଏହା ଯଦି ସତ ହୁଏ ତେବେ ଶିବସେନା ବିନା ଭାଜପା ସରକାର ଗଠନ କରିବ।
