କଣ୍ଟାପଡ଼ା,୨୩।୭(ଡି.ଏନ୍.ଏ.): କଟକ ଗୋବିନ୍ଦପୁର ଥାନା ଅନ୍ତର୍ଗତ ନୂଆଗାଁ ଗ୍ରାମ ବଜାର ପଛପଟୁ ଶନିବାର ସକାଳେ ଜଣେ ଯୁବକଙ୍କ କ୍ଷତବିକ୍ଷତ ମୃତଦେହ ଜବତ କରଯାଇଛି। ମୃତକ ହେଲେ ସେହି ଗ୍ରାମର ଦେବେନ୍ଦ୍ର ବେହେରା(୩୫)। ଖବରପାଇ ଗୋବିନ୍ଦପୁର ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରୁଛି।
ଖବରରୁ ପ୍ରକାଶ, ରାଜମିସ୍ତ୍ରିଙ୍କ ପାଖରେ ହେଲ୍ପର ଭାବେ କାମ କରୁଥିବା ଦେବେନ୍ଦ୍ର ଶୁକ୍ରବାର ରାତିରେ ଘରକୁ ନ ଫେରିବାରୁ ତାଙ୍କ ବଡ଼ଭାଇ ଶ୍ୟାମସୁନ୍ଦର ରାତିରେ ତାଙ୍କୁ ଖୋଜାଖୋଜି କରିଥିଲେ। ରାସ୍ତା ଉପରେ ତାଙ୍କର ସାଇକେଲଟି ଥୁଆ ହୋଇଥିବା ଦେଖିବାକୁ ପାଇଥିଲେ। ସେ ସେଠାରେ ଖୋଜାଖୋଜି କରିଥିଲେ ମଧ୍ୟ ଦେବେନ୍ଦ୍ରଙ୍କୁ ନ ପାଇ ସାଇକେଲ ନେଇ ପଳାଇ ଆସିଥିଲେ। ଶନିବାର ସକାଳୁ ସେ ବଜାରଆଡ଼େ ଯାଇ ଖୋଜାଖୋଜି କରୁଥିବାବେଳେ ବଜାର ପଛପଟେ ଭାଇର କ୍ଷତବିକ୍ଷତ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ। ପରେ ଘଟଣା ସମ୍ପର୍କରେ ଥାନାରେ ଅଭିଯୋଗ କରିଥିଲେ। ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।
