ବରଗଡ଼,୨୩।୫(ପ୍ରେମାନନ୍ଦ ଖମାରୀ):ବର୍ତ୍ତମାନ ତାତିର ପ୍ରକୋପ ଜନଜୀବନକୁ ଅସ୍ତବ୍ୟସ୍ତ କରି ପକାଉଛି। କେବଳ ବାହାରେ ନୁହେଁ, ଘରେ ରହିଲେ ମଧ୍ୟ ଜୀବନ ଦହଗଞ୍ଜ ହୋଇ ପଡ଼ୁଛି। ଏଭଳି ସ୍ଥିତିରେ ବରଗଡ଼ ବ୍ଲକ ଧାଙ୍ଗେର ଗ୍ରାମରେ ରହିଥିବା ପାନୀୟଜଳ ଯୋଗାଣ ପ୍ରକଳ୍ପ ଦୀର୍ଘ ମାସ ହେଲା ଅଚଳ ହୋଇ ପଡ଼ିଛି। ଗ୍ରାମରେ ତାତିଠୁ ବଳି ଯାଇଛି ଜଳକଷ୍ଟ। ପାନୀୟଜଳ ପାଇଁ ଗ୍ରାମବାସୀଙ୍କୁ ଡହଳବିକଳ ହେବାକୁ ପଡ଼ୁଛି। ତେବେ ଏହି ସମସ୍ୟା ବିଭାଗୀୟ ଅଧିକାରୀଙ୍କୁ ଅଜଣା, ଅଛପା ରହି ନାହିଁ। ପମ୍ପ ହାଉସ୍ ଚଳାଉଥିବା କର୍ମଚାରୀଙ୍କ ସମେତ ସ୍ଥାନୀୟ ସରପଞ୍ଚ ସେ ନେଇ ବିଭାଗୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିସାରିଛନ୍ତି। ମାତ୍ର ଏପର୍ଯ୍ୟନ୍ତ ପାନୀୟଜଳ ପ୍ରକଳ୍ପ ମରାମତି ହୋଇପାରିନାହିଁ ।
ଧାଙ୍ଗେର ଗ୍ରାମ ୧୦ ୱାର୍ଡକୁ ନେଇ ଗଠିତ। ଏଠାରେ ସହରାପଡ଼ା, ନୂଆପଡ଼ା, ସଡ଼କପଡ଼ା, ମାଲିପଡ଼ା, ଲରିହାପଡ଼ା, ଟିକୁନୁଟିକ୍ରା, ଝାଙ୍କରଟିକ୍ରା, ହରିଜନପଡ଼ା, ପୋଢ଼ଟିକ୍ରା, ମହିମାନଗର ଭଳି ଅନେକ ସାହି ରହିଛି। ଗ୍ରାମର ଲୋକସଂଖ୍ୟା ୬ହଜାର ଟପିବ। ଏଠାରେ ପ୍ରାଥମିକ ବିଦ୍ୟାଳୟଠାରୁ ଆରମ୍ଭ କରି ଉଚ୍ଚ ବିଦ୍ୟାଳୟ ପର୍ଯ୍ୟନ୍ତ ରହିଛି। ସେହିପରି ବିଭିନ୍ନ ସାହିରେ ଅଙ୍ଗନୱାଡ଼ି କେନ୍ଦ୍ର ରହିଥିବାବେଳେ ଏକ ସ୍ବାସ୍ଥ୍ୟ ଉପକେନ୍ଦ୍ର ମଧ୍ୟ ଅଛି। ଗ୍ରାମରେ ପାନୀୟଜଳ ସମସ୍ୟା ନିତିଦିନିଆଁ ଘଟଣାରେ ପରିଣତ ହୋଇଛି। ଗ୍ରାମରେ କୂଅ, ନଳକୂଅ ସମେତ ବିିଭିନ୍ନ ଜଳାଶୟ ରହିଛି। ମାତ୍ର କେଉଁ ନଳକୂଅରୁ ପାଣି ବାହାରୁନି ତ ଆଉ କେଉଁଥିରେ ବ୍ୟବହାର ଉପଯୋଗୀ ପାଣି ବାହାରୁ ନାହିଁ। ସେହିପରି ଗ୍ରୀଷ୍ମଦିନେ ଗ୍ରାମର କୂଅ, ଜଳାଶୟ ଜଳସ୍ତର ହ୍ରାସ ପାଇବା ସହିତ ଶୁଖିଲା ପଡୁଛି।
ଏଭଳି ଜଳ ସଙ୍କଟକୁ ଏଡ଼ାଇବା ପାଇଁ ଗ୍ରାମବାସୀଙ୍କ ବାରମ୍ବାର ଦାବି ପରେ ୨୦୧୭ରେ ଉକ୍ତ ଗ୍ରାମରେ ପ୍ରାୟ ୧କୋଟି ୧୨ଲକ୍ଷ ଟଙ୍କା ବ୍ୟୟ ଅଟକଳରେ ପାନୀୟଜଳ ପ୍ରକଳ୍ପ କରାଯାଇଥିଲା। ଜିରା ନଦୀରୁ ପାଇପ୍ ମାଧ୍ୟମରେ ପାନୀୟଜଳ ଯୋଗାଣ ପାଇଁ ଗ୍ରାମରେ ୧୦ହଜାର ଲିଟର ପାଣି କ୍ଷମତା ସମ୍ପନ୍ନ ଓଭରହେଡ୍ ଟ୍ୟାଙ୍କ ମଧ୍ୟ ନିର୍ମିତ କରାଗଲା। ସେହିପରି ବିଭିନ୍ନ ପଡ଼ାରେ ଷ୍ଟାଣ୍ଡପୋଷ୍ଟ ଗୁଡ଼ିକ ସ୍ଥାପନ କରାଗଲା। ୨୦୧୭ ଜୁଲାଇ ୧ତାରିଖରେ ପ୍ରକଳ୍ପକୁ କାର୍ଯ୍ୟକ୍ଷମ କରାଗଲା। କିନ୍ତୁ ବାରମ୍ବାର ଏହି ପ୍ରକଳ୍ପ ଅଚଳ ହୋଇ ପଡ଼ୁଛି। କେତେବେଳେ ବିଭିନ୍ନ ସ୍ଥାନରେ ପାଇପ୍ ଫାଟିଯିବାରୁ ପାନୀୟଜଳ ଯୋଗାଣ ବ୍ୟାହତ ହୋଇପଡ଼ୁଛି ତ ଆଉ କେବେ ବିଦ୍ୟୁତ୍ ସମସ୍ୟା ଯୋଗୁ ପ୍ରକଳ୍ପ ବନ୍ଦ ରହୁଛି। ଗ୍ରାମରେ ରହିଥିବା ଅନେକ ଷ୍ଟାଣ୍ଡପୋଷ୍ଟ ମଧ୍ୟ ନିଶ୍ଚିହ୍ନ ହୋଇ ପଡ଼ିଲାଣି। ପ୍ରକଳ୍ପ ମରାମତି ନାଁରେ ମଧ୍ୟ ଥରକୁ ଥର ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି। ହେଲେ କିଛିଦିନ ପାନୀୟଜଳ ଯୋଗାଣ ହେବା ପରେ ପୁଣି ସମସ୍ୟା ହେଉଛି।
ଏମାନେ କୁହନ୍ତି
ପାଣି ପାଇଁ ଗୁଲ୍ଗୁଲା
ଗ୍ରାମରେ ପାନୀୟଜଳ ପ୍ରକଳ୍ପ ରହିଛି ସତ। ହେଲେ ତାହା କେବେ ବି ଠିକ୍ ଭାବେ ଚାଲୁ ନାହିଁ। ପାଣି ପାଇଁ ବହୁତ ଗୁଲଗୁଲା ହେବାକୁ ପଡ଼ୁଛି। ଦୁଃଖକଷ୍ଟରେ ଏଠୁ ସେଠୁ ପାଣି ସଂଗ୍ରହ କରି ଚଳିବାକୁ ପଡ଼ୁଛି। ଏହାକୁ ତୁରନ୍ତ କାର୍ଯ୍ୟକ୍ଷମ କରାଯାଉ।
-ସୌରାଷ୍ଟ୍ର ଷଣ୍ଢ, ଗ୍ରାମବାସୀ
ଥରକୁ ଥର ଅଚଳ
ଗ୍ରାମରେ ପାନୀୟଜଳ ପ୍ରକଳ୍ପଟିଏ ହେବା ପରେ ସମସ୍ତେ ଖୁସି ହେଲୁ। ଏହି ପ୍ରକଳ୍ପରୁ ଭଲ ଭାବେ ପାଣି ମିଳିବ ଏବଂ ଗ୍ରାମବାସୀଙ୍କୁ ଆଉ ଜଳକଷ୍ଟରେ ରହିବାକୁ ପଡ଼ିବ ନାହିଁ ବୋଲି ଭାବିଥିଲୁ। ହେଲେ ଏହା ଥରକୁ ଥର ଅଚଳ ହୋଇ ପଡ଼ି ରହୁଛି।
-ବାଳମୁକୁନ୍ଦ ଷଣ୍ଢ, ଗ୍ରାମବାସୀ
ଜଣାଇବା ସତ୍ତ୍ୱେ ମରାମତି ନାହିଁ
ପ୍ରକଳ୍ପ ଅଚଳ ହେବା ଯୋଗୁ ଗ୍ରାମରେ ପାନୀୟଜଳ ସମସ୍ୟା ଦେଖାଯାଇଛି। ଏହାର ମରାମତି ପାଇଁ ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରିସାରିଛି। ହେଲେ ଏପର୍ଯ୍ୟନ୍ତ ମରାମତି ହୋଇପାରିନାହିଁ। ଫଳରେ ପାନୀୟଜଳ ପ୍ରକଳ୍ପ ଅଚଳ ହୋଇ ପଡ଼ି ରହିଛି।
-ଋତୁରାଜ ବାଗ୍, ସରପଞ୍ଚ
ସ୍ଥାୟୀ ମରାମତି ଦରକାର
ପାନୀୟଜଳ ପ୍ରକଳ୍ପ ବାରମ୍ବାର ଅଚଳ ହେଉଛି। କେମିତି ମରାମତି କରୁଛନ୍ତି ଯେ ଅଳ୍ପଦିନ ପରେ ପୁଣି ଅଚଳ ହୋଇ ପଡ଼ୁଛି। ଅଯଥାରେ ରାଜକୋଷରୁ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି। କାମଚଳା ବଦଳରେ ଏହାର ସ୍ଥାୟୀ ମରାମତି ହେଉ।
-ରାମ ନାରାୟଣ ଭୋଇ, ଗ୍ରାମବାସୀ
Dharitri – Odisha’s No.1 Odia Daily
