ଆନନ୍ଦପୁର/ହାଟଡିହୀ/ଛେନାପଦୀ, ୨୨/୦୫ (ସୁଶାନ୍ତ କୁମାର ସାହୁ / ଶୁଭକାନ୍ତ ନାୟକ / ନିରାକାର ପରିଡା):
କେନ୍ଦୁଝର ଜିଲାର ଆନନ୍ଦପୁର ବିଧାନସଭା କ୍ଷେତ୍ର ଅନ୍ତର୍ଗତ ହାଟଡିହୀଠାରେ ବିଜେଡି ପକ୍ଷରୁ ଶୁକ୍ରବାର ଏକ ବିଶାଳ ମହିଳା ସମାବେଶ ଓ ନାରୀ ଅଧିକାର ଅଭିଯାନ ଆୟୋଜିତ ହୋଇଛି। ପ୍ରଥମେ ଛେନାପଦୀ ବଜାରଠାରୁ ଏକ ଶୋଭାଯାତ୍ରା ବାହାରିଥିଲା। ଏହି ଶୋଭାଯାତ୍ରାରେ ଜିଲାର ବିଧାୟକ, ନେତା, କର୍ମୀ ଓ ବହୁ ସଂଖ୍ୟକ ମହିଳା ଅଂଶଗ୍ରହଣ କରି ହାଟଡିହୀ ପର୍ଯ୍ୟନ୍ତ ଯାଇଥିଲେ।
ପରେ ହାଟଡିହୀଠାରେ ଆୟୋଜିତ ବୈଠକରେ ଶାସକ ଭାଜପା ସରକାରକୁ କଟୁ ସମାଲୋଚନା କରାଯାଇଥିଲା।ବୈଠକରେ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ କହିଥିଲେ ଯେ, ବିଜେଡି ସଦା ମହିଳାଙ୍କ ଉନ୍ନତି, ଅଗ୍ରଗତି ଓ ସଶକ୍ତିକରଣ ପାଇଁ କାମ କରୁଛି। ପ୍ରତ୍ୟେକ କ୍ଷେତ୍ରରେ ମହିଳାଙ୍କୁ ଅଗ୍ରାଧିକାର ଓ ପ୍ରାଥମିକତା ଦିଆଯାଉଛି। କିନ୍ତୁ ଭାଜପା ସରକାର ବିଜେଡିକୁ ମହିଳା ବିରୋଧୀ ବୋଲି ଅପପ୍ରଚାର କରୁଥିବା ସେ ଅଭିଯୋଗ କରିଥିଲେ।
ସେ ଆହୁରି କହିଥିଲେ ଯେ, ଭାଜପା ସରକାର କାଳରେ ଜୁଲାଇ ୨୦୨୪ରୁ ସେପ୍ଟେମ୍ବର ୨୦୨୫ ମଧ୍ୟରେ ୪୦,୯୪୭ଟି ମହିଳା ବିରୋଧୀ ମାମଲା ରୁଜୁ ହୋଇଛି। ଏହା ମହିଳା ସୁରକ୍ଷା ପ୍ରତି ସରକାରଙ୍କ ବିଫଳତାକୁ ପ୍ରକାଶ କରୁଛି।
ଏହି ସମାବେଶରେ ଘସିପୁରା ବିଧାୟକ ବଦ୍ରି ନାରାୟଣ ପାତ୍ର, ଜିଲା ବିଜୁ ମହିଳା ଜନତା ଦଳର ପର୍ଯ୍ୟବେକ୍ଷକ ଡା. ଲେଖାଶ୍ରୀ ସାମନ୍ତସିଂହାର, ଜିଲା ସଭାପତି ଆଶିଷ ଚକ୍ରବର୍ତ୍ତୀ, କାର୍ଯ୍ୟକାରୀ ସଭାନେତ୍ରୀ ସାବିତ୍ରୀ ସେଠୀ, ପାଟଣାର ପୂର୍ବତନ ବିଧାୟକ ଜଗନ୍ନାଥ ନାୟକ, ଆନନ୍ଦପୁରର ପୂର୍ବତନ ବିଧାୟକ ମାୟାଧର ଯେନା, ଯୁବ ସଭାପତି ରାକେଶ ରାମ, ଯୁବ ନେତା ଦେବପ୍ରିୟ ପାତ୍ର ଓ ଅମରେନ୍ଦ୍ର ଧଳ ସମେତ ଅନେକ ନେତା ଓ କର୍ମୀ ଉପସ୍ଥିତ ଥିଲେ।ଏହାସହ ଜିଲା ପରିଷଦ ସଦସ୍ୟ ବିମ୍ବାଧର ବିଶ୍ୱାଳ, ସୁକାନ୍ତି ଯେନା, କୌଶଲ୍ୟା ସେଠୀ ଓ ବୈଦ୍ୟନାଥ ସାମଲ ପ୍ରମୁଖ ଉପସ୍ଥିତ ରହି ଭାଜପା ସରକାରକୁ ଟାର୍ଗେଟ କରିଥିଲେ।ଏହି ସମାବେଶରେ ବହୁ ସଂଖ୍ୟକ ମହିଳାଙ୍କ ଉପସ୍ଥିତି ଦେଖିବାକୁ ମିଳିଥିଲା।
