ନୂଆଦିଲ୍ଲୀ,୨୨।୫: ଇରାନ ଏବଂ ଆମେରିକା ମଧ୍ୟରେ ଚାଲିଥିବା ଯୁଦ୍ଧ ଓ ଖାଡ଼ି ଅଞ୍ଚଳରେ ଦେଖାଦେଇଥିବା ଅସ୍ଥିରତା ଯୋଗୁଁ ଭାରତର ପ୍ରାୟ ୫୦ ଅରବ ଡଲାର (୫୦ ବିଲିୟନ ଡଲାର)ର ଔଷଧ ଶିଳ୍ପ (Pharmaceutical Industry) ଉପରେ ଏକ ବଡ଼ ସଙ୍କଟ ମାଡ଼ି ଆସିଛି। ଏହାର ସିଧାସଳଖ ପ୍ରଭାବ ସାଧାରଣ ଜନତାଙ୍କ ସୱାସ୍ଥ୍ୟ ଏବଂ ପକେଟ ଉପରେ ପଡ଼ିବାକୁ ଯାଉଛି।
ଯୁଦ୍ଧ ଯୋଗୁଁ ‘ହର୍ମୁଜ ପ୍ରଣାଳୀ’ (Strait of Hormuz) ଏବଂ ସମୁଦ୍ର ପଥରେ ଜାହାଜ ଚଳାଚଳ ଗୁରୁତର ଭାବେ ବାଧାପ୍ରାପ୍ତ ହୋଇଛି। ଏହି କାରଣରୁ ଔଷଧ ପ୍ରସ୍ତୁତି ପାଇଁ ଆବଶ୍ୟକ ହେଉଥିବା କଞ୍ଚାମାଲ ବା ଏପିଆଇ (API – Active Pharmaceutical Ingredient) ଭାରତରେ ପହଞ୍ଚିବାରେ ସମସ୍ୟା ଦେଖାଦେଇଛି। ଏହା ସହିତ ସାମଗ୍ରୀ ପରିବହନ ଖର୍ଚ୍ଚ (Freight cost) ବୃଦ୍ଧି ପାଇଛି ଏବଂ ସପ୍ଲାଇ ଚେନ (ଯୋଗାଣ ଶୃଙ୍ଖଳା) ମଧ୍ୟ ଭାଙ୍ଗିଯାଇଛି।
କଞ୍ଚାମାଲର ଅଭାବ ଯୋଗୁଁ ଆଗାମୀ ଦିନରେ ଦୈନନ୍ଦିନ ଜୀବନରେ ବ୍ୟବହୃତ ହେଉଥିବା ସାଧାରଣ ଔଷଧ ଯେପରିକି:
ପାରାସିଟାମୋଲ (Paracetamol)
ଆଣ୍ଟିବାୟୋଟିକ୍ସ (Antibiotics)
ବ୍ଲଡ ପ୍ରେସର (ରକ୍ତଚାପ)
ଡାଇବେଟିସ (ମଧୁମେହ) ର ଔଷଧ
ଏହିସବୁ ଔଷଧର ମୂଲ୍ୟ ବୃଦ୍ଧି ହେବାର ଆଶଙ୍କା ରହିଛି ଏବଂ ବଜାରରେ ଏହାର ଅଭାବ ମଧ୍ୟ ଦେଖାଦେଇପାରେ। ଏହାଛଡ଼ା କ୍ୟାନ୍ସର ଔଷଧ ଓ ଇଞ୍ଜେକ୍ସନ ଭଳି ଜୀବନରକ୍ଷକ ସାମଗ୍ରୀ ଯେଉଁଗୁଡ଼ିକୁ ର୍ନିଦ୍ଦିଷ୍ଟ ତାପମାତ୍ରାରେ ରଖିବାକୁ ପଡ଼ିଥାଏ, ସେଗୁଡ଼ିକର ପରିବହନ ପଥ ବଦଳିବା ଯୋଗୁଁ ସମୟ ଏବଂ ଖର୍ଚ୍ଚ ଉଭୟ ବଢ଼ିଯିବ, ଯାହାଫଳରେ ଏହି ଔଷଧଗୁଡ଼ିକର ଉତ୍ପାଦନ ଖର୍ଚ୍ଚ ବହୁ ପରିମାଣରେ ବୃଦ୍ଧି ପାଇବ।
ଭାରତୀୟ ଔଷଧ ରପ୍ତାନି ପ୍ରୋତ୍ସାହନ ପରିଷଦ (Pharmexcil) ଏବଂ ଅନ୍ୟାନ୍ୟ ଶିଳ୍ପ ସଂଗଠନଗୁଡ଼ିକ ଚେତାବନୀ ଦେଇଛନ୍ତି ଯେ ଯଦି ପଶ୍ଚିମ ଏସିଆରେ ଏହି ଉତ୍ତେଜନା ଦୀର୍ଘ ସମୟ ଧରି ଜାରି ରହେ, ତେବେ ଏହାର ଭୟଙ୍କର ପରିଣାମ ଭୋଗିବାକୁ ପଡ଼ିବ। ଭାରତ ପ୍ରାୟ ୨୦୦ଟି ଦେଶକୁ ଜେନେରିକ ଔଷଧ ରପ୍ତାନି କରିଥାଏ ଏବଂ ବିଶ୍ୱର ମୋଟ ଜେନେରିକ ଔଷଧ ଯୋଗାଣରେ ଭାରତର ଅଂଶ ପ୍ରାୟ ୨୦ ପ୍ରତିଶତ। ତେଣୁ ଏହି ସଙ୍କଟ ଦ୍ୱାରା କେବଳ ଭାରତ ନୁହେଁ, ବରଂ ଆଫ୍ରିକା, ଏସିଆ ଏବଂ ଲାଟିନ ଆମେରିକାର ଅନେକ ଗରିବ ଦେଶ ମଧ୍ୟ ପ୍ରଭାବିତ ହେବେ, ଯେଉଁମାନେ ଶସ୍ତା ଔଷଧ ପାଇଁ ସମ୍ପୂର୍ଣ୍ଣ ରୂପେ ଭାରତ ଉପରେ ର୍ନିଭର କରନ୍ତି।
