ନୂଆଦିଲ୍ଲୀ,୨୨।୫: ଭାରତୀୟ କ୍ରିକେଟ୍ ପ୍ରେମୀଙ୍କ ପାଇଁ ଏକ ବଡ଼ ଖବର। ଟିମ୍ ଇଣ୍ଡିଆର ଅଲ୍ରାଉଣ୍ଡର ବିଜୟ ଶଙ୍କର ନିଜର ୨୫ ବର୍ଷର ଦୀର୍ଘ କ୍ରିକେଟ୍ ଯାତ୍ରାରେ ପୂର୍ଣ୍ଣଚ୍ଛେଦ ପକାଇଛନ୍ତି। ସେ ଆନ୍ତର୍ଜାତୀୟ କ୍ରିକେଟ୍, ଘରୋଇ କ୍ରିକେଟ୍ ଏବଂ ଆଇପିଏଲ୍ (IPL) ସମେତ ସମସ୍ତ ଫର୍ମାଟ୍ରୁ ସନ୍ନ୍ୟାସ ଘୋଷଣା କରିଛନ୍ତି। ୩୫ ବର୍ଷୀୟ ବିଜୟ ଶଙ୍କର ନିଜର ଅଫିସିଆଲ୍ ସୋସିଆଲ୍ ମିଡିଆ ହ୍ୟାଣ୍ଡେଲ୍ରେ ଏକ ଭାବବିହ୍ୱଳ ପୋଷ୍ଟ ଶେୟାର କରି ଏହି ସୂଚନା ଦେଇଛନ୍ତି। ସେ ଦେଶ ପାଇଁ ଖେଳିବାକୁ ନିଜ ଜୀବନର ସବୁଠାରୁ ବଡ଼ ସମ୍ମାନ ବୋଲି କହିବା ସହ କ୍ୟାରିୟର ସମୟରେ ସାମ୍ନା କରିଥିବା ପ୍ରବଳ ବିରୋଧ ଓ ସୋସିଆଲ ମିଡିଆ ନିନ୍ଦାକୁ ନେଇ ମଧ୍ୟ ନିଜର କୋହ ପ୍ରକାଶ କରିଛନ୍ତି। ସେ ନିଜ ନୋଟ୍ର ଶେଷରେ ‘ଆପଣଙ୍କ 3D କ୍ରିକେଟର’ ଲେଖି ସ୍ଵାକ୍ଷର କରିଛନ୍ତି।
ମାତ୍ର ୧୦ ବର୍ଷ ବୟସରୁ କ୍ରିକେଟ୍ ଖେଳିବା ଆରମ୍ଭ କରିଥିବା ବିଜୟ ଶଙ୍କର ବିସିସିଆଇ (BCCI), ଟିମ୍ ଇଣ୍ଡିଆ ଏବଂ ନିଜର ବିଭିନ୍ନ ଘରୋଇ ଓ ଆଇପିଏଲ୍ ଦଳକୁ କୃତଜ୍ଞତା ଜଣାଇଛନ୍ତି। ନିଜ କ୍ୟାରିୟରର ଦୁଇଟି ସବୁଠାରୁ ସ୍ମରଣୀୟ ମୁହୂର୍ତ୍ତକୁ ସେ ମନେ ପକାଇଛନ୍ତି:
-
୨୦୧୯ ଦିନିକିଆ ବିଶ୍ୱକପ୍ରେ ପାକିସ୍ତାନ ବିପକ୍ଷ ମ୍ୟାଚ୍ରେ ଭୁବନେଶ୍ୱର କୁମାର ଆହତ ହେବା ପରେ ବିଜୟ ଶଙ୍କର ଓଭର ସମ୍ଭାଳିଥିଲେ। ବିଶ୍ୱକପ୍ ଇତିହାସରେ ନିଜର ପ୍ରଥମ ବଲ୍ରେ ହିଁ ୱିକେଟ୍ ଚଟକାଇ ସେ ଚମତ୍କାର କରିଥିଲେ। ସେ ଏଭଳି କୀର୍ତ୍ତିମାନ ସ୍ଥାପନ କରିବାରେ ଭାରତର ପ୍ରଥମ ଏବଂ ବିଶ୍ୱର ଅତି ସୀମିତ ବୋଲରଙ୍କ ମଧ୍ୟରୁ ଜଣେ।
-
ଅଷ୍ଟ୍ରେଲିଆ ବିପକ୍ଷରେ ଭାରତର ଐତିହାସିକ ୫୦୦ତମ ଦିନିକିଆ ମ୍ୟାଚ୍ରେ ସେ ଶେଷ ଓଭର ବୋଲିଂ କରିଥିଲେ। ସେ ପ୍ରବଳ ଚାପ ସତ୍ତ୍ୱେ ଚମତ୍କାର ବୋଲିଂ କରି ଟିମ୍ ଇଣ୍ଡିଆକୁ ଏକ ସ୍ମରଣୀୟ ବିଜୟ ଭେଟି ଦେଇଥିଲେ।
ସେ ତାମିଲନାଡୁ କ୍ରିକେଟ୍ ଆସୋସିଏଶନ, ତ୍ରିପୁରା ଏବଂ ଆଇପିଏଲ୍ ଫ୍ରାଞ୍ଚାଇଜ୍ (GT, SRH, CSK ଓ DC) ସମେତ ନିଜର ସମସ୍ତ କୋଚ୍, ସପୋର୍ଟ ଷ୍ଟାଫ୍, ଡାକ୍ତର ଏବଂ ପରିବାରକୁ ଏହି ଯାତ୍ରାରେ ସାଥୀ ହୋଇଥିବାରୁ ଧନ୍ୟବାଦ ଜଣାଇଛନ୍ତି।
ବିଜୟ ଶଙ୍କରଙ୍କ କ୍ୟାରିୟର ସଦାବେଳେ ସୋସିଆଲ ମିଡିଆ ଟ୍ରୋଲିଂ ଓ ବିବାଦ ଘେରରେ ରହିଥିଲା। ଏହା ଉପରେ ଖୋଲାଖୋଲି ଭାବେ ସେ ଲେଖିଛନ୍ତି ଯେ, ସେ ନିଜ କ୍ୟାରିୟରରେ ଅକଳ୍ପନୀୟ ଘୃଣା ଏବଂ ନକାରାତ୍ମକତାର ସାମ୍ନା କରିଛନ୍ତି। କିନ୍ତୁ ସେ ଏସବୁକୁ ଅଣଦେଖା କରି ଆଗକୁ ବଢ଼ିବାକୁ ଉଚିତ୍ ମଣିଥିଲେ। ସେ କହିଛନ୍ତି, “ଯଦି ମୁଁ ଏହା କରିପାରିଲି, ତେବେ ଯେକେହି ମଧ୍ୟ କରିପାରିବେ। ତେଣୁ ସଦାବେଳେ ସକରାତ୍ମକ ଚିନ୍ତା କରନ୍ତୁ ଏବଂ କଠିନ ପରିଶ୍ରମ ଜାରି ରଖନ୍ତୁ।”
ସୂଚନାଯୋଗ୍ୟ, ୨୦୧୯ ବିଶ୍ୱକପ୍ରେ ଅଭିଜ୍ଞ ଅମ୍ବାତି ରାୟୁଡୁଙ୍କ ବଦଳରେ ତାଙ୍କୁ ଦଳରେ ସାମିଲ କରାଯାଇଥିଲା। ବିଶ୍ୱକପ୍ରେ ତାଙ୍କ ପ୍ରଦର୍ଶନ ନିରାଶାଜନକ ରହିବା ପରେ ପ୍ରଶଂସକମାନେ ତାଙ୍କୁ ତୀବ୍ର ସମାଲୋଚନା କରିଥିଲେ।
ବିଜୟ ଶଙ୍କରଙ୍କ ନାମ ସହ ‘3D’ ଶବ୍ଦ ଯୋଡ଼ି ହେବା ପଛର କାହାଣୀ ବେଶ୍ ମଜାଦାର। ୨୦୧୯ ବିଶ୍ୱକପ୍ ପାଇଁ ଯେତେବେଳେ ଭାରତୀୟ ଦଳ ଚୟନ ଚାଲିଥିଲା, ସେତେବେଳେ ସେଲେକ୍ଟରମାନେ ଅମ୍ବାତି ରାୟୁଡୁଙ୍କୁ ବାଦ୍ ଦେଇ ଯୁବ ଖେଳାଳି ବିଜୟ ଶଙ୍କରଙ୍କୁ ସୁଯୋଗ ଦେଇଥିଲେ।
ତତ୍କାଳୀନ ମୁଖ୍ୟ ଚୟନକର୍ତ୍ତା ଏମ୍.ଏସ୍.କେ. ପ୍ରସାଦ ବିଜୟଙ୍କ ଚୟନକୁ ଯଥାର୍ଥ ଦର୍ଶାଇ ଏକ ପ୍ରେସ୍ କନଫରେନ୍ସରେ କହିଥିଲେ ଯେ, ବିଜୟ ଶଙ୍କର ଜଣେ ‘ଥ୍ରୀ-ଡାଇମେନ୍ସନାଲ’ (Three-Dimensional) ବା 3D ଖେଳାଳି। ସେ ୪ ନମ୍ବର ସ୍ଥାନରେ ଭଲ ବ୍ୟାଟିଂ କରିପାରିବେ, ମିଡିୟମ୍ ପେସ୍ ବୋଲିଂ କରିପାରିବେ ଏବଂ ଜଣେ ଚମତ୍କାର ଫିଲ୍ଡର ମଧ୍ୟ।
ଚୟନକର୍ତ୍ତାଙ୍କ ଏହି ବୟାନ ପରେ ଅମ୍ବାତି ରାୟୁଡୁ କଟାକ୍ଷ କରି ଏକ୍ସ (ପୂର୍ବରୁ ଟ୍ୱିଟର)ରେ ଲେଖିଥିଲେ ଯେ, ବିଶ୍ୱକପ୍ ଦେଖିବା ପାଇଁ ସେ ଏକ ନୂଆ ‘3D ଚଷମା’ ଅର୍ଡର କରିଛନ୍ତି। ସେବେଠାରୁ କ୍ରିକେଟ୍ ଜଗତ ଏବଂ ସୋସିଆଲ ମିଡିଆରେ ବିଜୟ ଶଙ୍କରଙ୍କୁ ‘3D କ୍ରିକେଟର’ କୁହାଯାଉଛି।
