ନୂଆଦିଲ୍ଲୀ,୨୨।୫: ଚେନ୍ନାଇ ସୁପର କିଙ୍ଗ୍ସ ପୁଣିଥରେ IPLରୁ ଖାଲି ହାତରେ ଫେରିଛି। IPL ଇତିହାସର ସବୁଠାରୁ ସଫଳ ଦଳ ମଧ୍ୟରୁ ଗୋଟିଏ ତଥା ପାଞ୍ଚ ଥର ଚାମ୍ପିଅନ ଚେନ୍ନାଇ IPL 2026ରେ ପ୍ଲେଅଫ ପର୍ଯ୍ୟନ୍ତ ପହଞ୍ଚିପାରି ନାହିଁ। ଋତୁରାଜ ଗାୟକ୍ୱାଡଙ୍କ ଅଧିନାୟକତ୍ୱରେ ଦଳ ପୂର୍ବତନ ଅଧିନାୟକ ଏମଏସ ଧୋନୀ ଫ୍ରାଞ୍ଚାଇଜିକୁ ଦେଇଥିବା ସଫଳତାକୁ ଦୋହରାଇବାରେ ବିଫଳ ହୋଇଥିଲା। ଏହା ପ୍ରଶଂସକମାନଙ୍କୁ ନିରାଶ କରିଛି। ଏହି ପରିସ୍ଥିତି ମଧ୍ୟରେ, ଦଳର ପୂର୍ବତନ ଷ୍ଟାର ସ୍ପିନର ରବିଚନ୍ଦ୍ରନ ଅଶ୍ୱିନ, ପ୍ରଶଂସକମାନଙ୍କୁ ଏକ ତିକ୍ତ ବାସ୍ତବତାକୁ ଗ୍ରହଣ କରିବାକୁ ଅନୁରୋଧ କରିଛନ୍ତି।
ଗୁଜରାଟ ଟାଇଟାନ୍ସ ବିପକ୍ଷରେ ସିଜନର ଶେଷ ମ୍ୟାଚରେ, ଚେନ୍ନାଇ ୮୯ ରନର ଦମଦାର ପରାଜୟ ବରଣ କରିଛି। ଏହା IPL 2026ରେ ଦଳର ଅଷ୍ଟମ ପରାଜୟ। ଲଗାତାର ତୃତୀୟ ସିଜନ ଯେଉଁଥିରେ CSK ପ୍ଲେଅଫ ପହଞ୍ଚିବାରେ ବିଫଳ ହୋଇଛି। ଶେଷ ଥର ପାଇଁ ଦଳ ୨୦୨୩ରେ ଧୋନୀଙ୍କ ଅଧିନାୟକତ୍ୱରେ ଶ୍ରେଷ୍ଠ ଚାରିରେ ସ୍ଥାନ ପାଇଥିଲା । ସେ ବର୍ଷ ଟାଇଟଲ ଜିତିବା ସହିତ CSK ପଞ୍ଚମ IPL ଟ୍ରଫି ହାସଲ କରିଥିଲା।
ସ୍ବାଭାବିକ ଭାବରେ, ଏହି ପରାଜୟ CSK ପ୍ରଶଂସକମାନଙ୍କୁ ହତଚକିତ କରିଛି, କାରଣ ଦଳ ଏବଂ ଏହାର ସମର୍ଥକ ଉଭୟ ସଫଳତା ବ୍ୟତୀତ ଆଉ କିଛି ଦେଖିବାକୁ ଅଭ୍ୟସ୍ତ ହୋଇଯାଇଥିଲେ। ଅଶ୍ୱିନ କହିଛନ୍ତି, ଧୋନୀଙ୍କୁ ଭୁଲିଯାଅ। CSK ପ୍ରଶଂସକଙ୍କ ପାଇଁ ମୋର କେବଳ ଗୋଟିଏ ପରାମର୍ଶ ଅଛି: ଧୋନୀଙ୍କୁ ଏକପାଖରେ ରଖନ୍ତୁ। ସେ ତୁମ ସମସ୍ତଙ୍କୁ ବିଗାଡି ଦେଇଛନ୍ତି। କାରଣ ସେ CSKକୁ ଏକ ଅସାଧାରଣ ଭାବେ ଉଚ୍ଚ ମାନଦଣ୍ଡରେ ପହଞ୍ଚାଇଥିଲେ। ସମୟ ବଦଳି ଯାଇଛି। ଅନ୍ୟ ଦଳଗୁଡ଼ିକ ମଧ୍ୟ ବୁଦ୍ଧିମାନ ହୋଇଯାଇଛନ୍ତି। ପ୍ରତିପକ୍ଷ ବିକଶିତ ହୋଇଛି। ତୁମେ ପୂର୍ବ ପରି ସମାନ ସ୍ତରର ସଫଳତା ସବୁବେଳେ ପାଇପାରିବ ନାହିଁ।
ଅଶ୍ୱିନ CSK ପ୍ରଶଂସକମାନଙ୍କୁ ଅପିଲ କରି କହିଥିଲେ ଯେ, ପ୍ରତ୍ୟେକ ଅଧିନାୟକ ଧୋନୀଙ୍କ ପରି ପ୍ରଦର୍ଶନ କରିବେ ବୋଲି ଆଶା କରନ୍ତୁ ନାହିଁ। ଜଣେ ଯୁବ ଅଧିନାୟକଙ୍କ ଉପରେ ସମାନ ପ୍ରକାରର ଚାପ ଆଶା ରଖନ୍ତୁ ନାହିଁ, ସେ ଋତୁରାଜ ହୁଅନ୍ତୁ କିମ୍ବା ଅନ୍ୟ କେହି ହୁଅନ୍ତୁ। ଟିକେ ଅଧିକ ବାସ୍ତବବାଦୀ ହେବାକୁ ଚେଷ୍ଟା କରନ୍ତୁ।
ଚେନ୍ନାଇ ପ୍ରଶଂସକଙ୍କ ପାଇଁ, ନିରାଶାର ଏକମାତ୍ର କାରଣ କେବଳ ଏହି ସିଜିନରେ ଧୋନୀ ଦଳର ଅଧିନାୟକ ନ ଥିଲେ। ସିଏସକେର ପ୍ରଶଂସକମାନେ ଧୋନୀଙ୍କ ଖେଳ ଦେଖିବା ପାଇଁ ଗୋଟିଏ ବି ସୁଯୋଗ ପାଇ ନ ଥିବାରୁ ଗଭୀର ନିରାଶ ହୋଇଥିଲେ। ଏହା ଆଇପିଏଲର ୧୯ ସିଜିନରେ ପ୍ରଥମ ଥର ପାଇଁ ଥିଲା ଯେ, ଧୋନୀ- ଟୁର୍ନାମେଣ୍ଟର ଅଂଶ ହୋଇଥିଲେ ମଧ୍ୟ – ଗୋଟିଏ ବି ମ୍ୟାଚ ଖେଳିବାକୁ ପଡ଼ିଆକୁ ଯାଇ ନ ଥିଲେ।
Dharitri – Odisha’s No.1 Odia Daily
