ଝାରସୁଗୁଡା,୨୦ା୫(ଆଶିଷ ରଞ୍ଜନ ଦାଶ): ପରକୀୟା ପ୍ରୀତି ସନ୍ଦେହକୁ କେନ୍ଦ୍ର କରି ଝାରସୁଗୁଡା ଜିଲାରେ ଏକ ଅଭାବନୀୟ ତଥା ହୃଦୟବିଦାରକ ହତ୍ୟାକାଣ୍ଡ ଘଟିଯାଇଛି । ମା’ ଅନ୍ୟ ଜଣେ ବ୍ୟକ୍ତିଙ୍କ ସହ ଅନୈତିକ ସମ୍ପର୍କ ରଖିଥିବା ସନ୍ଦେହ କରି ଜଣେ ପୁଅ ତାର ସହଯୋଗୀମାନଙ୍କ ସହ ମିଶି ସଂପୃକ୍ତ ବ୍ୟକ୍ତିଙ୍କୁ ନିର୍ମମ ଭାବେ ହତ୍ୟା କରିଛି । ଝାରସୁଗୁଡା ସଦର ଥାନା ଅନ୍ତର୍ଗତ ସରବାହାଲର ରୋହିଦାସପଡା (ନୂଆପଡ଼ା) ଅଞ୍ଚଳରେ ମଙ୍ଗଳବାର ବିଳମ୍ବିତ ରାତିରେ ଏହି ବିଭତ୍ସ ହତ୍ୟାକାଣ୍ଡ ଘଟିଛି ।
ମୃତ ଯୁବକ ଜଣକ ହେଲେ ସରବାହାଲ ନୂଆପଡ଼ାରେ ରହୁଥିବା ସୁନ୍ଦର ରୋହିଦାସ (୪୨)।ଏହି ସମ୍ବେଦନଶୀଳ ଘଟଣାରେ ସଦର ଥାନା ପୋଲିସ ମୁଖ୍ୟ ଅଭିଯୁକ୍ତ ସମେତ ୩ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ନୂଆପଡ଼ାର ହିତେଶ ରୋହିଦାସ (୧୯), ତାଙ୍କ ବଡ଼ ଭାଇ ଲିଙ୍ଗରାଜ ରୋହିଦାସ ଓରଫ ଲିଙ୍ଗା (୨୦) ଏବଂ ସାରସମାଲ ଅଞ୍ଚଳର ମଙ୍ଗଳ ସାହୁ (୧୮)। ଝାରସୁଗୁଡା ଏସ.ପି. ଜି.ଆର. ରାଘବେନ୍ଦ୍ରଙ୍କ ସୂଚନା ଅନୁଯାୟୀ, ମୁଖ୍ୟ ଅଭିଯୁକ୍ତ ହିତେଶ ଓ ଲିଙ୍ଗରାଜଙ୍କ ମା’ଙ୍କ ସହ ମୃତ ସୁନ୍ଦର ରୋହିଦାସଙ୍କ ଅନୈତିକ ସମ୍ପର୍କ ଥିବା ନେଇ ହିତେଶ ବାରମ୍ବାର ସନ୍ଦେହ କରୁଥିଲେ। ଏଥିପାଇଁ ହିତେଶ ପୂର୍ବରୁ ସୁନ୍ଦରଙ୍କୁ ଅନେକ ଥର ଚେତାବନୀ ଦେବା ସହ ବୁଝାଇବାକୁ ଚେଷ୍ଟା କରିଥିଲେ ମଧ୍ୟ ସୁନ୍ଦର କୌଣସି କଥା ମାନିନଥିଲେ।
ମଙ୍ଗଳବାର ବିଳମ୍ବିତ ରାତି ମଧ୍ୟରେ ଏହି ଗଣ୍ଡଗୋଳ ଉଗ୍ର ରୂପ ନେଇଥିଲା। ସୁନ୍ଦର ନିଜ ଘରେ ଶୋଇଥିବା ବେଳେ ତିନି ଅଭିଯୁକ୍ତ ଘର ଭିତରକୁ ପ୍ରବେଶ କରିଥିଲେ। ସେମାନେ ପ୍ରଥମେ ଲାଠିରେ ତାଙ୍କୁ ଆମାନୁଷିକ ଭାବେ ମାଡ଼ ମାରିଥିଲେ। ଏହାପରେ ମୁଖ୍ୟ ଅଭିଯୁକ୍ତ ହିତେଶ ଏକ ସାଇକେଲ କ୍ରାଙ୍କର ପେଡାଲ ଲୁହାରେ ସୁନ୍ଦରଙ୍କ ମୁଣ୍ଡକୁ ପିଟି ପିଟି ନିର୍ମମ ଭାବେ ଆକ୍ରମଣ କରିଥିଲେ। ଘଟଣା ଘଟାଇବା ପରେ ତିନି ଅଭିଯୁକ୍ତ ସେଠାରୁ ଫେରାର ହୋଇଯାଇଥିଲେ।ଘଟଣା ବିଷୟରେ ଖବର ପାଇ ସଦର ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଗୁରୁତର ଆହତ ଅବସ୍ଥାରେ ସୁନ୍ଦରଙ୍କୁ ଉଦ୍ଧାର କରି ଝାରସୁଗୁଡା ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ହତ୍ୟାକାଣ୍ଡର ତଦନ୍ତ ପାଇଁ ଝାରସୁଗୁଡା ଏସ.ପି ଜି.ଆର. ରେଡ୍ଡୀ, ଏସ.ଡ଼ି.ପି.ଓ ଉମାଶଙ୍କର ସିଂ ଏବଂ ସଦର ଥାନା ଆଇ.ଆଇ.ସି. ସ୍ୱପ୍ନାରାଣୀ ଗୋଛାୟତ ସଦଳବଳେ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ପୋଲିସ ସହ ଏକ ସାଇଣ୍ଟିଫିକ ଟିମ୍ ମଧ୍ୟ ପହଞ୍ଚି ପ୍ରମାଣ ସଂଗ୍ରହ କରିବା ସହ ହତ୍ୟାରେ ବ୍ୟବହୃତ ଅସ୍ତ୍ର ଓ ସାଇକେଲ କ୍ରାଙ୍କକୁ ଜବତ କରିଛି ।ଏହି ଘଟଣାକୁ ନେଇ ଝାରସୁଗୁଡା ସଦର ଥାନାରେ କେସ ନମ୍ବର ୨୫୧/୨୦୨୬ ରେ ଏକ ମାମଲା ରୁଜୁ କରାଯାଇ ଶବ ବ୍ୟବଚ୍ଛେଦ ପାଇଁ ପଠାଯାଇଛି। ଗିରଫ ୩ ଅଭିଯୁକ୍ତଙ୍କୁ ପୋଲିସ ଅଧିକ ପଚରାଉଚୁରା ଚଳାଇଛି । ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।
