ଦିଗପହଣ୍ଡି ,୧୯|୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଏନଏସି ୧୦ ନଂ ୱାର୍ଡ ଆନନ୍ଦ ନଗର ର ବିଶ୍ଵନାଥ ମହାରଣା ଙ୍କ ଝିଅ ଉଷାରାଣୀ ମହାରଣା ଗତ ୨୦୨୦ ଡିସେମ୍ବର ୮ ତାରିଖରେ ଗୋଳନ୍ଥରା ଥାନା ବିଶ୍ଵନାଥପୁର ଗ୍ରାମର ଉଦୟନାଥ ମହାରଣା ଙ୍କ ବଡ଼ପୁଅ ପ୍ରଶାନ୍ତ ମହାରଣା ଙ୍କୁ ବିବାହ କରିଥିଲେ।ସ୍ବାମୀ ଓ ଶ୍ବଶୁର ଘର ଲୋକଙ୍କ ଦାବୀ ପ୍ରକାରେ ସମସ୍ତ ଯୌତୁକ ସାମଗ୍ରୀ ଦିଆଯାଇଥିଲା।ବିବାହର କିଛିଦିନ ହସଖୁସି ରେ କଟିବା ପରେ ଉଭୟଙ୍କ ଔରସ ରୁ ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ପରେ ଅଧିକା ଯୌତୁକ ପାଇଁ ଉଷାରାଣୀ ଙ୍କୁ ସ୍ବାମୀ,ଶାଶୁ,ଶ୍ବଶୁର,ଦିଅର,ନଣନ୍ଦ,ନଣନ୍ଦେଇ,ଦେଢ଼ଶାଶୁ ତାଙ୍କୁ ମାନସିକ ଓ ଶାରିରୀକ ନିର୍ଯ୍ୟାତନା ଦେଇ ଆସୁଥିଲେ। ନିର୍ଯ୍ୟାତନା ଅସହ୍ୟ ହେବାରୁ ଗତ ୨୦୨୧ ଜୁନ ୧୬ ତାରିଖରେ ଉଷାରାଣୀ ବାପଘର ଦିଗପହଣ୍ଡି ଚାଲି ଆସିଥିଲେ। ଶ୍ବଶୁର ଘରୁ ଆସିବା ଦିନଠାରୁ ସ୍ବାମୀ ଓ ଶ୍ବଶୁର ଘର ଲୋକେ ତାଙ୍କୁ ଫୋନ କରି ଗାଳି ଗୁଲଜ କରି ଧମକ ଦେଉଥିଲେ।ଏଥିରେ ଅପମାନିତ ହୋଇ ସେ ମାନସିକ ଭାରସାମ୍ୟ ହରାଇ ସୋମବାର ମଧ୍ୟାହ୍ନ ପ୍ରାୟ ୧୨ ଟାରେ ଘରେ କେହି ନଥିବା ବେଳେ ଉଷାରାଣୀ କୌଣସି କୀଟନାଶକ ଖାଇ ଦେଇଥିଲେ।ପରିବାର ଲୋକେ ତାଙ୍କୁ ଚିକିତ୍ସା ନିମନ୍ତେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରେ ଭର୍ତ୍ତି କରିଥିଲେ।ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ତାଙ୍କୁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ଼ ଡାକ୍ତରଖାନା କୁ ସ୍ଥାନାନ୍ତର କରାଯାଇଥିଲା।ସେଠାରେ ଅପରାହ୍ନ ପ୍ରାୟ ୨ ଟାରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ଘଟିଥିଲା। ଏନେଇ ଉଷାରାଣୀ ଙ୍କ ବାପା ଦିଗପହଣ୍ଡି ଥାନାରେ ଏତଲା ଦେଇଥିଲେ।ଏତଲାକୁ ଭିତ୍ତିକରି ଆଇଆଇସି କିଶୋର କୁମାର ସାମଲ ମକଦ୍ଦମା ରୁଜୁ କରିଥିଲେ।ପୋଲିସ ଟିମ୍ ବ୍ରହ୍ମପୁର ବଡ଼ ଡାକ୍ତରଖାନା ରେ ପହଞ୍ଚି ମୃତଦେହ ଜବତ କରିବା ସହ ମଙ୍ଗଳବାର ସକାଳେ ବ୍ୟବଚ୍ଛେଦ କରାଇବା ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରିଥିବା ଜଣାପଡିଛି।
