ନୂଆଦିଲ୍ଲୀ, ୨୨ା୫ (ପି.ଟି.):ଆଫ୍ରିକୀୟ ଦେଶଗୁଡ଼ିକରେ କାୟା ମେଲାଇଥିବା ମାରାତ୍ମକ ‘ଇବୋଲା’ ସଂକ୍ରମଣକୁ ଦୃଷ୍ଟିରେ ରଖି ଭାରତ ଏବଂ ଆଫ୍ରିକୀୟ ୟୁନିୟନ (ଏୟୁ) ଏକ ବଡ଼ ନିଷ୍ପତ୍ତି ନେଇଛନ୍ତି। ଚଳିତ ମେ ୨୮ରୁ ୩୧ ତାରିଖ ପର୍ଯ୍ୟନ୍ତ ନୂଆଦିଲ୍ଲୀରେ ହେବାକୁ ଥିବା ଚତୁର୍ଥ ‘ଭାରତ-ଆଫ୍ରିକା ଫୋରମ ସମ୍ମିଳନୀ’ (ଆଇଏଏଫ୍ଏସ୍) କୁ ସ୍ଥଗିତ ରଖାଯାଇଛି। ବୈଦେଶିକ ବ୍ୟାପାର ମନ୍ତ୍ରଣାଳୟ (ଏମ୍ଇଏ) ଗୁରୁବାର ଏହି ମେଗା ଇଭେଣ୍ଟ ସ୍ଥଗିତ ହେବା ନେଇ ସୂଚନା ଦେଇଛି। ଆଫ୍ରିକୀୟ ଦେଶଗୁଡ଼ିକ ସହ ଆଲୋଚନା ପରେ ସମ୍ମିଳନୀର ନୂଆ ତାରିଖ ଧାର୍ଯ୍ୟ କରାଯିବ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ଆଫ୍ରିକାରେ ଇବୋଲାରେ ଏପର୍ଯ୍ୟନ୍ତ ୧୩୬ରୁ ଅଧିକ ଲୋକ ପ୍ରାଣ ହରାଇସାରିଲେଣି।
ଏହି ସମ୍ମିଳନୀ ମାଧ୍ୟମରେ ଆଫ୍ରିକା ମହାଦେଶ ସହ ନିଜର ଦ୍ୱିପାକ୍ଷିକ ସମ୍ପର୍କକୁ ଆହୁରି ମଜଭୁତ କରିବା ପାଇଁ ଭାରତ ଏକ ମହତ୍ତ୍ୱାକାଂକ୍ଷୀ ରୋଡ୍ମ୍ୟାପ ପ୍ରସ୍ତୁତ କରିଥିଲା। ଆଫ୍ରିକାର ଅନେକ ଶୀର୍ଷ ନେତା ଏହି ସମ୍ମିଳନୀରେ ଯୋଗଦେବା ପାଇଁ ସମ୍ମତି ଜଣାଇଥିଲେ। ଏହାପୂର୍ବରୁ ୨୦୧୫ ଅକ୍ଟୋବରରେ ନୂଆଦିଲ୍ଲୀରେ ଶେଷ ଥର ପାଇଁ ଏହି ସମ୍ମିଳନୀ ଆୟୋଜିତ ହୋଇଥିଲା। ୨୦୧୮ରୁ ଭାରତ ଆଫ୍ରିକାରେ ନିଜର କୂଟନୈତିକ ଉପସ୍ଥିତି ବୃଦ୍ଧି କରି ସେଠାରେ ୧୭ଟି ନୂଆ ମିଶନ ଖୋଲିଛି, ଯଦ୍ଦ୍ବାରା ଏବେ ମିଶନ ସଂଖ୍ୟା ୪୬ରେ ପହଞ୍ଚିଛି। ଏଭଳି ସ୍ଥିତିରେ ସମ୍ମିଳନୀ ସ୍ଥଗିତ ହେବା ଦ୍ୱାରା ଦ୍ୱିପାକ୍ଷିକ ଆଲୋଚନା କିଛି ସମୟ ପାଇଁ ବିଳମ୍ବିତ ହୋଇଛି।
Dharitri – Odisha’s No.1 Odia Daily
