ଭୋପାଳ,୨୨ା୫: ଆସନ୍ତା ମେ ୨୯ରୁ ଜୁନ୍ ୬ ପର୍ଯ୍ୟନ୍ତ ଜାପାନର କାକାମିଗାହାରାଠାରେ ହେବାକୁଥିବା ୧୮ ବର୍ଷରୁ କମ୍ ଏସିଆ କପ୍ ହକି ପ୍ରତିଯୋଗିତା ପାଇଁ ଫରଓ୍ବାର୍ଡ କେତନ କୁଶଓ୍ବାହାଙ୍କୁ ଭାରତୀୟ ଦଳର ଅଧିନାୟକ ମନୋନୀତ କରାଯାଇଛି।
ଦଳ ମନୋନୟନ ପୂର୍ବରୁ ସର୍ଦ୍ଦାର ସିଂ ଓ ରଜନିଶ ମିଶ୍ରାଙ୍କ ନେତୃତ୍ୱରେ କୋଚିଂ ଷ୍ଟାଫ ଦଳର ତତ୍ତ୍ୱାବଧାନରେ ସମ୍ଭାବ୍ୟ ଖେଳାଳିମାନଙ୍କୁ ନେଇ ଏକ କୋଚିଂ କ୍ୟାମ୍ପ ସାଇ ଭୋପାଳ ପରିସରରେ ଥିବା ଉଦ୍ଧବ ଦାସ ମେହେଟା (ଭାଇ ଜୀ) ସେଣ୍ଟ୍ରାଲ ସେଣ୍ଟରଠାରେ ଏକ ଜାତୀୟ କୋଚିଂ ଶିବିରର ଆୟୋଜନ କରାଯାଇଥିଲା।
ଦଳ ପ୍ରସ୍ତୁତି ପାଇଁ ଭୋପାଳଠାରେ ଅଷ୍ଟ୍ରେଲିଆର ୧୮ ବର୍ଷରୁ କମ୍ ଦଳ ବିପକ୍ଷରେ ଏକ ୪ ମ୍ୟାଚ ବିଶିଷ୍ଟ ଏକ ହାଇ ପ୍ରୋଫାଇଲ ସିରିଜ ଇତିମଧ୍ୟରେ ଖେଳାଯାଇ ସାରିଛି। ଏଥିରେ ଭାରତୀୟ ଦଳ ଗୋଟିଏ ମ୍ୟାଚ ଜିତିଥିବା ବେଳେ ଗୋଟିଏ ମ୍ୟାଚରେ ପରାଜିତ ହୋଇଥିଲା।
ଅନ୍ୟ ୨ଟି ଡ୍ର ଭାବେ ଶେଷ ହୋଇଥିଲା। ଟୁର୍ନାମେଣ୍ଟରେ ଦକ୍ଷିଣ କୋରିଆ, ଆୟୋଜକ ଜାପାନ, ଚାଇନିଜ ତାଇପେ ଓ କାଜାଖସ୍ତାନ ସହ ଭାରତ ପୁଲ୍ ‘ଏ’ରେ ସ୍ଥାନ ପାଇଛି। ପୁଲ୍ ପର୍ଯ୍ୟାୟରେ ୨୯ରେ ଭାରତ ପ୍ରଥମେ କାଜାଖସ୍ତାନ ବିପକ୍ଷରେ ଖେଳି ଏହାର ଅଭିଯାନ ଆରମ୍ଭ କରିବ।
ଦଳ ପରେ ମେ ୩୧ରେ ଜାପାନ ଓ ଜୁନ୍ ୧ରେ ଦକ୍ଷିଣ କୋରିଆ ଏବଂ ଜୁନ୍ ୩ରେ ଚାଇନିଜ ତାଇପେ ସହ ମୁକାବିଲା କରିବ। ଗ୍ରୁପ୍ ପର୍ଯ୍ୟାୟ ଖେଳ ଶେଷ ହେବା ପରେ ପୁଲ୍ ‘ଏ’ ଓ ପୁଲ୍ ‘ବି’ର ଶ୍ରେଷ୍ଠ ଦୁଇ ଦଳ ସିଧାସଳଖ ଜୁନ୍ ୫ ସେମିଫାଇନାଲକୁ ଉନ୍ନୀତ ହେବେ। ଜୁନ୍ ୬ରେ ଫାଇନାଲ ଖେଳାଯିବ।
୧୮ ବର୍ଷରୁ କମ୍ ଭାରତୀୟ ଦଳ: ଗୋଲକିପର: ସାଓ୍ବନ କୁମାର, ଆୟୁଷ ରାଜାକ। ଡିଫେଣ୍ଡର: ଅଂଶ ବହୁତ୍ରା, ଅର୍ମାନ ସୋରେଙ୍ଗ, ଆଶିଷ ଟାନି ପୂର୍ତ୍ତୀ, ଅର୍ଶଦୀପ ସିଂ, ଅଭି ମାଣିିକପୁରୀ, ରୋମିତ ପାଲ୍। ମିଡ୍ଫିଲ୍ଡର: ରାହୁଲ ଯାଦବ, ପ୍ରେମଚାନ୍ଦ ସଏ, ବରିନ୍ଦର ସିଂ, କରଣ ଗୌତମ ଓ ସିଦ୍ଧାର୍ଥ ବେନ୍।
ଫରଓ୍ବାର୍ଡ: କେତନ କୁଶ୍ୱାହା (ଅଧିନାୟକ), ଆକାଶ ଦୀପ, ଗାଜି ଖାନ୍, ଶାହରୁଖ ଅଲି ଓ ପ୍ରହଲ୍ଲାଦ ରାଜବୀର।
