ନୂଆଦିଲ୍ଲୀ,୨୧।୫: ଦେଶ ସବୁଠାରୁ ନାମୀଦାମୀ ବ୍ୟଙ୍କରେ ୬ ଦିନ ଝୁଲିବ ତାଲା । ପାଖାପାଖି ୨୩୨୭୦ ଶାଖା, ୬୩୦୦୦ରୁ ଅଧିକ ATM ୫୦ କୋଟିରୁ ଅଧିକ ଗ୍ରାହକଙ୍କ ପାଇଁ ଆସିଛି ବଡ଼ ଖବର । ଏହି ବ୍ୟାଙ୍କରେ ପ୍ରାୟତଃ ପ୍ରତ୍ୟେକ ପରିବାରର ଆକଉଣ୍ଟ ଥିବ । ଭାରତୀୟ ଷ୍ଟେଟ ବ୍ୟାଙ୍କ ଅର୍ଥାତ୍ SBIର କର୍ମଚାରୀମାନେ ୬ ଦିନିଆ ଧର୍ମଘଟ କରୁଛନ୍ତି। ବ୍ୟାଙ୍କ ଧର୍ମଘଟ ଏବଂ ଛୁଟି ପାଇଁ, ଲଗାତାର ୬ ଦିନ ବ୍ୟାଙ୍କର ଶାଖାଗୁଡ଼ିକ ବନ୍ଦ ରହିବ। ଯଦିଓ ବ୍ୟାଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ସରକାରୀ ଘୋଷଣା କରାଯାଇ ନାହିଁ, କିନ୍ତୁ ସାରା ଦେଶରେ SBI କର୍ମଚାରୀମାନେ ଦରମା, ପେନସନ ଇତ୍ୟାଦି ବିଭିନ୍ନ ଦାବି ପାଇଁ ଧର୍ମଘଟ ଡାକରା ଦେଇଛନ୍ତି। ଧର୍ମଘଟ, ସାପ୍ତାହିକ ଛୁଟି ଏବଂ ପର୍ବପର୍ବାଣୀ ଛୁଟି ଯୋଗୁଁ, SBI ବ୍ୟାଙ୍କଗୁଡ଼ିକ ଲଗାତାର ୬ ଦିନ ପାଇଁ ବନ୍ଦ ରଖିଛନ୍ତି।
ବ୍ୟାଙ୍କ କର୍ମଚାରୀ ସଂଘ ୨୫ ଏବଂ ୨୬ ମଇ, 2026 ରେ ଧର୍ମଘଟ କରିବାକୁ ସ୍ଥିର କରିଛି। ଏହି ଧର୍ମଘଟ ଯୋଗୁଁ ସୋମବାର ଏବଂ ମଙ୍ଗଳବାର ବ୍ୟାଙ୍କ ଶାଖାଗୁଡ଼ିକ ବନ୍ଦ ରହିବ। SBI କର୍ମଚାରୀ ସଂଘ, ଅଲ୍ ଇଣ୍ଡିଆ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ଷ୍ଟାଫ୍ ଫେଡେରେସନ୍ (AISBISF) ଧର୍ମଘଟ ଡାକରା ଦେଇଛି। ସେମାନେ ବ୍ୟାଙ୍କ ସମ୍ମୁଖରେ ନୂଆ ନିଯୁକ୍ତି, ପେନସନ୍ ବ୍ୟବସ୍ଥା, ପ୍ରମୋସନ ଏବଂ କର୍ମଚାରୀଙ୍କ ପାଇଁ ଉନ୍ନତ କାର୍ଯ୍ୟ ସୁବିଧା ସମେତ ୧୬ଟି ପ୍ରମୁଖ ଦାବି ରଖିଛନ୍ତି। କର୍ମଚାରୀମାନେ ଜାତୀୟ ପେନସନ୍ ବ୍ୟବସ୍ଥା (NPS) ପ୍ରତି ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି। ଧର୍ମଘଟ ପୂର୍ବରୁ ଅନେକ ପର୍ଯ୍ୟାୟରେ ପ୍ରତିବାଦ କରାଯିବ ବୋଲି ବ୍ୟାଙ୍କ ୟୁନିଅନ୍ ସ୍ପଷ୍ଟ କରିଛି।
ମେ ୨୩ ତାରିଖ, ଚତୁର୍ଥ ଶନିବାର ଦିନ ସାରା ଦେଶରେ ବ୍ୟାଙ୍କଗୁଡ଼ିକ ବନ୍ଦ ରହିବ। ମେ ୨୪ ତାରିଖ ରବିବାର ଛୁଟି ରହିବ । କର୍ମଚାରୀ ସଂଘର ଧର୍ମଘଟ ଯୋଗୁଁ ୨୦୨୬ ମଇ ୨୫ ଏବଂ ୨୬ ତାରିଖରେ ବ୍ୟାଙ୍କଗୁଡ଼ିକ ବନ୍ଦ ରହିବ। ମେ ୨୭ ଏବଂ ୨୮ ତାରିଖରେ ମଧ୍ୟ ଅନେକ ରାଜ୍ୟରେ ବ୍ୟାଙ୍କଗୁଡ଼ିକ ବନ୍ଦ ରହିବ। Bakrid (Eid al-Adha) ଅବସରରେ ଭାରତୀୟ ରିଜର୍ଭ ବ୍ୟାଙ୍କ ୨୭ ଏବଂ ୨୮ ମଇରେ ବ୍ୟାଙ୍କ ଛୁଟି ଘୋଷଣା କରିଛି। ୨୭ ମଇରେ ଅଗରତାଲା, ଅହମ୍ମଦାବାଦ, ଭୋପାଳ, ଚଣ୍ଡିଗଡ଼, ଡେରାଡୁନ, ଗୌହାଟି, ହାଇଦ୍ରାବାଦ, ଇମ୍ଫାଲ, ଜମ୍ମୁ, କାନପୁର, କୋଚି, କୋଲକାତା, କୋହିମା, ଲକ୍ଷ୍ନୌ, ନୂଆଦିଲ୍ଲୀ, ରାୟପୁର, ରାଞ୍ଚି, ଶିଲଂ, ଶ୍ରୀନଗର, ତିରୁବନନ୍ତପୁରମ, ବିଜୟୱାଡା, ଶିମଲା, ରାଞ୍ଚି, ରାୟପୁର ଭଳି ସହରରେ ବ୍ୟାଙ୍କ ବନ୍ଦ ରହିବ। ୨୮ ମଇରେ ବେଲାପୁର, ବେଙ୍ଗାଲୁରୁ, ଚେନ୍ନାଇ, ଜୟପୁର, ଜମ୍ମୁ, ମୁମ୍ବାଇ, ନାଗପୁର, ପାନାଜୀ, ପାଟନା ଏବଂ ଶ୍ରୀନଗରରେ ବ୍ୟାଙ୍କ ବନ୍ଦ ରହିବ।
