ଲକ୍ଷ୍ନୌ, ୨୭।୬- ଉତ୍ତର ପ୍ରଦେଶର କନୌଜ ଜିଲାରେ ଘଟିଯାଇଥିବା ଏକ ଦୁଃଖଦାୟକ ଘଟଣା ଏବେ ସାମ୍ନାକୁ ଆସିଛି। ବାହାଘର ପୂର୍ବରୁ ହଠାତ୍ କନ୍ୟାର ଜୀବନ ଚାଲିଯିବାରୁ ବରକୁ ଶେଷରେ ଖାଲି ହାତରେ ଫେରିବାକୁ ପଡ଼ିଛି। ଶୁକ୍ରବାର କାନପୁର ନିବାସୀ ସନ୍ତୋଷ ଓ କନୌଜର ବିନିତାଙ୍କ ମଧ୍ୟରେ ଶୁଭପରିଣୟ ଅନୁଷ୍ଠିତ ହେବାର ଥିଲା। ବର ସନ୍ତୋଷ ବ୍ୟାଣ୍ଡ୍ ବଜାଇ ନାଚଗୀତରେ ମସଗୁଲ ହୋଇ ବରଯାତ୍ରୀ ସହ ସନ୍ଧ୍ୟାରେ କନ୍ୟା ଘରେ ପହଞ୍ଚତ୍ଥିଲା। କନ୍ୟାଘର ପକ୍ଷରୁ ସନ୍ତୋଷଙ୍କୁ ପାଛୋଟି ବେଦୀକୁ ନିଆଯାଇଥିଲା। ତେବେ ହଠାତ୍ ଘଟିଯାଇଥିଲା ଏକ ଅଘଟଣ। ହାତରେ ମେହେନ୍ଦୀ ଲଗାଇ ନବବଧୂ ବେଶରେ ସଜେଇ ହୋଇ ବରକୁ ଅପେକ୍ଷା କରିଥିବା କନ୍ୟା ବିନିତାର ଦେହ ହଠାତ୍ ଅସୁସ୍ଥ ହୋଇପଡ଼ିଥିଲା। ପରିବାର ଲୋକେ ମେଡିକାଲକୁ ନେଇଥିଲେ ମଧ୍ୟ ତାଙ୍କୁ ବଞ୍ଚାଇବା ସମ୍ଭବପର ହୋଇପାରି ନ ଥିଲା। ବିନିତାଙ୍କ ଆକସ୍ମିକ ବିୟୋଗରେ ହସଖୁସି ଆନନ୍ଦ ଭିତରେ ମସଗୁଲ ଥିବା ପରିବାର ଲୋକଙ୍କ କାନ୍ଦବୋବାଳିରେ ପୁରା ପରିବେଶ ଫାଟି ଯାଇଥିଲା। ସେଠାରେ ଉପସ୍ଥିତ ଲୋକେ ଏହି ଘଟଣାରେ ପୁରା ସ୍ତବ୍ଧ ହୋଇଯାଇଥିଲେ। ପାଲିଙ୍କିରେ ଯିବା ବଦଳରେ କନ୍ୟା ଶେଷରେ ସେହି ବୋହୁ ବେଶରେ କୋକେଇରେ ମଶାଣୀ ଯାଇଥିଲେ। ସେହିଭଳି ବର ଖାଲି ହାତରେ ଘରକୁ ଫେରିଥିବା ଜଣାପଡ଼ିଛି।
