ପୁରୀ ଅଫିସ,୮।୧୦: ଶ୍ରୀକ୍ଷେତ୍ରରେ ଚାଲିଛି ଶାରଦୀୟ ପୂଜା। ଉତ୍ସବମୁଖର ସହର। ବିଭିନ୍ନ ଦେବୀ ପୀଠରେ ଚାଲିଛି ଷୋଡ଼ଶ ପୂଜା। ଚଳଚଞ୍ଚଳ ଦେବୀ ପୀଠ। ସକାଳଠାରୁ ଦେବୀ ପୀଠ ଏବଂ ପୂଜା ମଣ୍ଡପରେ ଭକ୍ତଙ୍କ ସମାଗମ। ମା’ ଶ୍ୟାମାକାଳୀ, ଦକ୍ଷିଣକାଳୀ, ମରିଚି ଠାକୁରାଣୀ, ରାମଚଣ୍ଡୀ ଠାକୁରାଣୀ, ମା ଚର୍ଚ୍ଚିକା, ଗୋବର୍ଦ୍ଧନ ପୀଠସ୍ଥିତ ମା’ ବିମଳା, ଜହ୍ନିଖାଇ, କାକୁଡିଖାଇ ଏବଂ ବାଟମଙ୍ଗଳା, ମା’ ଝାଡେଶ୍ୱରୀ ଠାକୁରାଣୀଙ୍କ ପୀଠରେ ଚାଲିଛି ଷୋଡ଼ଶ ଉପଚାର ପୂଜା। ସକାଳ ଭୋର ଦ୍ୱାର ଫିଟା ଏବଂ ସମସ୍ତ ଦେବ ନୀତି ସମାପ୍ତି ପରେ ସର୍ବସାଧାରଣଙ୍କ ଦର୍ଶନ ଆରମ୍ଭ ହୋଇଥିଲା। ଅନ୍ୟପଟେ ଶ୍ରୀମନ୍ଦିରରେ ଭକ୍ତଙ୍କ ସମାଗମ ହୋଇଛି। ମହାପ୍ରଭୁଙ୍କ ଦର୍ଶନ ସହ ମା’ ବିମଳାଙ୍କ ମନ୍ଦିରରେ ଭକ୍ତଙ୍କ ଭିଡ ଲାଗିଛି।
ଏହି ସମୟରେ ମା’ଙ୍କ ନବଦିନ ୍ଯଯାପୀ ବିଭିନ୍ନ ବେଶରେ ଦର୍ଶନ ଦେଇଥାନ୍ତି। ସକାଳେ ଶୁଖିଲା ଭୋଗ ସହ ମଧ୍ୟାହ୍ନ ଏବଂ ରାତ୍ରିରେ ଶଙ୍ଖୁଡି ଭୋଗ ହୋଇଥାଏ। ମା’ଙ୍କ ଅପୂର୍ବ ବେଶର ଦର୍ଶନ ଏବଂ ସାନ୍ନିଧ୍ୟ ଲାଗି ଭକ୍ତଙ୍କ ଭିଡ ଜମୁଛି। ବର୍ଷ ସାରା ଏହି ପୀଠ ଗୁଡିକରେ ଭିଡ ଲାଗି ରହୁଥାଏ। ଶାରଦୀୟ ପୂଜା ସମୟରେ ମା’ଙ୍କୁ ଦର୍ଶନ କରିଲେ, ପୁଣ୍ୟପ୍ରାପ୍ତି ସହିତ ପରିବାର ସୁଖଶାନ୍ତିରେ ପରିପୂର୍ଣ୍ଣ ହୋଇଥାଏ ବୋଲି ଲୋକ ବିଶ୍ୱାସ ରହିଛି। ମା’ଙ୍କ କୃପାଲାଭ ଲାଗି ଏଠାକୁ ରାଜ୍ୟ ତଥା ରାଜ୍ୟ ବାହାରୁ ଭକ୍ତଙ୍କ ସୁଅ ଛୁଟିବାରେ ଲାଗିଛି। ବିଶେଷତଃ ଶ୍ୟାମାକାଳୀ, ଦକ୍ଷିଣକାଳୀ, ମା’ ବିମଳା, ରାମଚଣ୍ଡୀ, ବାଟ ମଙ୍ଗଳାଙ୍କ ପୀଠରେ ଲକ୍ଷାଧିକ ଭକ୍ତଙ୍କ ସମାଗମ ହେଉଛି। ଶ୍ରୀକ୍ଷେତ୍ରକୁ ଆସୁଥିବା ଭକ୍ତ ପ୍ରଥମେ ବାଟରେ ବାଟମଙ୍ଗଳାଙ୍କ କୃପା ଲାଭ କରି ଶ୍ରୀକ୍ଷେତ୍ରରେ ପ୍ରବେଶ କରିଥାନ୍ତି। ପୁଣି ଫେରିବାବେଳେ ମା’ଙ୍କ ଦର୍ଶନ କରି ଫେରନ୍ତି। ଅନ୍ୟପଟେ ଶ୍ରୀକ୍ଷେତ୍ର ଘରେ ଘରେ ଚାଲିଛି ମା’ଙ୍କ ଷୋଡ଼ଶ ଉପଚାର ପୂଜା। କେତେକ ନବଦିନବ୍ୟାପୀ ପୂଜା କରୁଥିବାବେଳେ ଆଉ କେତେକ ସପ୍ତମୀଠାରୁ ଦଶମୀ ପୂଜା କରନ୍ତି। ଚଳିତ ବର୍ଷ ବଡଶଙ୍ଖ ଦୁର୍ଗାପୂଜା କମିଟି ପକ୍ଷରୁ ଦୁର୍ଗା ପୂଜା ମହାଆଡମ୍ବରରେ ଆରମ୍ଭ ହୋଇଛି। ଶାରଦୀୟ ପୂଜା ଅବରସରେ ସମସ୍ତ ଦେବୀପୀଠଗୁଡିକୁ ଆଲୋକମାଳାରେ ସଜ୍ଜିତ କରାଯାଇଛି। ସନ୍ଧ୍ୟା ହେଲେ ବିଭିନ୍ନ ରଙ୍ଗିନ ଆଲୋକମାଳାରେ ପୁରୀ ସହର ଝଲସୁଛି।
