ଭୁବନେଶ୍ୱର, ୨୬ା୯(ବ୍ୟୁରୋ): ରାଜ୍ୟର ବିଜ୍ଞାପିତ ଅଞ୍ଚଳ ପରିଷଦ (ଏନ୍ଏସି), ମ୍ୟୁନିସିପାଲିଟି ଏବଂ ସମସ୍ତ ମହାନଗର ନିଗମରେ ବ୍ୟବସ୍ଥିତ ବସ୍ତି ଯୋଜନା (ସ୍ଲମ ପ୍ରୁଫିଙ୍ଗ୍) କାର୍ଯ୍ୟକାରୀ ହେବ। ଯେଉଁଠି ନାହିଁ ସେଠି ବସ୍ତି ଗଢ଼ି ଉଠିବାକୁ ସୁଯୋଗ ଦିଆଯିବ ନାହିଁ। ବସ୍ତି ନିକଟରେ ଥିବା ଖାଲି ସ୍ଥାନରେ ସ୍ଲମ୍ ପ୍ରୁଫିଙ୍ଗ୍ ବ୍ୟବସ୍ଥା ହେବ। ସେଥିରେ ନିମ୍ନ ଆୟକାରୀ, ଗରିବ ଦିନମଜୁରିଆମାନଙ୍କ ରହିବା ପାଇଁ କୋଠାଘର ନିର୍ମାଣ କରାଯିବ। ସେହି ଅଞ୍ଚଳରେ ଲୋକମାନଙ୍କୁ ନିଜର ଘର କରି ରହିବା ପାଇଁ ମଧ୍ୟ ଅନୁମତି ଦିଆଯିବ। ଯେଉଁମାନେ ଘର କରିପାରିବେ ନାହିଁ ସେମାନେ ପୌର ପରିଷଦ ଦ୍ୱାରା ନିର୍ମାଣ କରାଯାଇଥିବା ଘରେ ସର୍ବନିମ୍ନ ଭଡ଼ା ଦେଇ ରହିପାରିବେ। ସହରାଞ୍ଚଳରେ ନିମ୍ନ ଆୟକାରୀ ଗରିବ ଶ୍ରେଣୀର ଲୋକମାନେ ଉଚ୍ଚ ଘରଭଡ଼ା ଦେଇ ରହିପାରୁ ନ ଥିବାରୁ ବେଆଇନ ଭାବେ ମୂଲ୍ୟବାନ ସରକାରୀ ଜାଗା ଓ ରାସ୍ତାକଡ଼ରେ ଝାଟିମାଟି ଘର କରି ରହୁଛନ୍ତି। ଏହାଦ୍ୱାରା ସହରାଞ୍ଚଳରେ ବସ୍ତି ସଂଖ୍ୟା ବଢ଼ି ଚାଲିବା ସହ ଅନେକ ସରକାରୀ ଜାଗା ଦୀର୍ଘ ବର୍ଷ ଜବରଦଖଲରେ ରହିଯାଉଛି। ବେଆଇନ ବସ୍ତିକୁ ରୋକିବା ପାଇଁ ସ୍ଲମ ପ୍ରୁଫିଙ୍ଗ୍ କାର୍ଯ୍ୟକାରୀ ହେବ। ପାଇଲଟ ପ୍ରକଳ୍ପ ଭାବେ ପ୍ରଥମେ ବ୍ରହ୍ମପୁର ମହାନଗର ନିଗମରୁ ଆରମ୍ଭ କରାଯିବ। ନିଗମ ପକ୍ଷରୁ ଏ ନେଇ ରାଜ୍ୟ ସରକାରଙ୍କୁ ଏକ ପ୍ରସ୍ତାବ ଦିଆଯାଇଛି। ବ୍ରହ୍ମପୁର ସହରରେ ଏହି ବ୍ୟବସ୍ଥା କାର୍ଯ୍ୟକାରୀ ସଫଳ ହେଲେ ଅନ୍ୟ ସହରାଞ୍ଚଳରେ କାର୍ଯ୍ୟକାରୀ କରାଯିବ ବୋଲି ପୌର ପ୍ରଶାସକ ସଂଗ୍ରାମଜିତ୍ ନାୟକ କହିଛନ୍ତି। ଏହି ନୂତନ ବ୍ୟବସ୍ଥାରେ ବସ୍ତିବାସିନ୍ଦାଙ୍କୁ ସମସ୍ତ ପ୍ରକାର ମୌଳିକ ସୁବିଧା ପାଣି, ଆଲୋକ, ଡ୍ରେନ, ପରିମଳ ଆଦି ଯୋଗାଇ ଦିଆଯିବ।
