ଥୁଆମୂଳ ରାମପୁର, ୩୦।୫(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅନ୍ତର୍ଗତ କୋଷାବରା ସ୍ଥିତ ହେଲୋ ପଏଣ୍ଟ (ନାଏକପଡ଼ା) ଛକ ନିକଟରେ ଶନିବାର ମଧ୍ୟାହ୍ନ ପ୍ରାୟ ୧୨ଟା ୫୫ ମିନିଟ ସମୟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଏକ ଦ୍ରୁତଗାମୀ ଧାନକୁଣ୍ଡା ବୋଝେଇ ମାକ୍ସ ପିକଅପ୍ ଭ୍ୟାନ୍ ଏବଂ ମୋଟରସାଇକେଲ ମଧ୍ୟରେ ସାମ୍ନାସାମ୍ନି ଜୋରଦାର ଧକ୍କା ହେବା ଫଳରେ ଜଣେ ୨୨ ବର୍ଷୀୟ ଯୁବକ ଗୁରୁତର ଆହତ ହୋଇଛନ୍ତି। ଗୁରୁତର ଯୁବକଜଣକ ହେଲେ କୋଷାବରା ଗ୍ରାମର ହାର୍ଜୁ ମାଝୀଙ୍କ ପୁଅ ହିମାଞ୍ଚଳ ମାଝୀ (୨୨)।
ମିଳିଥିବା ସୂଚନା ମୁତାବକ, ହିମାଞ୍ଚଳ ଏକ ବାଇକ (ଓଡି୦୮ଆର ୭୯୬୭) ଯୋଗେ କୋଷାବରାରୁ ଥୁଆମୂଳ ରାମପୁର ଆଡ଼କୁ ଆସୁଥିଲେ। ଏହି ସମୟରେ ହେଲୋ ପଏଣ୍ଟ ଛକ ନିକଟରେ ଥୁଆମୂଳ ରାମପୁର ପଟୁ ଅତି ଦ୍ରୁତ ଗତିରେ ଆସୁଥିବା ଏକ ଧାନକୁଣ୍ଡା ବୋଝେଇ ମାକ୍ସ ପିକଅପ (ଓଡ଼ି୨୪ଏଫ୩୯୭୪) ସହ ବାଇକର ସାମ୍ନାସାମ୍ନି ଧକ୍କା ହୋଇଥିଲା। ଧକ୍କା ଏତେ ଭୟାବହ ଥିଲା ଯେ ବାଇକଟି ସମ୍ପୂର୍ଣ୍ଣ ଚୂରମାର ହୋଇଯାଇଥିବା ବେଳେ ପିକଅପ ଗାଡ଼ିର ସମ୍ମୁଖ ଭାଗ ଏବଂ କାଚ ଭାଙ୍ଗିଯାଇଛି। ଦୁର୍ଘଟଣା ଘଟାଇଥିବା ପିକଅପ୍ ଗାଡ଼ିଟି ଖମାରପଦର ଅଞ୍ଚଳର ବୋଲି ଜଣାପଡ଼ିଛି। ଦୁର୍ଘଟଣା ପରେ ଚାଳକଙ୍କୁ ସ୍ଥାନୀୟ ଥାନାରେ ଅଟକ ରଖାଯାଇଛି।
ଦୁର୍ଘଟଣା ପରେ ହିମାଞ୍ଚଳ ରାସ୍ତା ଉପରେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ପଡ଼ି ରହିଥିଲେ। ତାଙ୍କ ମୁଣ୍ଡରେ ଗଭୀର ଆଘାତ ଲାଗିବା ସହ ବାମ ଗୋଡ଼ଟି ସମ୍ପୂର୍ଣ୍ଣ ଭାଙ୍ଗି ଯାଇଥିଲା। ଗ୍ରାମବାସୀ ଓ ପରିବାରଲୋକେ ତାଙ୍କୁ ତୁରନ୍ତ ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ।
ସେଠାରେ ଡାକ୍ତର ଶକ୍ତି ସାଗର ପ୍ରାଥମିକ ଚିକିତ୍ସା କରିବା ସହ ଅବସ୍ଥା ଗୁରୁତର ଥିବାରୁ ଏବଂ ଅସ୍ଥିଶଲ୍ୟ ଚିକିତ୍ସାର ଆବଶ୍ୟକତା ଥିବାରୁ ଭବାନୀପାଟଣାସ୍ଥିତ ଜିଲା ମୁଖ୍ୟ ଚିକିତ୍ସାଳୟକୁ ରେଫର କରିଛନ୍ତି। ଏ ସଂକ୍ରାନ୍ତରେ ଆହତଙ୍କ ପରିବାର ପକ୍ଷରୁ ଚିକିତ୍ସା ଖର୍ଚ୍ଚ ଏବଂ କ୍ଷତିପୂରଣ ଦାବି କରି ଥୁଆମୂଳ ରାମପୁର ଥାନାରେ ଏକ ଲିଖିତ ଅଭିଯୋଗ ଦାୟର କରାଯାଇଛି।
ଏହି ଦୁର୍ଘଟଣା ସ୍ଥାନୀୟ ସ୍ବାସ୍ଥ୍ୟସେବାର ଏକ ସଂଗୀନ ଚିତ୍ରକୁ ପଦାରେ ଆଣିଛି। ଜରୁରୀକାଳୀନ ସେବା ପାଇଁ ପରିବାର ଲୋକେ ନାହିଁ ନ ଥିବା ହଇରାଣ ହୋଇଥିବା ଦେଖିବାକୁ ମିଳିଛି। ଗୁରୁତର ଆହତ ହିମାଞ୍ଚଳଙ୍କୁ ମେଡିକାଲ ଆଣିବା ପାଇଁ ପରିବାର ଲୋକେ ପ୍ରଥମେ ୧୦୮ ଆମ୍ବୁଲାନ୍ସ ସେବାକୁ ଯୋଗାଯୋଗ କରିଥିଲେ, ମାତ୍ର କୌଣସି ଆମ୍ବୁଲାନ୍ସ ଖାଲି ନାହିଁ ବୋଲି ରୋକଠୋକ ମନା କରିଦିଆଯାଇଥିଲା। ଏହାପରେ ୧୧୨ ଜରୁରୀକାଳୀନ ନମ୍ବରକୁ ସମ୍ପର୍କ କରାଯାଇଥିଲେ ମଧ୍ୟ ସେଠାରୁ କୌଣସି ସହାୟତା ମିଳିନଥିଲା। ଶେଷରେ ବାଧ୍ୟ ହୋଇ ପରିବାର ଲୋକେ ଏକ ବୋଲେରୋ ଗାଡ଼ି ଭଡ଼ା କରି ଆହତଙ୍କୁ ମେଡିକାଲ ଆଣିଥିଲେ।
ଅନୁସନ୍ଧାନରୁ ଜଣାପଡ଼ିଛି ଯେ, ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଥିବା ଦୁଇଟି ଆମ୍ବୁଲାନ୍ସ ମଧ୍ୟରୁ ଗୋଟିଏ ଗତ କିଛି ଦିନ ତଳେ ଜିଲା ମେଡିକାଲରୁ ଫେରିବା ସମୟରେ ଭବାନୀପାଟଣା ମେଡିକାଲ ଛକ ନିକଟରେ ଦୁର୍ଘଟଣାଗ୍ରସ୍ତ ହୋଇଛି। ଅପରପକ୍ଷରେ, ଦ୍ୱିତୀୟ ଆମ୍ବୁଲାନ୍ସଟି ବିରିକୋଟଠାରେ ଯାନ୍ତ୍ରିକ ତ୍ରୁଟି ଯୋଗୁ ଗତ ୨ ଦିନ ହେଲା ଅଚଳ ହୋଇ ପଡ଼ିରହିଛି। ଫଳରେ ଗତ ୩ ଦିନ ହେଲା ସମଗ୍ର ଅଞ୍ଚଳରେ ଆମ୍ବୁଲାନ୍ସ ସେବା ସମ୍ପୂର୍ଣ୍ଣ ଠପ ହୋଇଯାଇଛି।
କେବଳ ଆମ୍ବୁଲାନ୍ସ ନୁହେଁ, ମେଡିକାଲର ବିଦ୍ୟୁତ ସେବା ମଧ୍ୟ ବିପର୍ଯ୍ୟସ୍ତ ହୋଇପଡ଼ିଛି। ଆଜି ଆହତ ଯୁବକଙ୍କ ମୁଣ୍ଡ ଏବଂ ଗୋଡ଼ରୁ ପ୍ରବଳ ରକ୍ତସ୍ରାବ ହେଉଥିବାରୁ ଡାକ୍ତର ଷ୍ଟିଚ୍ କରୁଥିବା ସମୟରେ ଲାଇଟ ନ ଥିଲା। ଫଳରେ ମେଡିକାଲ କର୍ତ୍ତୃପକ୍ଷ ମୋବାଇଲ ଟର୍ଚ୍ଚ ଆଲୁଅରେ ଷ୍ଟିଚ କରିବାକୁ ବାଧ୍ୟ ହୋଇଥିଲେ।
ତେବେ ସମଗ୍ର ଅଞ୍ଚଳରେ ସାଧାରଣ ଲୋକେ ଜରୁରୀକାଳୀନ ସେବାରୁ ବଞ୍ଚିତ ହେଉଥିବାରୁ, ତୁରନ୍ତ ଏହି ଆମ୍ବୁଲାନ୍ସ ଓ ବିଦ୍ୟୁତ ସମସ୍ୟାର ସମାଧାନ କରିବା ପାଇଁ ସ୍ଥାନୀୟ ଜନସାଧାରଣରେ ତୀବ୍ର ଦାବି ହେଉଛି।
