ଥୁଆମୂଳ ରାମପୁର, ୩୦।୫ (ଦୁର୍ଗା କୀର୍ତ୍ତି):ଦୁଃଖ ଉପରେ ଦୁଃଖ। ବିଧାତାଙ୍କ ବିଚିତ୍ର ଲୀଳା ଆଗରେ ହାର ମାନିଛି ଗରିବ ପରିବାର। କେରଳ ରାଜ୍ୟକୁ ଦାଦନ ଖଟିବାକୁ ଯାଇ ରକ୍ତକୁ ପାଣି କରି ରୋଜଗାର କରିଥିବା ଅର୍ଥରେ ମୁଣ୍ଡ ଗୁଞ୍ଜିବା ପାଇଁ ଗଢ଼ିଥିବା ସପ୍ନର ଘରକୁ ମାତ୍ର କେତେକ ମିନିଟ୍ର କାଳବୈଶାଖୀ ପବନ ଉଡ଼ାଇ ନେଇଛି।
ସୂଚନା ଅନୁଯାୟୀ, ଗତ ଶୁକ୍ରବାର ସନ୍ଧ୍ୟାରେ ଆସିଥିବା ପ୍ରଳୟଙ୍କରୀ କାଳବୈଶାଖୀ ଝଡ଼ରେ ଥୁଆମୂଳ ରାମପୁର ବ୍ଲକର ବିଭିନ୍ନ ସ୍ଥାନରେ ବ୍ୟାପକ କ୍ଷୟକ୍ଷତି ଘଟିଛି।
ଗୁଣୁପୁର ଅଞ୍ଚଳର କାଠଘରା ଗ୍ରାମର ସ୍ୱର୍ଗତ ରାମକୃଷ୍ଣ ନାଏକଙ୍କ ପୁଅ ଗଜିନ୍ଦ୍ର ନାଏକଙ୍କ ସପ୍ନର ଘର ଏହି ଝଡ଼ରେ ସମ୍ପୂର୍ଣ୍ଣ ଭାବେ ଭାଙ୍ଗି ଚୁରମାର୍ ହୋଇଯାଇଛି। ଗଜିନ୍ଦ୍ର କେରଳରେ ଦାଦନ ଶ୍ରମିକ ଭାବେ କାମ କରି ଅତ୍ୟନ୍ତ କଷ୍ଟରେ ରୋଜଗାର କରିଥିବା ଅର୍ଥରେ ଏହି ଆଜବେଷ୍ଟସ ଘରଟି ନିର୍ମାଣ କରିଥିଲେ। ସେ ତାଙ୍କ ସ୍ତ୍ରୀ ମାଳତି, ପୁଅ ସୌମ୍ୟରଞ୍ଜନ ଓ ଝିଅ ଦୀପାଞ୍ଜଳିଙ୍କ ସହ ସେଠାରେ ରହୁଥିଲେ।
ପୂର୍ବରୁ ପିତାଙ୍କ ଦେହାନ୍ତ ପରେ ସରକାରୀ ଯୋଜନାରେ ମିଳିଥିବା ଛୋଟ ଘରରେ ତାଙ୍କ ଚାରି ସାନଭାଇ ଓ ମାଆ ରହୁଥିବାବେଳେ, ଗଜିନ୍ଦ୍ରଙ୍କ ଏହି ନିଜସ୍ୱ ଘର ଭାଙ୍ଗିଯିବାରୁ ସମଗ୍ର ପରିବାର ଏବେ ଖୋଲା ଆକାଶ ତଳେ ଆଶ୍ରୟ ନେବାକୁ ବାଧ୍ୟ ହୋଇଛି।
ସେହିପରି ଗୁଣୁପୁର ପଞ୍ଚାୟତ ଅନ୍ତର୍ଗତ ହାର୍ଡଖୁର୍ସି ଗ୍ରାମର ପାଲୁ ମାଝୀ, କନିଷ୍ଠ ମାଝୀ ଓ ସୁଭଦ୍ରା ମାଝୀଙ୍କ ଘରର ଛାତ ଆଜବେଷ୍ଟସ ଉଡ଼ିଯାଇ ବ୍ୟାପକ କ୍ଷୟକ୍ଷତି ଘଟିଛି। ଫଳରେ ସେମାନେ ମଧ୍ୟ ବାସହୀନ ହୋଇପଡ଼ିଛନ୍ତି।
ଏନେଇ ଗୁଣୁପୁର ଆର୍ଆଇ ଅଞ୍ଜନ କୁମାର ନାଏକଙ୍କୁ ପଚାରିବାରୁ ସେ କହିଛନ୍ତି ଯେ, ସରକାରୀ ନିୟମ ଅନୁଯାୟୀ ତୁରନ୍ତ ତଦନ୍ତ କରି ପ୍ରଭାବିତ ପରିବାରମାନଙ୍କୁ ପ୍ରାଥମିକ ସହାୟତା ଯୋଗାଇ ଦିଆଯିବ।
ଅନ୍ୟପଟେ, ସିଲେଟ ପଞ୍ଚାୟତର ମୁଷପଞ୍ଜା ରାସ୍ତାରେ ଏକ ବିରାଟ ତେନ୍ତୁଳି ଗଛ ଭାଙ୍ଗି ପଡ଼ିବାରୁ ଯାତାୟାତ ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଛି ଓ ଅନେକ ଯାନବାହନ ଅଟକି ରହିଛି।
ସ୍ଥାନୀୟ ଲୋକମାନଙ୍କ ଦାବି ଅନୁଯାୟୀ, ପ୍ରଶାସନ ଓ ତହସିଲ ବିଭାଗ ତୁରନ୍ତ କ୍ଷତିଗ୍ରସ୍ତ ଅଞ୍ଚଳରେ ଗସ୍ତ କରି କ୍ଷୟକ୍ଷତି ଆକଳନ କରି ସରକାରୀ ସହାୟତା ଯୋଗାଇବା ସହ ରାସ୍ତାରୁ ଗଛ ହଟାଇ ଯାତାୟାତ ସୁବିଧା ସାଧାରଣ କରିବା ଓ ରିଲିଫ୍ କାର୍ଯ୍ୟ ତ୍ୱରାନ୍ୱିତ କରିବା ଆବଶ୍ୟକ।
