ବେଙ୍ଗାଲୁରୁ,୨୩।୯: ସ୍ଥାନୀୟ ଚିନ୍ନାସ୍ବାମୀ ଷ୍ଟାଡିୟମରେ ରବିବାର ଭାରତ ବିପକ୍ଷରେ ଖେଳାଯାଇଥିବା ୩ୟ ଟି୨୦ ମ୍ୟାଚ୍କୁ ଭ୍ରମଣକାରୀ ଦକ୍ଷିଣ ଆଫ୍ରିକା ଦଳ ୯ଉଇକେଟରେ ଜିତି ନେଇଛି। ଏହି ମ୍ୟାଚ୍ର ଏକ ଭିନ୍ନ ଦୃଶ୍ୟ ଦେଖିବାକୁ ମିଳିଥିଲା। ଭାରତ ଇନିଂସର ୮ମ ଓଭରରେ ଶିଖର ଧାଓ୍ବନ ଆଉଟ୍ ହେବା ପରେ ୪ର୍ଥ କ୍ରମରେ ଦୁଇ ବ୍ୟାଟ୍ସମ୍ୟାନ ଡଗ୍ଆଉଟରୁ ଗ୍ରାଉଣ୍ଡ ଅଭିମୁଖେ ବାହାରିଥିଲେ। ସେମାନେ ହେଲେ ରିଷଭ ପନ୍ତ ଓ ଶ୍ରେୟାସ ଆୟାର। ଉଭୟେ ଏକା ସମୟରେ ଡଗ୍ ଆଉଟରୁ ପଡ଼ିଆକୁ ଆସୁଥିବା ଦେଖିବାକୁ ମିଳିଥିଲା। ଦୁଇ ଖେଳାଳି ସାମ୍ନାସାମ୍ନି ହେବା ପରେ କ’ଣ ଘଟୁଛି, ତାହା ଜାଣିବାକୁ ପାଇଥିଲେ। ଏହି ସମୟରେ କ୍ରିଜ୍ରେ ଥିବା ଭାରତୀୟ ଅଧିନାୟକ ବିରାଟ କୋହଲି ଏହି ଘଟଣାକୁ ମ୍ୟାଚ୍ ପରେ ସ୍ବୀକାର କରିଛନ୍ତି। ଦଳୀୟ ମ୍ୟାନେଜମେଣ୍ଟ ଓ ଦୁଇ ଖେଳାଳିଙ୍କ ମଧ୍ୟରେ ଯୋଗାଯୋଗର ଅଭାବ ଯୋଗୁ ଏଭଳି ଘଟିଥିଲା ବୋଲି କୋହଲି କହିଛନ୍ତି। ଉଭୟ ବ୍ୟାଟ୍ସମ୍ୟାନ ୪ର୍ଥ କ୍ରମରେ ବ୍ୟାଟିଂ କରିବାକୁ ମନ ବଳାଇଥିଲେ। ଯଦି ଦୁହେଁ ଏକାସଙ୍ଗେ କ୍ରିଜ୍ରେ ପହଞ୍ଚତ୍ ଥାନ୍ତେ, ଏହା କୌତୂହଳପୂର୍ଣ୍ଣ ବିଷୟ ହୋଇଥାନ୍ତ। ମ୍ୟାଚ୍ର ସ୍ଥିତି ଅନୁଯାୟୀ ଦଳର ୪ର୍ଥ ସ୍ଥାନର ବ୍ୟାଟ୍ସମ୍ୟାନ ନିର୍ଣ୍ଣୟ କରାଯାଏ। ଯଦି ୧୦ ଓଭର ପରେ ଦ୍ୱିତୀୟ ଉଇକେଟ ପଡ଼ିଥାନ୍ତା, ତେବେ ପନ୍ତ ବ୍ୟାଟିଂ କରିଥାନ୍ତେ। ନ ହେଲେ ଆୟାର ବ୍ୟାଟିଂ କରିବାର ଥିଲା। କିନ୍ତୁ ଏକାସଙ୍ଗେ ଡଗ୍ ଆଉଟ୍ରୁ ବାହାରିବାରୁ ଦୁହେଁ ଦ୍ୱନ୍ଦ୍ୱରେ ପଡ଼ିଯାଇଥିଲେ ବୋଲି ଅଧିନାୟକ କୋହଲି କହିଛନ୍ତି। ଆୟାରଙ୍କ ସ୍ଥାନରେ ପନ୍ତ ବ୍ୟାଟିଂ କରିବାକୁ ଆସି ୨୧ ବଲରେ ୧୯ ରନ୍ କରିଥିବାବେଳେ ଆୟାର ୫ ରନ୍ କରି ଆଉଟ୍ ହୋଇଥିଲେ।
