ମୋହନା, ୭ା୧(ମନ୍ମଥ ମିଶ୍ର)- ପ୍ରେମ ସମ୍ପର୍କକୁ ନେଇ ଗଜପତି ଜିଲା ମୋହନାରେ ହୋଇଥିବା ଗୁଳିକାଣ୍ଡ ଘଟଣାରେ ମୋହନା ପୋଲିସ ଜଣେ ଯୁବକଙ୍କୁ ଚନ୍ଦ୍ରଗିରିରୁ ଗିରଫ କରିଛି। ସେ ହେଲେ ଲାଜାର ପ୍ରଧାନ(୨୨) । ଘଟଣାର ମୁଖ୍ୟ ଅଭିଯୁକ୍ତ ସନ୍ତୋଷ ପ୍ରଧାନ (୩୦)ବୋଲି କୁହାଯାଉଛି। ସନ୍ତୋଷ ଘଟଣା ପରଠାରୁ ଫେରାର ହୋଇ ଯାଇଛନ୍ତି। ତାଙ୍କ ସାନଭାଇ ଲାଜାରଙ୍କଠାରୁ ପୋଲିସ କୋରିଆ ନିର୍ମିିତ ଏକ ମାଉଜ଼ର ଜବତ କରିଛି। ଲାଜାରଙ୍କୁ ମଙ୍ଗଳବାର ଆର.ଉଦୟଗିରି କୋର୍ଟକୁ ଚାଲାଣ କରାଯାଇଥିବା ଜଣାପଡିଛି। ତେବେଘଟଣା ସ୍ଥଳରେ ପାରଳାଖେମୁଣ୍ଡି ସାଇଣ୍ଟିଫିକ ଟିମର ଡ. ସୌମ୍ୟ ଦର୍ଶନ ମହାପାତ୍ରଙ୍କ ନେତୃତ୍ୱତ୍ରେ ଏକ ୪ ଜଣିଆ ଟିମ୍ ପହଞ୍ଚତ୍ ତଦନ୍ତ ଚଳାଇଛନ୍ତି। ତଦନ୍ତ ବେଳେ ଟିମ୍ ୩ଟି ଖୋକା ଜବତ କରିଛି। ତେବେ ସନ୍ତୋଷଙ୍କ ନାମରେ ବାହାର ରାଜ୍ୟରେ ମଧ୍ୟ ମାମଲା ରହିଥିବା ପୋଲିସ କହିଛି। ଏସ୍ଆଇ ବି.ନୀଳମାଧବ ରେଡ୍ଡୀ ଏହାର ତଦନ୍ତ କରୁଛନ୍ତି।
ଖବରରୁ ପ୍ରକାଶ, ଗଜପତି ଜିଲା ମୋହନା ଥାନା ଅନ୍ତର୍ଗତ ଚନ୍ଦ୍ରଗିରି ପଞ୍ଚାୟତ ଢେପାସାହି ଗାଁର ଲାଜର ପ୍ରଧାନ ଜଣେ ଯୁବତୀଙ୍କୁ ଏକତରଫା ପ୍ରେମ କରୁଥିଲେ। ଏହାକୁ ନେଇ ଲାଜର ଓ ଯୁବତୀଙ୍କ ପରିବାର ମଧ୍ୟରେ ବିବାଦ ଲାଗି ରହିଥିଲା। ଯୁବତୀଙ୍କ ଅଭିଯୋଗକ୍ରମେ ସୋମବାର ଗ୍ରାମରେ ଏକ ବୈଠକ ବସିଥିଲା। ଲାଜର ଏକତରଫା ପ୍ରେମ କରି ଗ୍ରାମର ଜଣେ ଯୁବତୀଙ୍କୁ କିଛିଦିନ ତଳେ ଜୋର୍ କରି ଉଠାଇ ନେଇ ଗୋଟିଏ ଘରେ ବନ୍ଦୀ କରି ରଖିଥିବା ଅଭିଯୋଗ ବୈଠକରେ ଉଠିଥିଲା। ପରିବାର ଲୋକେ ସମ୍ପୃକ୍ତା ଯୁବତୀଙ୍କୁ ଖୋଜାଖୋଜି କରି ଆଣି ଅନ୍ୟତ୍ର ବିବାହ କରାଇଥିଲେ। କିଛି ଦିନ ପରେ ଯୁବତୀ ଜଣକ ଗାଁକୁ ଆସିଥିବା ବେଳେ ଲାଜର ପୁଣି ତାଙ୍କୁ ଜୋର୍ କରି ଟେକି ନେଇ ଏକ ଘରେ ବନ୍ଦୀ କରି ରଖିଥିଲେ। ପରିବାର ଲୋକେ ତାଙ୍କୁ ଉଦ୍ଧାର କରି ସମାଧାନ ପାଇଁ ଗାଁରେ ଜଣାଇବାରୁ ଏହି ବୈଠକ ବସିଥିଲା। ସେହି ସମୟରେ ସନ୍ତୋଷ ଓ ଲାଜାର ଉପସ୍ଥିତ ଥିଲେ। ତେବେ ଏହି ସମୟରେ ସନ୍ତୋଷ ପାଖରେ ରଖିଥିବା ମଉଜରରୁ ୩ଟି ଗୁଳି ଫୁଟାଇଥିଲେ। ଫଳରେ ସେଠାରେ ଥିବା ଅନିଲ କରାଡଙ୍କ ଡାହାଣ ଗୋଡ଼ର ପାଦରେ ଗୁଳି ପଶିଯାଇଥିଲା। ଗୁରୁତର ଅବସ୍ଥାରେ ତାଙ୍କୁ ଚନ୍ଦ୍ରଗିରି ଡାକ୍ତରଖାନା ଅଣାଯାଇଥିଲା। ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଛି।
