ନୂଆଦିଲ୍ଲୀ, ୧୯ା୮(ପି.ଟି.)-ଇସ୍ଲାମାବାଦ୍ଠାରେ ଖେଳାଯିବାକୁଥିବା ପାକିସ୍ତାନ ବିପକ୍ଷ ଡେଭିସ୍ କପ୍ ମ୍ୟାଚକୁ ଏକ ନିରପେକ୍ଷ ଭେନ୍ୟୁରେ କରାଇବା କେତେ ଜରୁରି ତାହା ସର୍ବଭାରତୀୟ ଟେବୁଲ ଟେନିସ ଆସୋସିଏଶନ (ଏଆଇଟିଏ) ଅନ୍ତର୍ଜାତୀୟ ଟେନିସ ମହାସଂଘ (ଆଇଟିଏଫ୍)କୁ ହୃଦ୍ବୋଧ କରିବା ଲାଗି ଚେଷ୍ଟା କରିବ। ଟିମ୍ ଅଧିନାୟକ ମହେଶ ଭୂପତି ସୋମବାର ଟେଲି-କନସଲ୍ଟେଶନରେ ପ୍ରମୁଖ ଭୂମିକା ଗ୍ରହଣ କରିବେ। ଭାରତୀୟ ପ୍ରଦେଶ ଜମ୍ମୁ-କଶ୍ମୀର ଉପରୁ ସ୍ବତନ୍ତ୍ର ରାଜ୍ୟ ପାହ୍ୟା ପ୍ରତ୍ୟାହାରକୁ ନେଇ ଭାରତ ସହିତ ପାକିସ୍ତାନର କୂଟନୈତିକ ସମ୍ପର୍କରେ ତିକ୍ତତା ଦେଖାଦେଇଛି। ସେପ୍ଟେମ୍ବର ୧୪ ଓ ୧୫ରେ ଖେଳାଯିବାକୁ ଥିବା ମ୍ୟାଚ ଲାଗି ଭାରତ ଏହାର ଶ୍ରେଷ୍ଠ ଦଳ ମନୋନୀତ କରିଛି। ଜମ୍ମୁ-କଶ୍ମୀର ଏକ କେନ୍ଦ୍ର ଶାସିତ ଅଞ୍ଚରେ ପରିଣତ ହେବାପରେ ପାକିସ୍ତାନ ଭାରତୀୟ ରାଷ୍ଟ୍ରଦୂତଙ୍କୁ ଦେଶ ଛାଡ଼ି ଚାଲିଯିବା ଲାଗି କହିଛି। ଗୁଡ୍ ଓ୍ବିଲ ଟ୍ରେନ୍ ସେବାକୁ ବନ୍ଦ ରଖିଛି। ଭାରତ ବିରୋଧରେ ଉତ୍ତେଜନାମୂଳକ ମନ୍ତବ୍ୟ ଦେବା ସହ ଏହି ପ୍ରସଙ୍ଗରେ ଅନ୍ତର୍ଜାତୀୟ ସମର୍ଥନ ଯୋଗାଡ଼ କରିବାରେ ଲାଗିିପଡ଼ିଛି। ଉତ୍ତେଜନା ସତ୍ତ୍ୱେ ଏକ ଦ୍ୱିପାକ୍ଷିକ ସିରିଜରେ ହସ୍ତକ୍ଷେପ କରିବ ନାହିଁ ବୋଲି ଭାରତର କ୍ରୀଡ଼ା ମନ୍ତ୍ରଣାଳୟ ସ୍ପଷ୍ଟ କରିଛି। ତେଣୁ ନିରପେକ୍ଷ ଭେନ୍ୟୁ ପାଇଁ ଆଇଟିଏଫ୍କୁ ରାଜି କରାଇବା କଷ୍ଟକର ବ୍ୟାପାର ହୋଇପଡ଼ିଛି। ଏଣେ ବର୍ତ୍ତମାନ ଭେନ୍ୟୁ ପରିବର୍ତ୍ତନ କରିବା ଲାଗି କୌଣସି ପରିସ୍ଥିତି ସୃଷ୍ଟି ହୋଇଥିବା ଅନୁଭବ କରାଯାଉନାହିଁ ବୋଲି ଆଇଟିଏଫ୍ ଦୃଢତାର ସହିତ କହୁଛି।
