କୁଚିଣ୍ଡା,୮ା୮(ବିରଞ୍ଚତ୍ ଦର୍କା): ଚଳିତବର୍ଷ ଚାଷ ପାଇଁ ପାଗ ଅନୁକୂଳ ଥିବାବେଳେ ଲଗାଣ ବର୍ଷା ହେତୁ ଧାନ ଫସଲରେ ଲେଡ଼ାପୋକର ପ୍ରାଦୁର୍ଭାବ ଚାଷୀଙ୍କୁ ଚିନ୍ତାରେ ପକାଇଛି। ବାମରା ବ୍ଲକର ୬ ପଞ୍ଚାୟତର ମୋଟ ୨୨ ଗାଁ ଏଥିରେ ପ୍ରଭାବିତ ହୋଇଥିବା ବ୍ଲକ କୃଷି ଅଧିକାରୀ ଦେବାନନ୍ଦ ସାହୁଙ୍କ ରିପୋର୍ଟରୁ ଜଣାପଡିଛି। କୁଟାରିମାଲ ପଞ୍ଚାୟତର ୬, ଉଚ୍ଚକାପାଟର ୨, ପିଣ୍ଡାପଥରର ୩, ଗଡ଼ପୋଷର ୩, ଲରିଆପାଲିର ୬ ଓ ବାବୁନିକ୍ତିମାଲ ପଞ୍ଚାୟତର ୪ଟି ଗ୍ରାମରେ ଲେଡ଼ା ପୋକ ବ୍ୟାପିଛି। ଏହିସବୁ ଗ୍ରାମର ମୋଟ ୧୩ ହେକ୍ଟର ଚାଷ ଜମିରେ ମଧ୍ୟମ ଧରଣର ଓ ୨୨ ହେକ୍ଟର ଚାଷ ଜମିରେ ନିମ୍ନଧରଣର ଲେଡା ପୋକ ଲାଗି ଧାନ ଫସଲ କ୍ଷୟକ୍ଷତି ହୋଇଥିବା କୃଷି ବିଭାଗ ପକ୍ଷରୁ ପ୍ରାଥମିକ ଭାବେ ଆକଳନ କରାଯାଇଥିବା କୁହାଯାଇଛି। ଏ ନେଇ କୁଟାରିମାଲ ପଞ୍ଚାୟତର ସରପଞ୍ଚ ତ୍ରିଲିଙ୍ଗ ଛତ୍ରିଆ ବାମରା ବ୍ଲକ ଓ ସମ୍ବଲପୁର ଜିଲା କୃଷି ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ବାମରା ବ୍ଲକ କୃଷି ଅଧିକାରୀଙ୍କ ରିପୋର୍ଟ ଓ ସରପଞ୍ଚଙ୍କ ଅଭିଯୋଗକୁ ଭିତ୍ତି କରି ରାଜ୍ୟ ସରକାରଙ୍କ କୃଷି ବିଭାଗ ପ୍ରମୁଖ ସଚିବଙ୍କ ନିର୍ଦ୍ଦେଶ କ୍ରମେ ସମ୍ବଲପୁର କୃଷି ବିଜ୍ଞାନ କେନ୍ଦ୍ରର କୃଷି ବୈଜ୍ଞାନିକ ଲିଙ୍ଗରାଜ ଦୀପ, କୁଚିଣ୍ଡା କୃଷି ଜିଲା ଅଧିକାରୀ କାର୍ତ୍ତିକ ଚନ୍ଦ୍ର ମଲ୍ଲିକ, ବାମରା ସହକାରୀ କୃଷି ଅଧିକାରୀ ପୃଥୀରାଜ ଭୋଇ, କୁଟାରୀମାଲ ଭିଏଡବ୍ଲ୍ୟୁ ରମିତା ଭୋଇ ପ୍ରମୁଖ ପ୍ରଭାବିତ ଅଞ୍ଚଳକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି। କୃଷି ଅଧିକାରୀମାନେ କ୍ଷତିଗ୍ରସ୍ତ ଚାଷୀଙ୍କୁ ଭେଟି ଲେଡ଼ା ପୋକ ନିୟନ୍ତ୍ରଣ, ଏହାର ନିରାକରଣ ଓ କୀଟନାଶକ ପ୍ରୟୋଗ ପ୍ରକ୍ରିୟା ବିଷୟରେ ପରାମର୍ଶ ଦେଇଛନ୍ତି। ଏଥିରେ ଯଦି ନିୟନ୍ତ୍ରଣ ନ ହୁଏ ତେବେ ଆବଶ୍ୟକ ପଡ଼ିଲେ ରାଜ୍ୟ କୃଷି ନିର୍ଦ୍ଦେଶାଳୟ, ସମ୍ବଲପୁର ଆଞ୍ଚଳିକ କୃଷି ବିଜ୍ଞାନ କେନ୍ଦ୍ର କିମ୍ବା କୃଷି ଅଧିକାରୀଙ୍କ ସହିତ ସିଧାସଳଖ କଥା ହୋଇପାରିବେ ବୋଲି କୃଷି ବୈଜ୍ଞାନିକ ଦୀପ ଚାଷୀମାନଙ୍କୁ କହିଛନ୍ତି।
