ପୁରୀ,୨୧୫(ଅଜିତ୍ କୁମାର ମହାନ୍ତି):ପଞ୍ଜାବରେ ଅଦିନିଆ ରଥଯାତ୍ରା ଆୟୋଜନ ପାଇଁ ପ୍ରସ୍ତୁତି ଚାଲିଥିବା ବେଳେ ଶ୍ରୀମନ୍ଦିର ପ୍ରଶାସନ ପକ୍ଷରୁ ତତ୍ପରତା ଦେଖିବାକୁ ମିଳିଛି। ଶ୍ରୀମନ୍ଦିର ପ୍ରଶାସନ ଚିଠି ଲେଖି ଅଦିନିଆ ରଥଯାତ୍ରା ବନ୍ଦ କରିବାରେ ସଫଳ ହୋଇଛି। ପଞ୍ଜାବ ଫିରୋଜ୍ପୁରଠାରେ ଆସନ୍ତା ୨୩ରେ ଅଦିନିଆ ରଥଯାତ୍ରା ଆୟୋଜନ ହେଉଥିବା ନେଇ ସ୍ବତନ୍ତ୍ର ବିଜ୍ଞପ୍ତି ପ୍ରକାଶ କରାଯାଇଛି। ଶ୍ରୀମନ୍ଦିର ପ୍ରଶାସନ ପକ୍ଷରୁ ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀଙ୍କ ପକ୍ଷରୁ ଫିରୋଜ୍ପୁର ଜିଲା ମାଜିଷ୍ଟ୍ରେଟ ତଥା ଜିଲାପାଳଙ୍କୁ ଚିଠି ଲେଖି ଏହାକୁ ବନ୍ଦ କରିବାକୁ ଅନୁରୋଧ କରାଯାଇଥିଲା। ଅଦିନିଆ ରଥଯାତ୍ରା ଶ୍ରୀଜଗନ୍ନାଥ ସଂସ୍କୃତି ଓ ପରମ୍ପରାକୁ ଅପମାନ କରୁଥିବା ନେଇ ଦର୍ଶାଇଥିଲେ। ମହାପ୍ରଭୁ ଶ୍ରୀଜଗନ୍ନାଥଙ୍କ ସହ ଜଡ଼ିତ ପାରମ୍ପରିକ ତିଥି ଏବଂ ରୀତିନୀତି ଅନୁସାରେ ଚଳିତବର୍ଷ ରଥଯାତ୍ରା ଜୁଲାଇ ୧୬ରେ ହେବ। ପରମ୍ପରା ଏବଂ ଶାସ୍ତ୍ର ନିର୍ଦ୍ଧାରିତ ତାରିଖରେ ପବିତ୍ର ପର୍ବ ପାଳନ ନ କରିବା ଦ୍ୱାରା ଭାରତ ଏବଂ ବିଦେଶରେ ଥିବା ଲକ୍ଷାଧିକ ଭକ୍ତଙ୍କ ଧାର୍ମିକ ଭାବନାକୁ ଆଘାତ ହେବାର ସମ୍ଭାବନା ରହିଛି। ଏହି ପବିତ୍ର ରୀତିକୁ ପୁରୀର ଶ୍ରୀଜଗନ୍ନାଥ ମନ୍ଦିରର ମୂଳପୀଠର ପ୍ରତିଷ୍ଠିତ ଧାର୍ମିକ ପରମ୍ପରା ଏବଂ ଶାସ୍ତ୍ରୀୟ ନିର୍ଦ୍ଦେଶାବଳୀ ଅନୁସାରେ କଡ଼ାକଡ଼ି ପାଳନ କରନ୍ତୁ। ଜୁଲାଇ ୧୬ରେ ମହାପ୍ରଭୁଙ୍କ ଘୋଷଯାତ୍ରା ତିଥି ଅନୁଯାୟୀ ଅନୁଷ୍ଠିତ ହେବାକୁ ଥିବାରୁ ଉକ୍ତ ତିଥିରେ ରଥଯାତ୍ରା ଆୟୋଜନ କରିବାକୁ ଅନୁରୋଧ କରିଛନ୍ତି। ଶ୍ରୀମନ୍ଦିର ପ୍ରଶାସନ ପକ୍ଷରୁ ଅଦିନିଆ ରଥଯାତ୍ରା ସମ୍ପର୍କିତ ଚିଠି ପାଇବା ପରେ ଫିରୋଜ୍ପୁର ଜିଲା ମାଜିଷ୍ଟ୍ରେଟ ତଥା ଜିଲାପାଳ ଘଟଣାକୁ ଗୁରୁତ୍ୱ ଦେଇ ୨୩ରେ ହେବାକୁଥିବା ଅଦିନିଆ
ରଥଯାତ୍ରାକୁ ବନ୍ଦ ପାଇଁ ନିର୍ଦ୍ଦେଶ ଦେଇଛନ୍ତି। ଏନେଇ ଫିରୋଜ୍ପୁର ଜିଲା ମାଜିଷ୍ଟ୍ରେଟ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀଙ୍କୁ ଚିଠି ଯୋଗେ ଅବଗତ କରାଇଛନ୍ତି। ଏହାକୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ବାଗତ କରାଯାଇଛି।
ମୁଖ୍ୟ ପ୍ରଶାସକ ପାଢ଼ୀ କହିଛନ୍ତି, ପଞ୍ଜାବର ଫିରୋଜ୍ପୁର ଜିଲାରେ ମେ’ ୨୩ରେ ଏକ ଅଦିନିଆ ରଥଯାତ୍ରା ଆୟୋଜନ ହେବାକୁ ଯାଉଥିବା ଖବରପାଇ ତୁରନ୍ତ ଫିରୋଜ୍ପୁର ଜିଲା ପ୍ରଶାସନଙ୍କୁ ଅଲଗା ତିଥିରେ ଏହି ରଥଯାତ୍ରା ଆୟୋଜନକୁ ବନ୍ଦ କରିବା ପାଇଁ ଏକ ଅନୁରୋଧପତ୍ର ପ୍ରେରଣ କରିଥିଲୁ। ବୁଧବାର ପୂର୍ବାହ୍ନରେ ଫିରୋଜ୍ପୁର ଜିଲାପାଳ ଦୀପଶିଖା ଶର୍ମାଙ୍କ ସହ କଥା ହୋଇଥିଲି। ତାଙ୍କର ତ୍ୱରିତ୍ ହସ୍ତକ୍ଷେପ ଓ ସହଯୋଗରେ ଏକ ସକାରାତ୍ମକ ସମାଧାନ ସମ୍ଭବ ହୋଇପାରିଛି। ଆମ ଅନୁରୋଧକୁ ସମ୍ମାନ ଜଣାଇ ଫିରୋଜ୍ପୁର ଜିଲା ପ୍ରଶାସନ ଆସନ୍ତା ୨୩ରେ ରଥଯାତ୍ରା ଆୟୋଜନ କରିବାକୁ ଯାଉଥିବା ସଂଗଠନ ସହ ଆଲୋଚନା କରି ସେମାନଙ୍କୁ ଶ୍ରୀମନ୍ଦିରର ନିର୍ଦ୍ଧାରିତ ତିଥି(୧୬ ଜୁଲାଇ) ଅନୁଯାୟୀ ରଥଯାତ୍ରା ପାଳନ କରିବାକୁ ସହମତ କରାଇଛନ୍ତି। ସଂଗଠନ ପକ୍ଷରୁ ଏ ସମ୍ବନ୍ଧୀୟ ଲିଖିତପତ୍ର ମଧ୍ୟ ପ୍ରଦାନ କରାଯାଇଛି। ଏଥିପାଇଁ ମୁଁ ଫିରୋଜ୍ପୁର ଜିଲାପାଳ ଶର୍ମାଙ୍କୁ ଆନ୍ତରିକ କୃତଜ୍ଞତା ଜଣାଉଛି।
Dharitri – Odisha’s No.1 Odia Daily
