ବ୍ରହ୍ମପୁର ଅଫିସ,୨୦ା୩-ଏକ ଚଳନ୍ତା ଟ୍ରେନ୍ରେ ଜଣେ ଯାତ୍ରୀଙ୍କୁ ଛୁରି ଭୁସି ହତ୍ୟା କରାଯାଇଥିବା ମାମଲାର ବିଚାରଣା ଏଡିଜେ (ଏଲ୍ଆର୍) କୋର୍ଟରେ ଚାଲିଛି। ଏଥିରେ ୮ଜଣ ସାକ୍ଷୀ ରହିଥିବା ବେଳେ ଏଯାବତ ୬ଜଣ ସାକ୍ଷୀ କୋର୍ଟରେ ହାଜର ହୋଇ ଘଟଣା ସମ୍ପର୍କରେ ନିଜ ନିଜର ବୟାନ ଦେଇ ସାରିଛନ୍ତି। ଷଷ୍ଠ ସାକ୍ଷୀ ଭାବେ ବିହାର ଝାଡ଼ଖଣ୍ଡର ପାଲନ ଗୋରାଇ ନିଜର ବୟାନ ଦେଇ ସାରିଛନ୍ତି। ସେ ନିଜ ବୟାନରେ ପ୍ରସନ୍ନଜିତଙ୍କୁ ହତ୍ୟା କରାଯାଇଛି କି ନାହିଁ ଏ ସମ୍ପର୍କରେ ସେ କିଛି ଜାଣି ନ ଥିବା କହିଛନ୍ତି। ସେହିପରି ପୂର୍ବରୁ ରେଳ ସୁରକ୍ଷା ବଳ(ଆର୍ପିଏଫ୍) ଏଏସ୍ଆଇ ସୀମାଞ୍ଚଳ ସାହୁ ଯିଏକି ଉକ୍ତ ମାମଲାର ଅଭିଯୋଗକାରୀ ସେ ପ୍ରଥମ ସାକ୍ଷୀ ଭାବେ କୋର୍ଟରେ ହାଜର ହୋଇ ନିଜର ବୟାନ ଦେଇଥିଲେ। ପରେ ଛତ୍ରପୁର ଜିଆର୍ପି ହେଡ୍ କନଷ୍ଟେବଲ ପ୍ରସନ୍ନ କୁମାର ନାୟକ, ବ୍ରହ୍ମପୁର ଜିଆର୍ପି କନଷ୍ଟେବଲ କୈଳାସ ଚନ୍ଦ୍ର ବେହେରା, ଚେନ୍ନାଇ- ହାଓଡା ଟ୍ରେନ୍ର ଗାର୍ଡ ଆର୍. କମଳାକର ଓ ଉକ୍ତ ଟ୍ରେନ୍ର ଡ୍ରାଇଭର ଜି. ଶ୍ରୀନିବାସ ରାଓଙ୍କ ପୃଥକ୍ ଭାବେ କୋର୍ଟରେ ବୟାନ ରେକର୍ଡ କରାଯାଇଛି ବୋଲି ଏପିପି ରଜତ କୁମାର ଦାଶ ସୂଚନା ଦେଇଛନ୍ତି।
ପ୍ରକାଶ ଯେ, ୨୦୨୨ ଜୁଲାଇ ୫ ଅପରାହ୍ନରେ ଜଣେ ଯୁବକଙ୍କୁ ଟ୍ରେନ୍ ଭିତରେ ଛୁରି ଭୁସି ହତ୍ୟା କରାଯାଇଥିଲା। ଉକ୍ତ ହତ୍ୟା ଘଟଣାଟି ଚେନ୍ନାଇ-ହାଓଡା ଟ୍ରେନ୍ରେ ଛତ୍ରପୁର ନିକଟରେ ଘଟିଥିଲା। ମୃତ ଯୁବକ ଜଣକ ପଶ୍ଚିମବଙ୍ଗର ପ୍ରସନ୍ନଜିତ ଗୋରାଇ(୩୪)। ଏନେଇ ରେଳ ସୁରକ୍ଷା ବଳର ଏଏସ୍ଆଇ ସୀମାଞ୍ଚଳ ସାହୁଙ୍କ ଅଭିଯୋଗ ପରେ ରେଳପଥ ପୋଲିସ ନଂ. ୪୭/୨୨ ରେ ଏକ ହତ୍ୟା ମାମଲା ରୁଜୁ କରିଥିଲା। ରକ୍ତଭିଜା ଛୁରି ଓ ହତ୍ୟାକାରୀଙ୍କ ରକ୍ତଭିଜା କପଡ଼ା ଜବତକରି ପରୀକ୍ଷା ପାଇଁ ପଠାଇଥିଲା। ପୋଲିସ ହତ୍ୟାକାରୀ ସୁବୋଧ ଗୋରାଇଙ୍କୁ ଗିରଫକରି କୋର୍ଟ ଚାଲାଣ କରିଥିଲା। କୌଣସି ଏକ ଅନୈତିକ ସମ୍ପର୍କକୁ କେନ୍ଦ୍ରକରି ଏହି ହତ୍ୟାକାଣ୍ଡ ଘଟିଥିଲା ବୋଲି ପୋଲିସ ପ୍ରାଥମିକ ତଦନ୍ତରୁ ସନ୍ଦେହ କରିଥିଲା।
