ରୂପସା,୩୦।୮(ଡି.ଏନ.ଏ.): ବାଲେଶ୍ୱର ଜିଲା ବସ୍ତା ଥାନା ଅଞ୍ଚଳର ଜଣେ ନାବାଳିକାଙ୍କୁ ବଳାତ୍କାର କରାଯାଇଥିବା ଅଭିଯୋଗ ହୋଇଛି। ପୋଲିସ ଅଭିଯୋଗକୁ ଭିତ୍ତି କରି ଜଣେ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେ ହେଲେ ସେକ୍ ସବୀର। ଗତ ୧୦ ତାରିଖରେ ପରିବାର ଲୋକେ ଏକ ବାହାଘର କାର୍ଯ୍ୟରେ ବ୍ୟସ୍ତ ଥିବାବେଳେ ଅଭିଯୁକ୍ତ ସବୀର ଅନ୍ୟ ୨ଜଣ ସାଙ୍ଗଙ୍କ ସହିତ ନାବାଳିକାଙ୍କୁ ଡାକିନେଇଥିଲେ। ପରେ ବାବାଳିକଙ୍କୁ ଏକ ଘରେ ରଖି ବଳାତ୍କାର କରିଥିଲେ। ପରେ ନାବାଳିକାଙ୍କ ଉଲଗ୍ନ ଫଟୋକୁ ମୋବାଇଲରେ ରେକର୍ଡିଂ କରିଥିଲେ। ଏକଥା ବାହାରେ ପ୍ରକାଶ କଲେ ଭିଡିଓ ଭାଇରାଲ କରିବାର ଧମକ ଦେଇଥିଲେ।
ପୁଣି ଗତ ୧୩ ତାରିଖରେ ନାବାଳିକାଙ୍କୁ ଅଭିଯୁକ୍ତମାନେ ଫୋନ ଯୋଗେ ଡାକିଥିଲେ। ହେଲେ ସେ ଆସିବାକୁ ମନା କରି ଦେଇଥିଲେ। ଏପରିକି ଭୟରେ ନାବାଳିକା ଜଣକ ଘରୁ ନ ବାହାରିବାରୁ ଅଭିଯୁକ୍ତମାନେ ସୋସିଆଲ ମିଡିିଆରେ ଭିଡିଓ ଭାଇରାଲ କରିଥିଲେ। ଏହା ଜାଣିବା ପରେ ଉଭୟ ପରିବାର ମଧ୍ୟରେ ପାଟିତୁଣ୍ଡ ହୋଇଥିଲା। ଗାଁ ଲୋକଙ୍କ ଉପସ୍ଥିତିରେ ଆପୋଷ ବୁଝାମଣା ହେବାର ସିଦ୍ଧାନ୍ତ ହୋଇଥିଲା। ମାତ୍ର କୌଣସି ସମାଧାନ ନ ହେବାରୁ ପୀଡ଼ିତାଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ। ଶନିବାର ପୋଲିସ ଏକ ମାମଲା (ନଂ.୨୫୫/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା। ଅଭିଯୁକ୍ତ ସବୀରକୁ ଗିରଫ କରି ଡାକ୍ତରୀମାଇନା ପରେ କୋର୍ଟ ଚାଲାଣ କରାଯାଇଥିବା ପୋଲିସ ସୂଚନା ଦେଇଛି।
