ନୂଆଦିଲ୍ଲୀ,୧୯।୫: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନା ବହୁତ ଶୀଘ୍ର ବାଂଲାଦେଶ ଫେରିବେ। ବର୍ତ୍ତମାନ ଭାରତରେ ରହୁଥିବା ଶେଖ ହାସିନା ଏନେଇ ସଙ୍କେତ ଦେଇଛନ୍ତି। ଏକ ଇମେଲ ସାକ୍ଷାତକାରରେ ତୋବନୀ ଦେଇ କହିଛନ୍ତି, ତାଙ୍କର ଅନୁପସ୍ଥିତି ଅର୍ଥ ନୁହେଁ, ସେ ନୀରବ ଅଛନ୍ତି। ସେ ଦେଶ ପାଇଁ ନିରନ୍ତର ଲଢ଼ୁଛନ୍ତି ଏବଂ ଅନ୍ତର୍ଜାତୀୟ ସ୍ତରରେ ମଧ୍ୟ ସକ୍ରିୟ ଅଛନ୍ତି।
ହାସିନା କହିଛନ୍ତି, ତାଙ୍କର ପ୍ରତ୍ୟାବର୍ତ୍ତନ କୌଣସି ନିର୍ଦ୍ଦିଷ୍ଟ ତାରିଖ ଉପରେ ନିର୍ଭରଶୀଳ ନୁହେଁ। ପ୍ରଥମ ଏବଂ ସର୍ବୋପରି, ବାଂଲାଦେଶରେ ଏକ ଗଣତାନ୍ତ୍ରିକ ପରିବେଶ, ଅଭିବ୍ୟକ୍ତିର ସ୍ବାଧୀନତା, ରାଜନୈତିକ ଅଧିକାର ଏବଂ ଆଇନର ଶାସନ ପୁନରୁଦ୍ଧାର କରିବା ଅତ୍ୟନ୍ତ ଜରୁରୀ। ଏହା କେବଳ ତାଙ୍କ ନିଜ ପ୍ରତ୍ୟାବର୍ତ୍ତନ ପାଇଁ ନୁହେଁ, ବରଂ ଦେଶର ସ୍ବାଧୀନତା ଏବଂ ଲୋକଙ୍କ କଲ୍ୟାଣ ପାଇଁ ଗୁରୁତ୍ୱପୂର୍ଣ୍ଣ।
ହାସିନା ପ୍ରକାଶ କରିଛନ୍ତି ଯେ, ସେ ୧୯ଥର ହତ୍ୟା ଉଦ୍ୟମରୁ ବଞ୍ଚିଛନ୍ତି, ତଥାପି ସେ କେବେ ବି ପଛକୁ ଫେରି ନାହାଁନ୍ତି। ଆୱାମୀ ଲିଗ ଉପରେ ଲାଗୁ ହୋଇଥିବା ପ୍ରତିବନ୍ଧକକୁ ନେଇ ସେ ଦୃଢ ଭାବେ କହିଛନ୍ତି, ଏହା ଲୋକଙ୍କର ଏକ ଦଳ ଏବଂ କେବଳ ଏକ ବ୍ୟୁରୋକ୍ରାଟିକ ଡିକ୍ରିମ ଦ୍ୱାରା ଏହାକୁ ଭାଙ୍ଗି ଦିଆଯାଇପାରିବ ନାହିଁ। ଯଦି ଆୱାମୀ ଲିଗକୁ ପ୍ରତିବନ୍ଧକ ମାଧ୍ୟମରେ ଦୂର କରାଯାଇପାରିଥାନ୍ତା, ତେବେ ବାଂଲାଦେଶ ରାଷ୍ଟ୍ର କେବେ ବି ଅସ୍ତିତ୍ୱରେ ଆସି ନ ଥାନ୍ତା। ଲକ୍ଷ ଲକ୍ଷ ସମର୍ଥକ ଏବଂ ହଜାର ହଜାର ନେତା ଆଜି ବାଂଲାଦେଶ ଭିତରେ ଦଳ ସହିତ ଦୃଢ଼ ଭାବରେ ଠିଆ ହୋଇଛନ୍ତି। ସରକାର ଆୱାମୀ ଲିଗକୁ ଭୟ କରନ୍ତି। ଏହି କାରଣରୁ ଦଳ ଉପରେ ପ୍ରତିବନ୍ଧକ ଲଗାଯାଇଛି।
ଆଭ୍ୟନ୍ତରୀଣ ଦଳ ସଂସ୍କାର ଏବଂ ତାଙ୍କ ଅନୁପସ୍ଥିତିରେ ଆୱାମୀ ଲିଗର ଭବିଷ୍ୟତ ସମ୍ପର୍କରେ ସେ କହିଛନ୍ତି, ଦଳ ଗଣତାନ୍ତ୍ରିକ ନୀତି ଉପରେ କାର୍ଯ୍ୟ କରେ। ଯଦି କୌଣସି ନେତାଙ୍କ ବିରୋଧରେ ଅଭିଯୋଗ ଆସେ, ତେବେ ଦଳ ନିଜେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ କରେ। ଦଳ ଏହାର ବିରୋଧୀମାନଙ୍କ ଦ୍ୱାରା ରଚିତ ଷଡ଼ଯନ୍ତ୍ରର ଚାପରେ ଭାଙ୍ଗି ପଡ଼ିବ ନାହିଁ।
ଭାରତ ସହିତ ସମ୍ପର୍କ ବିଷୟରେ କହି ହସିନା କହିଛନ୍ତି ଯେ ଭାରତ ଏବଂ ବାଂଲାଦେଶ ମଧ୍ୟରେ ସମ୍ପର୍କ ଐତିହାସିକ। ଭାରତ କେବଳ ଏକ ପଡ଼ୋଶୀ ଦେଶ ନୁହେଁ; ଏହା ବାଂଲାଦେଶରସ୍ବୋଧୀନତା ସଂଗ୍ରାମରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଆମ ଦେଶର କିଛି ରାଜନୈତିକ ଏବଂ କଠୋରପନ୍ଥୀ ଗୋଷ୍ଠୀ ଭାରତ ବିରୋଧୀ ବୟାନବାଜି କରି ରାଜନୀତିରେ ନିୟୋଜିତ ହୋଇଛନ୍ତି। ମହମ୍ମଦ ୟୁନୁସଙ୍କ ମଧ୍ୟବର୍ତ୍ତୀକାଳୀନ ସରକାର ମଧ୍ୟ ଠିକ ସେହିପରି କରିଛନ୍ତି।
୨୦୨୪ ମସିହାର ଛାତ୍ର ପ୍ରତିବାଦ ପରେ ଶେଖ ହସିନା କ୍ଷମତାରୁ ହଟିବା ପରଠାରୁ ଭାରତରେ ରହୁଛନ୍ତି। ତାଙ୍କ ଦଳ ଆୱାମୀ ଲିଗ ବର୍ତ୍ତମାନ ବାଂଲାଦେଶରେ ପ୍ରତିବନ୍ଧକର ସମ୍ମୁଖୀନ ହେଉଛି। ଏହା ବ୍ୟତୀତ ଅନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ ତାଙ୍କୁ ମୃତ୍ୟୁଦଣ୍ଡ ଦେଇଛି।
Dharitri – Odisha’s No.1 Odia Daily
