ଦିଗପହଣ୍ଡି,୧୯।୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଗୋକର୍ଣ୍ଣପୁରରେ ଅଭାବନୀୟ ଘଟଣା । ବଡ଼ସାହିର ଦୀପକ ସେଠୀଙ୍କ କାତି ଚୋଟରେ ପଡୋଶୀ ଡି.ବିଜୟ(୪୫) ଗୁରୁତର ଆହତ ହୋଇଛନ୍ତି । ମଙ୍ଗଳବାର ପୂର୍ବାହ୍ନ ପ୍ରାୟ ସାଢେ ୧୦ ଟାରେ ବିଜୟ ଗ୍ରାମ ନିକଟ କୁଟି ପୋଖରୀକୁ ଗାଧୋଇବା ପାଇଁ ଯାଉଥିଲେ । ଏହି ସମୟରେ ଘରର ସୀମା ସରହଦକୁ କେନ୍ଦ୍ରକରି ପୂର୍ବ ଶତ୍ରୁତା କାରଣରୁ ଦୀପକ ଏବଂ ମୁଖା ପିନ୍ଧିଥିବା ଅନ୍ୟ ୨ ସହଯୋଗୀ ତାଙ୍କୁ ଗାଳି କରି ପୋଖରୀ ହିଡରେ ଅଟକାଇଥିଲେ।
ପ୍ରତିବାଦ କରିବାରୁ ଦୀପକ ଏକ କାତିରେ ତାଙ୍କ ବେକକୁ ଚୋଟ ପକାଇବା ବେଳେ ବିଜୟ ବାମହାତରେ ଅଟକାଇ ଦେବାରୁ ତାଙ୍କ ହାତରେ କାତି ଚୋଟ ବସିଥିଲା। ସେ ପ୍ରାଣ ଭୟରେ ପୋଖରୀ ପାଣି ଭିତରକୁ ଚାଲି ଯାଇଥିଲେ । ଦୀପକ ଓ ଅନ୍ୟ ୨ ଜଣ ଅଚିହ୍ନା ଯୁବକ ଦ୍ବୟ ତାଙ୍କୁ ଧମକ ଦେଇ ସେଠାରୁ ପଳାଇଥିଲେ । ବିଜୟ ଘରକୁ ଦୌଡ଼ି ଯାଇ ସ୍ତ୍ରୀ କମଳା ଏବଂ ପାଖ ପଡୋଶୀଙ୍କୁ ସବୁ କଥା କହିଥିଲେ।
ବିଜୟଙ୍କୁ ଗୁରୁତର ଅବସ୍ଥାରେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା।ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଏନେଇ ବିଜୟଙ୍କ ସ୍ତ୍ରୀ କମଳା ଦିଗପହଣ୍ଡି ଥାନାରେ ଏତଲା ଦେଇଥିବା କହିଛନ୍ତି । ପୋଲିସ ମାମଲା ରୁଜୁ କିର ତଦନ୍ତ ଚଳାଇଛି ।
