ବନ୍ତ,୧୯।୫(କିଶୋର କୁମାର ସେଠୀ): ଭଦ୍ରକ ଜିଲା ବନ୍ତ ବ୍ଲକ ବନ୍ତ ପଞ୍ଚାୟତର ସଖୀପାଟଣା ଅଙ୍ଗନୱାଡ଼ି କେନ୍ଦ୍ରରୁ ମିଳିଥିବା ଅସ୍ବାସ୍ଥ୍ୟକର ପୃଷ୍ଟିକର ଖାଦ୍ୟ ଖାଇ ଜଣେ ଗର୍ଭବତୀ ମହିଳା ଗୁରୁତର ଅସୁସ୍ଥ ହୋଇଛନ୍ତି । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ଏବଂ ଉତ୍ତେଜନା ପ୍ରକାଶ ପାଇଛି। ନିମ୍ନମାନର ଖାଦ୍ୟ ଯୋଗାଣ ପ୍ରତିବାଦରେ ସ୍ଥାନୀୟ ଜନପ୍ରତିନିଧି ଓ ସାମାଜିକ କର୍ମୀମାନେ ବ୍ଲକ ସିଡିପିଓ କାର୍ଯ୍ୟାଳୟ ଘେରାଉ କରିବା ସହ ଧାରଣାରେ ବସି ରହିଛନ୍ତି। ସୂଚନା ଅନୁସାରେ , ସଖୀପାଟଣା ଅଙ୍ଗନୱାଡ଼ି କେନ୍ଦ୍ରରୁ ମିଳିଥିବା ଅସ୍ବାସ୍ଥ୍ୟକର ପୃଷ୍ଟିକର ବାଦାମ ଚିକି ଖାଇ ବର୍ଷା ଜେନା ନାମକ ଜଣେ ୭ମାସର ଗର୍ଭବତୀ ମହିଳା ହଠାତ୍ ଅସୁସ୍ଥ ହୋଇପଡ଼ିଥିଲେ। ତାଙ୍କୁ ତୁରନ୍ତ ବନ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି l ଏହି ଖବର ଜଣାପଡ଼ିବା ପରେ ସ୍ଥାନୀୟ ସମିତିସଭ୍ୟ ପରମେଶ୍ବର ବାରିକ ନିମ୍ନମାନର ବାଦାମ ଚିକି ଧରି ସିଧାସଳଖ ବ୍ଲକ ସିଡିପିଓ ଅଲାଡ଼ି ମାରାଣ୍ଡିଙ୍କ ନିକଟକୁ ଯାଇ ଏ ବିଷୟରେ ଦୃଷ୍ଟି ଆକର୍ଷଣ କରିଥିଲେ। ମାତ୍ର ସିଡିପିଓ ଏହି ସମ୍ବେଦନଶୀଳ ଘଟଣା ଉପରେ କୌଣସି ସନ୍ତୋଷଜନକ ଉତ୍ତର ନଦେବାରୁ ଉତ୍ତେଜନା ଆହୁରି ବଢ଼ିଥିଲା । ସିଡିପିଓଙ୍କ ଏଭଳି ଦାୟିତ୍ୱହୀନତାକୁ ପ୍ରତିବାଦ କରି ସମିତିସଭ୍ୟ ପରମେଶ୍ବର ବାରିକଙ୍କ ନେତୃତ୍ୱରେ ବହୁସଂଖ୍ୟାରେ ସ୍ଥାନୀୟ ଲୋକ ଓ ନେତା କାର୍ଯ୍ୟାଳୟ ପରିସରରେ ଧାରଣାରେ ବସି ରହିଛନ୍ତି। ଘଟଣା ସମ୍ପର୍କରେ ଖବର ପାଇ ବନ୍ତ ବ୍ଲକ ଅଧ୍ୟକ୍ଷ ମନୋରଞ୍ଜନ ଘଡ଼େଇ, ସାଂସଦଙ୍କ ପ୍ରତିନିଧି ସନ୍ତୋଷ ନାୟକ, କେନ୍ଦୁଆପଦା ସରପଞ୍ଚ ଇଂ ପ୍ରମୋଦ କୁମାର ଜେନା, ମହାନ୍ତିପଡା ସମିତି ସଭ୍ୟ ର୍ନିମଳ ଚନ୍ଦ୍ର ନାୟକ ଏବଂ ଚାରିଗାଁ ସମିତି ସଭ୍ୟ ଧରଣୀଧର କର ପ୍ରମୁଖ ଘଟଣାସ୍ଥଳରେ ପହଞ୍ଚି ସିଡ଼ିପିଓଙ୍କ ସହ ଦୀର୍ଘ ସମୟ ଆଲୋଚନା କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସମାଧାନ ହୋଇନି । ଧାରଣାରତ ପ୍ରତିବାଦକାରୀମାନେ ଅଭିଯୋଗ କରିଛନ୍ତି ଯେ, ବାସୁଦେବପୁର ଅଞ୍ଚଳର “ଇଶ୍ୱର ଆଶା ମହିଳା ସୟଂ ସହାୟିକା ଗୋଷ୍ଠୀ” ଦ୍ୱାରା ଏହି ନିମ୍ନମାନର ଓ ଅସ୍ବାସ୍ଥ୍ୟକର ପୃଷ୍ଟିକର ଖାଦ୍ୟ ଯୋଗାଇ ଦିଆଯାଉଛି l ଯାହା ଗର୍ଭବତୀ ମହିଳା ଓ ଶିଶୁମାନଙ୍କ ଜୀବନ ସହ ସିଧାସଳଖ ଖେଳ ସଦୃଶ ଅଟେ l ଏହି ଦୁର୍ନୀତିଗ୍ରସ୍ତ ଓ ଦାୟିତ୍ୱହୀନ ମହିଳା ସୟଂ ସହାୟିକା ଗୋଷ୍ଠୀ ବିରୋଧରେ ତୁରନ୍ତ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି। ଏହି ପ୍ରତିବାଦରେ ନିଳୋକ ସମିତିସଭ୍ୟ ଉଦ୍ଧବ ଚରଣ ସେଠୀ, ଫାଲଗୁନି ରାଉତ୍, ସୁରଜ ଗୋସ୍ବାମୀ, ଜୟଦେବ ମହାରାଜ, କ୍ଷୀରୋଦ ନାୟକ, ଶିଶିର ଜେନା, ମୃତ୍ୟୁଞ୍ଜୟ ସୁତାର, ଗଣେଶ ପ୍ରସାଦ ସେଠୀ, ହେମନ୍ତ ସାହୁ, ରାଜେଶ ଯେନା, ଚିନ୍ମୟ ପତି, ଜ୍ୟୋତିପ୍ରକାଶ ସାହୁ, ଜଳଧର ଜେନା, ସୁକାନ୍ତ ଜେନା, ବାପି ଖିଲାର, ରମେଶ ଚନ୍ଦ୍ର ପେଡ଼ା ଏବଂ ସୁଶାନ୍ତ ଯେନାଙ୍କ ସମେତ ଶତାଧିକ ସ୍ଥାନୀୟ ବାସିନ୍ଦା ସାମିଲ ହୋଇ ନାରାବାଜି ଦେଇଛନ୍ତି। ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନହେବା ପର୍ଯ୍ୟନ୍ତ ଏହି ଆନ୍ଦୋଳନ ଜାରି ରହିବ ବୋଲି ଚେତାବନୀ ଦିଆଯାଇଛି।
