ଥିରୁଭାନନ୍ତପୁରମ୍,୧୮।୫: କେରଳମ୍ରେ କଂଗ୍ରେସ ନେତୃତ୍ୱାଧୀନ ୟୁନାଇଟେଡ ଡେମୋକ୍ରାଟିକ ଫ୍ରଣ୍ଟ (UDF) ୧୦ ବର୍ଷର ବ୍ୟବଧାନ ପରେ କ୍ଷମତାକୁ ଫେରିଛି। ସୋମବାର ତିରୁଭାନନ୍ତପୁରମର ସେଣ୍ଟ୍ରାଲ ଷ୍ଟାଡିୟମରେ ଭି.ଡି. ସତିସନ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ଶପଥ ଗ୍ରହଣ ସମାରୋହର ଏକ ବିଶେଷ ମୁହୂର୍ତ୍ତ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା।
ବିଶେଷତଃ, ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବା ପରେ ଭି.ଡି. ସତିସନ ସିଧା କଂଗ୍ରେସ ଏମ୍ପି ରାହୁଲ ଗାନ୍ଧୀଙ୍କ ପାଖକୁ ଯାଇଥିଲେ। ରାହୁଲ ସତିସନଙ୍କୁ ଆଲିଙ୍ଗନ କରି ସ୍ବାଗତ କରିଥିଲେ। ପରବର୍ତ୍ତୀ ସମୟରେ ସତିସନ ତାଙ୍କ ଆସନରେ ବସିବାକୁ ଯାଉଥିବା ସମୟରେ ରାହୁଲ ଙ୍ତାଙ୍କ କାନରେ କିଛିଙ୍କହିଥିଲେ। ରାହୁଲଙ୍କ କଥା ଶୁଣି ସତିସନ ତୁରନ୍ତ ପଛକୁ ଫେରି ମଞ୍ଚରେ ଉପସ୍ଥିତ ସମସ୍ତ ବରିଷ୍ଠ ନେତାଙ୍କୁ ଭେଟିବାକୁ ଯାଇଥିଲେ।
ଏହି ସମସ୍ତ ଘଟଣାକ୍ରମ ସମାରୋହରେ ଉପସ୍ଥିତ ଲୋକଙ୍କ ସହିତ ସୋସିଆଲ ମିଡିଆ ବ୍ୟବହାରକାରୀଙ୍କ ମଧ୍ୟରେ କୌତୁହଳ ସୃଷ୍ଟି କରିଥିଲା। ରାହୁଲ ଏପରି କ’ଣ କହିଥିଲେ ଯେ, ଯାହା ନୂତନ ମୁଖ୍ୟମନ୍ତ୍ରୀଙ୍କୁ ତୁରନ୍ତ ବରିଷ୍ଠ ନେତାଙ୍କ ପାଖକୁ ଯିବାକୁ ପ୍ରେରଣା ଦେଇଥିଲା। ଯଦିଓ ରାହୁଲ ଏବଂ ସତିସନଙ୍କ ମଧ୍ୟରେ ହୋଇଥିବା ଆଲୋଚନାର ବିବରଣୀ ଆନୁଷ୍ଠାନିକ ଭାବରେ ପ୍ରକାଶ କରାଯାଇ ନାହିଁ, ତଥାପି ଏହା ସାଧାରଣତଃ ବିଶ୍ୱାସ କରାଯାଏ ଯେ, ରାହୁଲ ବୋଧହୁଏ ବ୍ୟକ୍ତିଗତ ଭାବରେ ଭେଟି ଦଳର ବରିଷ୍ଠ ନେତାଙ୍କ ଆଶୀର୍ବାଦ ନେବାକୁ ପରାମର୍ଶ ଦେଇଥିଲେ।
କେରଳମ୍ ରେ ମେଣ୍ଟ ସରକାରଙ୍କ ଶପଥ ଗ୍ରହଣ ଉତ୍ସବ ଜାତୀୟ ଗୀତ ‘ବନ୍ଦେ ମାତରମ’ ଗାନ ସହିତ ଆରମ୍ଭ ହୋଇଥିଲା। କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କ ପରି ପ୍ରମୁଖ ବ୍ୟକ୍ତି ବିଶେଷ କଂଗ୍ରେସ ଏବଂ ୟୁଡିଏଫ୍ର ଅନେକ ବରିଷ୍ଠ ନେତାଙ୍କ ସହିତ ଏହି ଅବସରରେ ଉପସ୍ଥିତ ଥିଲେ।
ଭି.ଡି. ସତିସନଙ୍କ ସହିତ ୨୦ ଜଣ ଅନ୍ୟ ମନ୍ତ୍ରୀ ମଧ୍ୟ ଶପଥ ଗ୍ରହଣ କରିଥିଲେ। ଏହା ଏକ ବିରଳ ଘଟଣା ପ୍ରାୟ ଛଅ ଦଶନ୍ଧି ମଧ୍ୟରେ ପ୍ରଥମ ଥର ପାଇଁ ଘଟିଥିଲା। ସମଗ୍ର କ୍ୟାବିନେଟ ମୁଖ୍ୟମନ୍ତ୍ରୀଙ୍କ ସହିତ ଏକକାଳୀନ ଶପଥ ଗ୍ରହଣ କରୁଥିବା ଦେଖାଯାଇଥିଲା। ନୂତନ କ୍ୟାବିନେଟ୍ରେ ରମେଶ ଚେନ୍ନିଥଲା, କେ. ମୁରଲୀଧରନ, ସନି ଜୋସେଫ, ପି.କେ. କୁନ୍ହାଲିକୁଟ୍ଟି, ପି.କେ. ବଶୀର ଏବଂ କେ.ଏମ. ଶାଜିଙ୍କ ଭଳି ପ୍ରମୁଖ ନେତା ସାମିଲ ଅଛନ୍ତି।
୨୦୨୬ କେରଳମ୍ ବିଧାନସଭା ନିର୍ବାଚନରେ କଂଗ୍ରେସ ଏକକ ବୃହତ୍ତମ ଦଳ ଭାବରେ ଉଭା ହୋଇଥିଲା। କଂଗ୍ରେସ ୬୩ଟି ଆସନ ଜିତିଥିଲା। ୟୁଡିଏଫ ମେଣ୍ଟ ୧୪୦ ସଦସ୍ୟ ବିଶିଷ୍ଟ ବିଧାନସଭାରେ ମୋଟ ୧୦୨ଟି ଆସନ ପାଇଥିଲା। ଏହା ଦ୍ୱାରା ସିପିଆଇ(ଏମ) ନେତୃତ୍ୱାଧୀନ ଏଲଡିଏଫ ସରକାରଙ୍କ ୧୦ ବର୍ଷର ଶାସନର ଅନ୍ତ ଘଟିଥିଲା। ଗତ ପାଞ୍ଚ ବର୍ଷ ଧରି ବିରୋଧୀ ଦଳ ନେତା ଭାବରେ କାର୍ଯ୍ୟ କରିଥିବା ଭି.ଡି. ସତିସନ ତୃଣମୂଳ ସ୍ତରରେ କଂଗ୍ରେସ ସଂଗଠନକୁ ମଜଭୁତ କରିବାର ଶ୍ରେୟ ପାଇଥିଲେ। ଏହି କାରଣରୁ ଦଳ ତାଙ୍କୁ ରାଜ୍ୟର ନେତୃତ୍ୱ ଦାୟିତ୍ୱ ଦେଇଥିଲା।
#WATCH | Thiruvananthapuram: VD Satheesan and Lok Sabha LoP Rahul Gandhi share a hug after Satheesan took oath as Chief Minister of Keralam
(Source: PRD) pic.twitter.com/IJPSyjepjo
— ANI (@ANI) May 18, 2026
Dharitri – Odisha’s No.1 Odia Daily
