ମହାକାଳପଡ଼ା,୧୬ା୫(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ଥାନା ବାରଡ଼ାଙ୍ଗ ନାଉରୀ ସାହିରେ ଗୁରୁବାର ସାରେ ଏକ ପରିବାର ମଧ୍ୟରେ ଜମି ବାଡ଼ି ବିବାଦ ଓ ମାଟି ପକାଇବାକୁ ନେଇ ଏକ ହତ୍ୟାକାଣ୍ଡ ଘଟିଛି। ଏଥିରେ ବଡଭାଇ, ତାଙ୍କ ପୁଅ ଓ ସହଯୋଗୀଙ୍କ ଆକ୍ରମଣରେ ସାନଭାଇ ଡାକ୍ତର ଗୋଲେଖ ନାଉରୀ(୪୪)ଙ୍କ ମୃତ୍ୟୁ ଘଟିଛି। ମୃତ ଗୋଲେଖ ହୋମିଓପାଥିକ ଘରୋଇ ଚିକିତ୍ସକ ଭାବେ ଜଣାଶୁଣା ଥିଲେ। ଏ ନେଇ ଗୋଲେଖଙ୍କ ସ୍ତ୍ରୀ କଳ୍ପନା ଚୌଧୁରୀ ମହାକାଳପଡ଼ା ଥାନାରେ ବିଳମ୍ବିତ ରାତିରେ ଅଭିଯୋଗ କରିଛନ୍ତି। ଏଥିନେଇ ଦେଢଶୁର ଅଭୟ ଓ ପରିବାର ଲୋକଙ୍କ ବିରୋଧରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ଗୋଲେଖଙ୍କ ବଡ଼ଭାଇ ଅଭୟ ନାଉରୀ(୬୧), ଅଭୟଙ୍କ ସ୍ତ୍ରୀ ରାନୁବାଳା ନାଉରୀ(୬୦), ଝିଅ ରୀତା ନାଉରୀ(୨୩), ବୋହୂ ରାନୁ ଦାସ(୨୪)ଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଛି। ଏହି ଘଟଣାରେ ଜଡ଼ିତ ଥିବା ଅଭୟଙ୍କ ପୁଅ ଜିତେନ୍ଦ୍ର ନାଉରୀ(୩୦) ଓ ଜ୍ୱାଇଁ ରମେଶ ସ୍ବାଇଁ(୨୫) ଫେରାର ହୋଇଯାଇଛନ୍ତି। ସେମାନଙ୍କୁ ଗିରଫ କରିବା ପାଇଁ ତନାଘନା ଚାଲିଛି ବୋଲି ପୋଲିସ କହିଛି। ଏ ନେଇ ଥାନାରେ ଭାରତୀୟ ନ୍ୟାୟ ସଂହିତା ଧାରା ୧୦୩(୧), ୧୧୫(୨) ଓ ୩(୫)ରେ ଏକ ମାମଲା (ନଂ.୧୩୯/୨୬) ରୁଜୁ ହୋଇଛି।
କେନ୍ଦ୍ରାପଡ଼ାର ଏକ ସାଇଣ୍ଟିଫିକ ଟିମ୍ ସହ ସବଇନ୍ସପେକ୍ଟର ତପସ୍ବିନୀ ବିଶ୍ୱାଳ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ଅପରାହ୍ନରେ ବ୍ୟବଚ୍ଛେଦ ହୋଇ ମୃତଦେହ ଗାଁରେ ପହଞ୍ଚିବା ପରେ ସତ୍କାର କରାଯାଇଥିଲା।
ସୂଚନାଯୋଗ୍ୟ ଯେ, ନାଉରୀ ସାହିର ଅଭୟ ନାଉରୀଙ୍କ ସହିତ ସାନଭାଇ ଡାକ୍ତର ଗୋଲେଖ ନାଉରୀଙ୍କ ବାଡ଼ି ପଛରେ ମାଟି ପକାଇବାକୁ ନେଇ ଉଚ୍ଚବାଚ ଓ ପରେ ଗଣ୍ଡଗୋଳର ରୂପ ନେଇଥିଲା। ଏଥିରେ ଉତ୍ତେଜିତ ହୋଇ ବଡ଼ଭାଇଙ୍କ ପରିବାର ସଂଘବଦ୍ଧ ଭାବେ ସାନଭାଇ ଗୋଲେଖଙ୍କୁ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ତାଙ୍କୁ କେନ୍ଦ୍ରାପଡ଼ା ଜିଲା ଚିକିତ୍ସା କେନ୍ଦ୍ରକୁ ସ୍ଥାନାନ୍ତର କରାଯାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
