ଇସଲାମାବାଦ୍,୧୯।୫: ଭାରତୀୟ ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀଙ୍କ ଚେତାବନୀ ପରେ ପାକିସ୍ତାନ ହତଚକିତ ହୋଇଯାଇଛି। ଏବେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ ଭାରତକୁ ଧମକ ଦେଇଛନ୍ତି। ସେ କହିଛନ୍ତି, ଯଦି ଭାରତ ପାକିସ୍ତାନ ବିରୋଧରେ କୌଣସି ଦୁଃସାହସିକ କାର୍ଯ୍ୟ ଚେଷ୍ଟା କରେ, ତେବେ ଏହା ଇତିହାସ ପୃଷ୍ଠାରେ ଲିପିବଦ୍ଧ ହୋଇଯିବ। ସେ ଭାରତର ଭୂଗୋଳକୁ ପରିବର୍ତ୍ତନ କରିବାକୁ ଧମକ ଦେବା ପର୍ଯ୍ୟନ୍ତ ଯାଇଥିଲେ।
ଆସିଫଏକ ସାକ୍ଷାତକାର ସମୟରେ ଏହି ମନ୍ତବ୍ୟ ଦେଇଥିଲେ। ସେ ଗତ ବର୍ଷ ମେ ମାସରେ ଭାରତ ଏବଂ ପାକିସ୍ତାନ ମଧ୍ୟରେ ସୃଷ୍ଟି ହୋଇଥିବା ଉତ୍ତେଜନାକୁ ଉଲ୍ଲେଖ କରିଥିଲେ। ଆସିଫ ଦାବି କରିଥିଲେ ଯେ, ସେହି ସମୟରେ ପାକିସ୍ତାନ ଭାରତକୁ କଡ଼ା ଜବାବ ଦେଇଥିଲା, ଯାହା ଫଳରେ ଭାରତ ଏହାର ସମ୍ମାନ ଉପରେ ଆଘାତ ଆସିଥିଲା।
ଭାରତୀୟ ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀଙ୍କ ବୟାନ ପରେ ଏହି ସମ୍ପୂର୍ଣ୍ଣ ବିବାଦ ଆରମ୍ଭ ହୋଇଥିଲା। ଜେନେରାଲ ଦ୍ୱିବେଦୀ କହିଥିଲେ ଯେ, ପାକିସ୍ତାନକୁ ନିଷ୍ପତ୍ତି ନେବାକୁ ପଡିବ ଯେ ସେ ଭୂଗୋଳର ଏକ ଅଂଶ ହୋଇ ରହିବାକୁ ଚାହେଁ କି ଇତିହାସର ଏକ ଅଂଶ ହେବାକୁ ଚାହେଁ।
ଏହି ବୟାନର ପ୍ରତିକ୍ରିୟା ଦେଇ ଖ୍ବାଜା ଆସିଫ ଦୃଢ଼ ଭାବରେ କହିଛନ୍ତି ଯେ, ଭାରତୀୟ ସେନା ମୁଖ୍ୟ କେବଳ ତାଙ୍କର ହଜିଯାଇଥିବା ବିଶ୍ୱସନୀୟତା ଫେରି ପାଇବାକୁ ଚେଷ୍ଟା କରୁଛନ୍ତି। ଯଦି ଭାରତ ପାକିସ୍ତାନ ବିରୋଧରେ କୌଣସି ଦୁଃସାହସିକ କାର୍ଯ୍ୟ ଚେଷ୍ଟା କରେ, ତେବେ ଏହା ଇତିହାସ ପୃଷ୍ଠାରେ ଲିପିବଦ୍ଧ ହୋଇଯିବ। ଆମେ ଭାରତର ଭୁଗୋଳ ପରିବର୍ତ୍ତନ କରିଦେବୁ।
ପାକିସ୍ତାନୀ ପ୍ରତିରକ୍ଷା ମନ୍ତ୍ରୀ ଭାରତର ବୈଦେଶିକ ନୀତି ସମ୍ପର୍କରେ ମଧ୍ୟ ପ୍ରଶ୍ନ ଉଠାଇଥିଲେ। ସେ ଯୁକ୍ତି ଦେଇଥିଲେ ଯେ, ବାଂଲାଦେଶ, ନେପାଳ ଏବଂ ଶ୍ରୀଲଙ୍କା ଭଳି ପଡ଼ୋଶୀ ଦେଶ ସହିତ ଭାରତର ସମ୍ପର୍କ ଆଉ ପୂର୍ବ ପରି ନୁହେଁ। ଭାରତ ବର୍ତ୍ତମାନ ବୈଦେଶିକ ନୀତି ମୋର୍ଚ୍ଚାରେ ଲଜ୍ଜାର ସମ୍ମୁଖୀନ ହେଉଛି।
ସିନ୍ଧୁ ଜଳ ଚୁକ୍ତିନାମା ଉପରେ ବକ୍ତବ୍ୟ ରଖି ଆସିଫ ଦୃଢ଼ତାର ସହିତ କହିଛନ୍ତି, ଏହି ଚୁକ୍ତିନାମା ଗତ ୬୬ ବର୍ଷ ଧରି ବଳବତ୍ତର ରହିଛି ଏବଂ ଏହାକୁ ଏକପାଖିଆ ଭାବରେ ସ୍ଥଗିତ କରାଯାଇପାରିବ ନାହିଁ।
Dharitri – Odisha’s No.1 Odia Daily
