ନୂଆଦିଲ୍ଲୀ,୧୬।୫: ରୁପା ଆମଦାନୀକୁ ନେଇ କେନ୍ଦ୍ର ସରକାର ଲଗାଇଛନ୍ତି କଟକଣା। ସରକାର ଏହାର ଅନେକ ଶ୍ରେଣୀ କୁ ମୁକ୍ତ ତାଲିକା (Free List)ରୁ ହଟାଇ ପ୍ରତିବନ୍ଧିତ ତାଲିକା (Restricted Category)ରେ ସାମିଲ କରିଛନ୍ତି। ଏହାର ଅର୍ଥ ହେଉଛି, ଏଣିକି ଏହି ସବୁ ଶ୍ରେଣୀର ରୁପା ଆମଦାନୀ କରିବା ପୂର୍ବ ଭଳି ସହଜ ହେବ ନାହିଁ ଏଥିପାଇଁ ସରକାରଙ୍କଠାରୁ ଅତିରିକ୍ତ ଅନୁମତି ନେବାକୁ ପଡ଼ିବ।
ଦେଶରେ ମୂଲ୍ୟବାନ ଧାତୁର କ୍ରମାଗତ ବଢୁଥିବା ଆମଦାନୀକୁ ନିୟନ୍ତ୍ରଣ କରିବା ଏବଂ ବାଣିଜ୍ୟ ନିଅଣ୍ଟ (Trade Deficit) କୁ ହ୍ରାସ କରିବା ଲକ୍ଷ୍ୟରେ ସରକାର ଏହି ପଦକ୍ଷେପ ନେଇଛନ୍ତି। ବିଗତ କିଛି ସମୟ ହେବ ସୁନା ଓ ରୁପା ଆମଦାନୀ ଯୋଗୁ ଦେଶର ବୈଦେଶିକ ମୁଦ୍ରା ଭଣ୍ଡାର ଉପରେ ଚାପ ବଢୁଥିଲା, ଯାହାକୁ ନେଇ ସରକାର ଚିନ୍ତିତ ଥିଲେ।
ସୁନା ଉପରେ ଆମଦାନୀ ଶୁଳ୍କ (Import Duty) ବୃଦ୍ଧି ପାଇବା ପରେ ଲୋକମାନେ ଏବେ ବିନିଯୋଗ (Investment) ଏବଂ ଅଳଙ୍କାର ପାଇଁ ରୁପା ଆଡ଼କୁ ଅଧିକ ଆକର୍ଷିତ ହୋଇପାରନ୍ତି ବୋଲି ସରକାର ଆଶଙ୍କା କରୁଛନ୍ତି। ଏହି ସମ୍ଭାବନାକୁ ଦୃଷ୍ଟିରେ ରଖି ସରକାର ଚାନ୍ଦି ଆମଦାନୀ ଉପରେ ମଧ୍ୟ କଟକଣା କଡ଼ାକଡ଼ି କରିଛନ୍ତି।
ନିକଟରେ ସରକାର ସୁନା ଓ ଚାନ୍ଦି ଉଭୟ ଉପରେ ଆମଦାନୀ ଶୁଳ୍କକୁ ୬% ରୁ ବଢ଼ାଇ ୧୫% କରିଥିଲେ। ଏହା ସତ୍ତ୍ୱେ, ସୁନା ତୁଳନାରେ ଚାନ୍ଦି ଶସ୍ତା ହୋଇଥିବାରୁ ବିନିଯୋଗକାରୀମାନେ ଚାନ୍ଦି କିଣିବା ବଢ଼ାଇ ଦେଇପାରନ୍ତି ବୋଲି ଅନୁମାନ କରାଯାଉଥିଲା।
ବର୍ତ୍ତମାନ ସମୟରେ ସରକାର ବୈଦେଶିକ ମୁଦ୍ରା ଭଣ୍ଡାରକୁ ସୁରକ୍ଷିତ ରଖିବା ଏବଂ ଟଙ୍କା ଉପରେ ବଢୁଥିବା ଚାପକୁ କମାଇବା ଉପରେ ବିଶେଷ ଧ୍ୟାନ ଦେଉଛନ୍ତି। ବିଶ୍ୱ ସ୍ତରରେ ବଢୁଥିବା ଅନିଶ୍ଚିତତା ଏବଂ ଆମଦାନୀ ଖର୍ଚ୍ଚ ବୃଦ୍ଧି ହେତୁ ସରକାର ସତର୍କତା ଅବଲମ୍ବନ କରୁଛନ୍ତି। ବିଶେଷଜ୍ଞଙ୍କ ମତରେ, ଯଦି ମୂଲ୍ୟବାନ ଧାତୁର ଆମଦାନୀ ଏମିତି କ୍ରମାଗତ ଭାବେ ବଢିଚାଲେ, ତେବେ ଏହା ଚାଲୁଖାତା ନିଅଣ୍ଟ (Current Account Deficit) ଏବଂ ବାଣିଜ୍ୟ ନିଅଣ୍ଟ ଉଭୟକୁ ବଢ଼ାଇଦେବ। ସେଥିପାଇଁ ସରକାର ଆମଦାନୀ ନିୟନ୍ତ୍ରଣ କରି ସ୍ଥିତି ସମ୍ଭାଳିବାକୁ ଚେଷ୍ଟା କରୁଛନ୍ତି।
ସରକାରୀ ସୂଚନା ଅନୁଯାୟୀ, ଏପ୍ରିଲରେ ସୁନା ଏବଂ ରୁପାର ଆମଦାନୀ ପୂର୍ବ ପ୍ରାୟ ୩୦ ବର୍ଷର ସର୍ବନିମ୍ନ ସ୍ତରକୁ ଚାଲିଯାଇଛି। ଅଧିକ ଆମଦାନୀ ଶୁଳ୍କ ଏବଂ ଆନ୍ତର୍ଜାତୀୟ ବଜାରରେ କ୍ରମାଗତ ଭାବେ ବଢୁଥିବା ମୂଲ୍ୟ ଏହାର ମୁଖ୍ୟ କାରଣ ବୋଲି କୁହାଯାଉଛି। ବର୍ତ୍ତମାନ ଏହି ନୂଆ କଟକଣା ଲାଗୁ ହେବା ପରେ, ଆଗାମୀ ମାସଗୁଡ଼ିକରେ ରୁପା ଆମଦାନୀ ଆହୁରି ହ୍ରାସ ପାଇବାର ସମ୍ଭାବନା ରହିଛି।
