ନୂଆଦିଲ୍ଲୀ,୧୯ା୫(ପି.ଟି.): କ୍ରିକେଟ ପ୍ରଶାସନ ସମ୍ପର୍କିତ ଗୁରୁତ୍ୱପୂର୍ଣ୍ଣ ସର୍ବସାଧାରଣ କାର୍ଯ୍ୟକ୍ରମ ପରିଚାଳନା ଓ ଅନ୍ତର୍ଜାତୀୟ ଟୁର୍ନାମେଣ୍ଟରେ ଭାରତର ପ୍ରତିନିଧିତ୍ୱ ସତ୍ତ୍ୱେ ବିସିସିଆଇକୁ ଏକ ସର୍ବସାଧାରଣ ପ୍ରାଧିକରଣ ଭାବେ ବିବେଚନା କରାଯାଇପାରିବ ନାହିଁ। କାରଣ ଏହାର ମାଲିକାନା, ନିୟନ୍ତ୍ରଣ ସରକାର କରୁନାହାନ୍ତି ଏବଂ ଏହା ସରକାରୀ ପାଣ୍ଠି ମଧ୍ୟ ବ୍ୟବହାର କରୁନାହିଁ ବୋଲି ସିଆଇସି ରମେଶ କହିଛନ୍ତି। ବିସିସିଆଇକୁ ଆର୍ଟିଆଇ ଆଇନର ଧାରା-୨ (ଜ) ଅଧୀନରେ ‘ସର୍ବସାଧାରଣ ପ୍ରାଧିକରଣ’ ଭାବେ ବର୍ଗୀକୃତ କରାଯାଇପାରିବ ନାହିଁ। ଏଣୁ ଏହି ଆଇନର ବ୍ୟବସ୍ଥାଗୁଡ଼ିକ ବିସିସିଆଇ କ୍ଷେତ୍ରରେ ପ୍ରଯୁଜ୍ୟ ନୁହେଁ ବୋଲି ଦର୍ଶାଇଛନ୍ତି। ଏଥିସହ ୨୦୧୮ରେ ତତ୍କାଳନୀ ସୂଚନା କମିଶନର ଏମ୍. ଶ୍ରୀଧର ଆଚାର୍ୟୁଲୁ ଦେଇଥିବା ଆଦେଶରେ ରମେଶ ପରିବର୍ତ୍ତନ ଆଣିଛନ୍ତି।
ସୂଚନାଯୋଗ୍ୟ, ବିସିସିଆଇ କେଉଁ ଅଧିକାରରେ ଭାରତର ପ୍ରତିନିଧିତ୍ୱ କରେ ଏବଂ ଜାତୀୟ ଓ ଅନ୍ତର୍ଜାତୀୟ ଟୁର୍ନାମେଣ୍ଟ ଲାଗି ଖେଳାଳି ଚୟନ କରେ ସେ ସମ୍ପର୍କିତ ସୂଚନା ପାଇଁ ୨୦୧୮ରେ ଏକ ଆବେଦନ ହୋଇଥିଲା। ଉକ୍ତ ଆବେଦନର ଶୁଣାଣି କରି ତତ୍କାଳୀନ ସିଆଇସି ଏମ୍. ଶ୍ରୀଧର ବିସିସିଆଇକୁ ଏକ ସର୍ବସାଧାରଣ ପ୍ରାଧିକରଣ ଭାବେ ବିବେଚନା କରିବା ସହ ଏହାର ସଭାପତି, ସମ୍ପାଦକ ଓ ପ୍ରଶାସନିକ କମିଟିକୁ କେନ୍ଦ୍ରୀୟ ସୂଚନା ଅଧିକାରୀ, ସହାୟକ ସର୍ବସାଧାରଣ ସୂଚନା ଅଧିକାରୀ ଓ ପ୍ରଥମ ଆପିଲିଏଟ୍ ଅଧିକାରୀଙ୍କୁ ଆର୍ଟିଆଇ ଅଧୀନରେ ନିଯୁକ୍ତ କରିବାକୁ ନିର୍ଦ୍ଦେଶ ଦେଇଥିଲେ। ହେଲେ ଉକ୍ତ ଆଦେଶକୁ ବିସିସିଆଇ ମାଡ୍ରାସ ହାଇକୋର୍ଟରେ ଚ୍ୟାଲେଞ୍ଜ କରିଥିଲା। ଉକ୍ତ ଆବେଦନର ଶୁଣାଣି ସମୟରେ ହାଇକୋର୍ଟ ବିସିସିଆଇ ବନାମ କ୍ରିକେଟ ଆସୋସିଏଶନ ଅଫ୍ ବିହାର ମାମଲାରେ ସୁପ୍ରିମକୋର୍ଟ ଦେଇଥିବା ରାୟକୁ ଉଲ୍ଲେଖ କରିବା ସହ ୨୦୨୫ ସେପ୍ଟେମ୍ବରରେ ସିଆଇସିକୁ ଆଇନଗତ ସ୍ଥିତିର ପୁନଃ ସମୀକ୍ଷା କରି ନୂଆ ନିର୍ଦ୍ଦେଶ ଦେବାକୁ କହିଥିଲେ। ଏହି ମାମଲାର ପୁନଃ ସମୀକ୍ଷା କରିବା ପରେ ସିଆଇସି କହିଛି ଯେ, ବିସିସିଆଇ ଏକ ବ୍ୟକ୍ତିଗତ ସ୍ବୟଂଚାଳିତ ସଂସ୍ଥା, ଯାହାକି ତାମିଲନାଡୁ ସୋସାଇଟିଜ୍ ରେଜିଷ୍ଟ୍ରେଶନ ଆଇନ ଅଧୀନରେ ପଞ୍ଜୀକୃତ ହୋଇଛି। ଏହାକୁ ସମ୍ବିଧାନ, ସଂସଦ କିମ୍ବା ରାଜ୍ୟ ବିଧାନସଭା କିମ୍ବା ସରକାରଙ୍କ ନିର୍ଦ୍ଦେଶରେ ପ୍ରତିଷ୍ଠା କରାଯାଇନାହିଁ। ତେଣୁ ଏହା ଆର୍ଟିଆଇ ପରିସରଭୁକ୍ତ ହେବନାହିଁ।
