ସୁରଟ୍,୨୨ା୨: ଗୁଜରାଟର ଭୁଜ୍ରେ ୬୮ କଲେଜ ଛାତ୍ରୀଙ୍କୁ ଉଲଗ୍ନ କରି ଋତୁସ୍ରାବ ପରୀକ୍ଷା କରାଯିବାର ଦିନ କେଇଟା ପରେ ସୁରଟରେ ମହିଳାମାନଙ୍କ ପ୍ରତି ପୁଣି ଏକ ଅପମାନଜନକ ଘଟଣା ସାମନାକୁ ଆସିଛି। ସୁରଟ ମ୍ୟୁନିସିପାଲ କର୍ପୋରେଶନର ୧୦ ଜଣ ମହିଳା ଟ୍ରେନି କିରାଣିଙ୍କୁ ଉଲଗ୍ନ ଅବସ୍ଥାରେ ଛିଡା କରାଇ ସେମାନଙ୍କ ଡାକ୍ତରୀ ପରୀକ୍ଷା କରାଯାଇଛି। ଏହି ଘଟଣା ପଦାକୁ ଆସିବା ପରେ ତଦନ୍ତ ନିର୍ଦ୍ଦେଶ ଦିଆଯାଇଛି। ମ୍ୟୁନିସିପାଲ କର୍ପୋରେଶନ ଦ୍ୱାରା ପରିଚାଳିତ ସୁରଟ ମ୍ୟୁନିସିପାଲ ଇନ୍ଷ୍ଟିଚ୍ୟୁଟ ଅଫ ମେଡିକାଲ ଏଜୁକେଶନ ଆଣ୍ଡ ରିସର୍ଚ୍ଚ ହସ୍ପିଟାଲରେ ଏହି ଲଜ୍ଜାଜନକ ଘଟଣା ଘଟିଛି। ଏପରିକି ଅବିବାହିତ ଯୁବତୀମାନଙ୍କର ଗର୍ଭାବସ୍ଥାର ପରୀକ୍ଷା କରାଯାଇଥିଲା ବୋଲି ଅଭିଯୋଗ ହୋଇଛି। ମ୍ୟୁନିସିପାଲ କର୍ପୋରେଶନରେ ୩ ବର୍ଷ ଟ୍ରେନି ଭାବେ କାମ କଲା ପରେ କର୍ମଚାରୀମାନଙ୍କୁ ନିୟମିତ କରାଯାଇଥାଏ। ଏହା ପୂର୍ବରୁ ସେମାନଙ୍କ ଶାରୀରିକ ଉପଯୁକ୍ତତା ପରୀକ୍ଷା କରାଯାଇଥାଏ। ଏଥିପାଇଁ ମହିଳା କିରାଣିମାନଙ୍କୁ ମେଡିକାଲ ପରୀକ୍ଷା ଦେବାକୁ କୁହାଯାଇଥିଲା। ସ୍ତ୍ରୀରୋଗ ଓ୍ବାର୍ଡରେ ସେମାନଙ୍କୁ ଯେପରି ପରୀକ୍ଷା କରାଗଲା ତାହା ଠିକ୍ ନୁହେଁ ବୋଲି କର୍ମଚାରୀ ସଂଘ କହିଛି।
