ବେଙ୍ଗାଲୁରୁ,୧୨।୨: ଗତ ସପ୍ତାହରେ ବେଙ୍ଗାଲୁରୁ ବିଜୟନଗରରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ଅନ୍ତିମ ସଂସ୍କାର ପାଇଁ ସମସ୍ୟା ଉପୁଜିଥିଲା। କାରଣ ମୃତକଙ୍କ ଆଧାର କାର୍ଡ ହଜିଯାଇଥିଲା। ଯେତେବେଳେ ଅନ୍ତିମ ସଂସ୍କାର ପାଇଁ ସ୍ଥାନୀୟ ଅଞ୍ଚଳରେ ଥିବା ଏକ ଶ୍ମଶାନରେ ସମ୍ପର୍କୀୟମାନେ ପହଞ୍ଚିଥିଲେ, ସେହି ସମୟରେ ସେଠାରେ ଥିବା ଶ୍ମଶାନ କର୍ମଚାରୀ ମୃତବ୍ୟକ୍ତିଙ୍କ ଆଧାର କାର୍ଡ ମାଗିଥିଲେ। ପରିବାରଲୋକେ ତାଙ୍କର ଆଧାରକାର୍ଡ ନାହିଁ କହିବାରୁ ଉକ୍ତ କର୍ମଚାରୀ ଆଧାର ବାଧ୍ୟତାମୂଳକ ଏବଂ ଅନ୍ଲାଇନ୍ ଜରିଆରେ ଆଣିବାକୁ କହିଥିଲେ। ଅନ୍ଲାଇନ୍ରେ ଆଧାର କାର୍ଡ ଆଣିବା ପାଇଁ ସଂସ୍କାର କାର୍ଯ୍ୟରେ ବିଳମ୍ବ ଉପୁଜିବାରୁ ପରିବାର ଲୋକଙ୍କ ମଧ୍ୟରେ ଅସନ୍ତୋଷ ଉପୁଜିଥିଲା। ଏନେଇ ସେମାନେ ବ୍ରୁହାଟ ବେଙ୍ଗାଲୁରୁ ମହାନଗର ପାଳିକେ (ବିବିଏମ୍ପି) ନିକଟରେ ଅଭିଯୋଗ କରିଥିଲେ। ଏହାପରେ ଅନ୍ତିମ ସଂସ୍କାର ପାଇଁ ଏଣିକି ମୃତବ୍ୟକ୍ତିଙ୍କର ଆଧାର କାର୍ଡ ଜରୁରୀ ନୁହେଁ ବୋଲି ସୋମବାର ବିବିଏମ୍ପି ଏକ ନୋଟିସ ଜାରି କରିଛନ୍ତି। ମୃତ ବ୍ୟକ୍ତିଙ୍କର ଅନ୍ତିମ ସଂସ୍କାର ପାଇଁ ଶ୍ମଶାନର କର୍ମଚାରୀମାନେ ଏବେ ଆଉ ତାଙ୍କ ପରିଜନଙ୍କୁ ମୃତବ୍ୟକ୍ତିଙ୍କ ଆଧାରକାର୍ଡ ଦେଖାଇବାକୁ ବାଧ୍ୟ କରିପାରିବେ ନାହିଁ। ଯଦି କେହି ମୃତ ବ୍ୟକ୍ତିଙ୍କ ଆଧାର କାର୍ଡକୁ ନେଇ ପରିବାରଲୋକଙ୍କୁ ହଇରାଣ କରନ୍ତି ତେବେ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିବିଏମ୍ପି କମିଶନର ସୂଚନା ଦେଇଛନ୍ତି। ପୂର୍ବରୁ କିଛି ଏଭଳି ନିୟମ ନ ଥିବା ବେଳେ ଶ୍ମଶାନରେ ଅନ୍ତିମ ସଂସ୍କାର ପାଇଁ ମୃତବ୍ୟକ୍ତିଙ୍କ କେବଳ ମେଡିକାଲ ଡେଥ୍ ସାର୍ଟିଫିକେଟ ବା ଫଟୋ ହିଁ ଯଥେଷ୍ଟ ରହୁଥିଲା। ଯଦି ଏସବୁ ଉପଲବ୍ଧ ହୋଇପାରୁ ନ ଥିଲା ତେବେ ପରିବାରବର୍ଗଙ୍କ ଏକ ସ୍ବୀକାରନାମା ପତ୍ରରେ ହିଁ ଅନ୍ତିମ ସଂସ୍କାର କରାଯାଉଥିଲା ବୋଲି ସେ କହିଛନ୍ତି।
