ଭଞ୍ଜନଗର, ୨୯/୫ (ବାବୁଲା ପ୍ରଧାନ): ଗଞ୍ଜାମ ଜିଲ୍ଲାପାଳ ଭି. କୀର୍ତ୍ତି ଭାସନଙ୍କ ପ୍ରୟାସରେ ଜିଲ୍ଲାର ଯୁବତୀ-ଯୁବକମାନଙ୍କୁ ୟୁପିଏସସି ଓ ଓପିଏସସି ପରୀକ୍ଷା ପାଇଁ ପ୍ରସ୍ତୁତ କରିବା ଲକ୍ଷ୍ୟରେ ‘ଲକ୍ଷ୍ୟ ନିକେତନ’ ଯୋଜନା ଚଳିତ ବର୍ଷ ଆରମ୍ଭ କରାଯାଇଥିଲା।
ଏହି ଯୋଜନା ଅଧୀନରେ ଜିଲ୍ଲାର ୩ଟି ଉପଖଣ୍ଡ—ବ୍ରହ୍ମପୁର, ଛତ୍ରପୁର ଓ ଭଞ୍ଜନଗରରେ ୩ଟି ତାଲିମ କେନ୍ଦ୍ର ଖୋଲାଯାଇଛି। ଏହି କେନ୍ଦ୍ରଗୁଡ଼ିକରେ ଜିଲାର ବଛା ବଛା ୧୫୦ ଜଣ ଯୁବତୀ-ଯୁବକଙ୍କୁ ୟୁପିଏସସି ଓ ଓପିଏସସି ପରୀକ୍ଷା ପାଇଁ ପ୍ରଶିକ୍ଷଣ ଦିଆଯାଉଛି।
କିଛି ମାସ ପୂର୍ବରୁ ପ୍ରକାଶିତ ୟୁପିଏସସି ୨୦୨୫ ପରୀକ୍ଷାରେ ଜିଲାର ୫ ଜଣ ପ୍ରାର୍ଥୀ କୃତିତ୍ୱ ଅର୍ଜନ କରିଥିବା ବେଳେ ଏହାକୁ ଯୋଜନାର ପ୍ରଥମ ସଫଳତା ଭାବେ ଦେଖାଯାଇଥିଲା। ଇତିମଧ୍ୟରେ ପ୍ରକାଶିତ ଓପିଏସସି ପରୀକ୍ଷାରେ ମଧ୍ୟ ଜିଲାର ଏକାଧିକ ପ୍ରାର୍ଥୀ ସଫଳତା ଅର୍ଜନ କରିଛନ୍ତି।
ସେଥିମଧ୍ୟରୁ ଭଞ୍ଜନଗର ଉପଖଣ୍ଡର ୪ ଜଣ ପ୍ରାର୍ଥୀଙ୍କୁ ଶୁକ୍ରବାର ଭଞ୍ଜନଗର ଲକ୍ଷ୍ୟ ନିକେତନ ତାଲିମ କେନ୍ଦ୍ରରେ ସମ୍ବର୍ଦ୍ଧନା ଦିଆଯାଇଛି। ଆୟୋଜିତ ସମ୍ବର୍ଦ୍ଧନା ଉତ୍ସବରେ ଭଞ୍ଜନଗର ଉପ ଜିଲାପାଳ ଉମା ଶଙ୍କର ବେହେରା ମୁଖ୍ୟ ଅତିଥି ଭାବେ ଯୋଗଦେଇ କୃତୀ ପ୍ରାର୍ଥୀମାନଙ୍କୁ ସମ୍ବର୍ଦ୍ଧିତ କରିଥିଲେ। ତାଙ୍କ ଭାଷଣରେ ସେ କହିଥିଲେ, “ନୂତନ ଅଧିକାରୀମାନେ ଜିଲା ଓ ବିଭାଗର ବିକାଶ, ଲୋକସେବା ଓ ଶାସନ ପ୍ରଣାଳୀର ମୂଳ ସ୍ତମ୍ଭ ହେବେ। ସେମାନେ ସତ୍ୟନିଷ୍ଠା, ସମୟପାଳନ ଓ ପ୍ରଶାସନିକ ଦକ୍ଷତା ସହିତ ଲୋକମାନଙ୍କୁ ଗୁଣବତ୍ତାପୂର୍ଣ୍ଣ ସେବା ଯୋଗାଇବେ।”
ସେ ଆହୁରି କହିଥିଲେ ଯେ, ‘ଲକ୍ଷ୍ୟ ନିକେତନ’ ପରି ଯୋଜନା ଆଗାମୀ ଦିନରେ ଅଧିକ ପ୍ରାର୍ଥୀଙ୍କୁ ସଫଳତା ଦିଗରେ ଆଗେଇ ନେବ। ସମ୍ବର୍ଦ୍ଧିତ ଓପିଏସସି କୃତୀ ପ୍ରାର୍ଥୀମାନେ ହେଲେ ଭଞ୍ଜନଗର ଉପଖଣ୍ଡ ବୁଗୁଡ଼ା ବ୍ଲକର ସଂଘମିତ୍ରା ପାତ୍ର (ର୍ୟାଙ୍କ ୧୮୭), ଆସ୍କା ବ୍ଲକର ଇତିଶ୍ରୀ ଜେନା (ର୍ୟାଙ୍କ ୧୦), ସ୍ନିଗ୍ଧା ସେନାପତି (ର୍ୟାଙ୍କ ୬୩) ଓ ସୋରଡ଼ା ବ୍ଲକର କାହୁଁ ଚରଣ ବେହେରା (ର୍ୟାଙ୍କ ୫୬)।ଏହି ସମ୍ବର୍ଦ୍ଧନା ଉତ୍ସବରେ ଭଞ୍ଜନଗର ଅତିରିକ୍ତ ଉପ ଜିଲ୍ଲାପାଳ ପ୍ରଧାନ ଟୁଲିଆମା, ବିଡିଓ ଭାରତୀ ଦେବୀ ସହ ଅନ୍ୟମାନେ ଉପସ୍ଥିତ ଥିଲେ।
ସୂଚନାଯୋଗ୍ୟ ଯେ, ଜିଲାପାଳଙ୍କ ‘ଲକ୍ଷ୍ୟ ନିକେତନ’ ଯୋଜନା ସଫଳତା ଦିଗରେ ଦୃତ ଗତିରେ ଆଗେଇ ଚାଲିଛି, ଯାହା ଜିଲାବାସୀଙ୍କ ପାଇଁ ଖୁସିର ଖବର।ଏହି କେନ୍ଦ୍ରରେ ମାଗଣା କୋଚିଂ, ପ୍ରଶିକ୍ଷଣ, ମାର୍ଗଦର୍ଶନ, ମକ୍ ଇଣ୍ଟରଭ୍ୟୁ, ଡିଜିଟାଲ୍ କ୍ଲାସରୁମ୍ ଓ ଆଧୁନିକ ଲାଇବ୍ରେରି ସୁବିଧା ଯୋଗାଇ ଦିଆଯାଉଛି। ସେଥିସହ ଦକ୍ଷ ଅଧିକାରୀମାନଙ୍କ ଦ୍ୱାରା ପ୍ରଶିକ୍ଷଣ ଦିଆଯାଉଛି।ଭବିଷ୍ୟତରେ ଅଧିକରୁ ଅଧିକ ଯୁବତୀ-ଯୁବକ ଏହି ପରୀକ୍ଷାମାନେରେ ସଫଳତା ଅର୍ଜନ କରିପାରିବେ ବୋଲି ଜିଲା ପ୍ରଶାସନ ଓ ଭଞ୍ଜନଗର ଉପଖଣ୍ଡ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଉଛି।
